CBS
பதிவு செய்யப்பட்ட தேதி: மார்ச் 24, 2026 | லண்டன்
ஐரோப்பா முழுவதும் உள்ள யூத நிறுவனங்களைக் குறிவைத்து நடத்தப்பட்ட தொடர்ச்சியான தாக்குதல்களுக்குப் பொறுப்பேற்றுள்ள ஒரு குழு, அமெரிக்க மற்றும் இஸ்ரேலிய நலன்களைத் தொடர்ந்து குறிவைப்பதாக CBS செய்தியிடம் தெரிவித்துள்ளது. லண்டனில் உலகளாவிய யூத மருத்துவ அமைப்பு பயன்படுத்தும் ஆம்புலன்ஸ்களை மூன்று நபர்கள் தீயிட்டு கொளுத்தும் காட்சிகள் பாதுகாப்பு கமராக்களில் பதிவான மறுநாளே இந்த எச்சரிக்கை விடுக்கப்பட்டுள்ளது.
சில மணிநேரங்களுக்குப் பிறகு, அதிகம் அறியப்படாத இந்தக் குழு, பெல்ஜியத்தின் ஆண்ட்வெர்ப் நகரில் உள்ள ஒரு யூத குடியிருப்பில் கார் எரிக்கப்பட்டதற்கும் பொறுப்பேற்றது.
“காசா, ஈரான், லெபனான் மற்றும் எதிர்ப்பு நாடுகளில் உள்ள ஒவ்வொரு குழந்தைக்கும் நாங்கள் பழிவாங்கும் வரை, உலகெங்கிலும் உள்ள அமெரிக்க மற்றும் இஸ்ரேலிய நலன்களைத் தொடர்ந்து அச்சுறுத்துவோம்,” என்று ஹரகத் அஷாப் அல்-யமீன் அல்-இஸ்லாமியா (பொருள்: நீதிமான்களின் தோழர்களின் இஸ்லாமிய இயக்கம்) குழுவின் பிரதிநிதி ஒருவர் திங்கள்கிழமை இரவு CBS செய்தியிடம் தெரிவித்தார். “மக்கள் பாதுகாப்பாக இருக்க, சீயோனிச மற்றும் அமெரிக்க நலன்கள் மற்றும் தனிநபர்களிடமிருந்து விலகி இருக்குமாறு நாங்கள் கேட்டுக்கொள்கிறோம்.”
ஈரான் மீது அமெரிக்காவும் இஸ்ரேலும் போரைத் தொடங்கிய பிறகு, மார்ச் மாத தொடக்கத்தில் இந்தக் குழு முதன்முதலில் உருவானது. கடந்த 25 நாட்களில், ஐரோப்பா முழுவதும் தொடர்ச்சியான யூத விரோதத் தாக்குதல்களுக்கு இது பொறுப்பேற்றுள்ளது. இக்குழுவின் டெலிகிராம் (Telegram) சேனல் கடந்த வாரம் தான் உருவாக்கப்பட்டது.
ஈரான், ரஷ்ய பயங்கரவாதம் அல்லது பணத்திற்காக ஏமாற்றப்பட்ட இளைஞர்களா?
“இந்தக் குழு அடிமட்டத்திலிருந்து உருவான ஐரோப்பிய குழுபோல தெரியவில்லை ; இது ஈரானுடன் இணைந்த நெட்வொர்க்குகளுடன் தொடர்பில் உள்ள ஒரு பயங்கரவாத அமைப்பு போல உள்ளது,” என்று தொழில்நுட்பப் பயங்கரவாத எதிர்ப்பு ஆய்வாளர் லூகாஸ் வெப்பர் தெரிவித்தார்.
CBS செய்தி நிறுவனம் அஷாப் அல்-யமீனின் டெலிகிராம் நிர்வாகியுடன் பேசியது. அவர் அமெரிக்க ஆங்கிலத்தில் பதிலளித்தார். லண்டனில் ஆம்புலன்ஸ்கள் மீது நடத்தப்பட்ட தாக்குதல், மக்களுக்கு தீங்கு விளைவிப்பதைத் தவிர்க்க இரவில் செய்யப்பட்டதாக அவர் கூறினார், ஆனால் எதிர்காலத்தில் இது மாறக்கூடும் என்றும் எச்சரித்தார்.
போர் தொடரத் தொடர தாக்குதல்களின் வீரியம் அதிகரிக்கும் என்று ஆய்வாளர் ஷரோன் அடார்லோ எச்சரித்துள்ளார். “இதன் பின்னால் இருப்பவர் ஒரு பெரிய செய்தியைச் சொல்ல விரும்புகிறார்,” என்று அவர் கூறினார்.
பாதுகாப்பு மற்றும் விசாரணை
லண்டன் காவல்துறையினர் ஆம்புலன்ஸ் தாக்குதல் தொடர்பான வீடியோக்களை ஆய்வு செய்து வருகின்றனர். பிரிட்டிஷ் பிரதமர் கீர் ஸ்டார்மர் இந்தத் தாக்குதலை “பயங்கரமானது” என்று கண்டித்துள்ளார்.
பெல்ஜிய நகரங்களின் தெருக்களில் கூடுதல் பாதுகாப்பிற்காக இராணுவ வீரர்கள் நிறுத்தப்பட்டுள்ளனர். இத்தாலியும் முக்கிய யூத நிறுவனங்களைச் சுற்றி இதேபோன்ற நடவடிக்கைகளை எடுத்துள்ளது.
ஈரானிய ஆதரவு குழுக்கள் அமெரிக்க நலன்களைக் குறிவைக்கக்கூடும் என்பதால், உலகம் முழுவதிலும் உள்ள அமெரிக்கர்கள் “கூடுதல் எச்சரிக்கையுடன்” இருக்குமாறு அமெரிக்க வெளியுறவுத்துறை அறிவுறுத்தியுள்ளது.
ஐரோப்பிய ஒன்றியத்தின் ‘யூரோபோல்’ (Europol) அமைப்பு, தாங்கள் தடுப்பு நடவடிக்கைகளில் ஈடுபடுவதில்லை என்றும், அந்தந்த நாட்டு காவல்துறையின் விசாரணைகளுக்கு மட்டுமே ஆதரவு அளிப்பதாகவும் தெரிவித்துள்ளது
