ஈரானில் வீழ்த்தப்பட்ட அமெரிக்கப் போர் விமானத்தின் விமானி மீட்பு மற்றும் மற்றொருவர் மாயமானது குறித்த ரகசியத் தகவல்களை வெளியிட்ட ஊடகவியலாளரைச் சிறையிலடைக்கப் போவதாக டொனால்ட் ட்ரம்ப் எச்சரிக்கை விடுத்துள்ளார்.
கடந்த வெள்ளிக்கிழமை ஈரானில் அமெரிக்காவின் F-15E ரகப் போர் விமானம் சுட்டு வீழ்த்தப்பட்டது. இதில் ஒரு விமானி மீட்கப்பட்டார், மற்றொரு அதிகாரி மாயமானார். இந்தத் தகவலை ஊடகங்கள் கசியவிட்டதால், மாயமான விமானியைத் தேடும் ஈரானின் முயற்சி தீவிரமடைந்து, அமெரிக்காவின் மீட்புப் பணிக்கு ஆபத்து ஏற்பட்டதாக வெள்ளை மாளிகை கருதுகிறது.
வெள்ளை மாளிகையில் செய்தியாளர்களைச் சந்தித்த ட்ரம்ப் இது குறித்துக் கூறியதாவது:
-
தேசிய பாதுகாப்புக்கு அச்சுறுத்தல்: “தகவலைக் கசியவிட்ட நபர் ஒரு மனநோயாளி. ஈரானுக்கே தெரியாத தகவலை ஊடகங்கள் வெளிச்சம் போட்டுக் காட்டிவிட்டன. இது தேசிய பாதுகாப்பைப் பாதிக்கும் செயல்.”
-
சிறை தண்டனை: “அந்தச் செய்தியை எழுதிய நபர், தனது தகவலுக்கான ஆதாரத்தை (Source) வெளிப்படுத்த வேண்டும். இல்லையெனில் அவர் சிறைக்குச் செல்ல நேரிடும்.”
-
நிர்வாகத்தின் அழுத்தம்: “குறிப்பிட்ட ஊடக நிறுவனத்திடம் சென்று ‘தேசிய பாதுகாப்பு’ கருதி தகவலைக் கொடுங்கள் அல்லது சிறைக்குச் செல்லுங்கள் என நாங்கள் கூறப்போகிறோம்.”
ஊடக சுதந்திரம் கேள்விக்குறி?
அமெரிக்காவின் முதல் திருத்தச் சட்டம் (First Amendment) ஊடக சுதந்திரத்தைப் பாதுகாத்தாலும், இரகசியத் தகவல்களின் ஆதாரத்தை மறைப்பதற்கு கூட்டாட்சிச் சட்டங்களில் முழுமையான பாதுகாப்பு இல்லை. ஏற்கனவே வாஷிங்டன் போஸ்ட் செய்தியாளர் ஒருவரின் மின்னணு சாதனங்களை எஃப்.பி.ஐ (FBI) பறிமுதல் செய்துள்ள நிலையில், ட்ரம்ப்பின் இந்த எச்சரிக்கை ஊடகவியலாளர்கள் மத்தியில் பெரும் அச்சத்தை ஏற்படுத்தியுள்ளது.
தற்போதைய நிலை: எந்த ஊடக நிறுவனம் என ட்ரம்ப் பெயர் குறிப்பிடவில்லை என்றாலும், CBS News தான் இந்தத் தகவலை முதலில் வெளியிட்டதாகத் தெரிகிறது. ஒரு விமானியின் உயிர் ஊசலாடிக்கொண்டிருக்கும் வேளையில் இத்தகைய தகவல்கள் கசிந்தது துரதிர்ஷ்டவசமானது என ட்ரம்ப் தரப்பு வாதிடுகிறது
