ஈரானிய வெளியுறவு அமைச்சரின் அறிக்கையைதனது சமூக ஊடகத்தில் பதிவுசெய்தார் டிரம்ப்

ஈரான் மீதான போர் மேகங்கள் தற்காலிகமாக விலகியுள்ள நிலையில், ஈரானிய வெளியுறவு அமைச்சர் செய்யது அப்பாஸ் அராக்சியின் அதிகாரப்பூர்வ அறிக்கையை  டொனால்ட் டிரம்ப் தனது ‘ட்ரூத் சோஷியல்’ (Truth Social) தளத்தில் எவ்வித மறுப்புமின்றிப் பகிர்ந்துள்ளார்.

அறிக்கையின் முக்கிய அம்சங்கள்:

• இரு வார போர்நிறுத்தம்: ஈரானின் மீதான தாக்குதல்கள் நிறுத்தப்பட்டால், ஈரானியப் படைகளும் தங்களது தற்காப்பு நடவடிக்கைகளை நிறுத்தும் என அந்த அறிக்கை உறுதிப்படுத்துகிறது. இதன்படி, இரண்டு வார காலத்திற்குப் போர்நிறுத்தம் அமுலுக்கு வரும்.

• நீரிணை திறப்பு: இந்த இரண்டு வார காலப்பகுதியில், ஹோர்முஸ் நீரிணை ஊடாகப் பாதுகாப்பான கப்பல் போக்குவரத்து அனுமதிக்கப்படும்.

• ஈரானின் ஒருங்கிணைப்பு: கப்பல்கள் செல்வதற்கு ஈரானிய ஆயுதப் படைகளுடன் ஒருங்கிணைப்பு (Coordination) செய்யப்பட வேண்டும் என்றும், தொழில்நுட்பக் கட்டுப்பாடுகளைக் கருத்திற்கொண்டு இந்த அனுமதி வழங்கப்படும் என்றும் குறிப்பிடப்பட்டுள்ளது.

டிரம்பின் அமைதி:

வழக்கமாகத் தனது சமூக ஊடகப் பதிவுகளில் கடுமையான விமர்சனங்களை முன்வைக்கும்  டிரம்ப், இம்முறை ஈரானிய அமைச்சரின் அறிக்கையை எவ்விதக் கருத்தோ அல்லது எதிர்ப்போ தெரிவிக்காமல் அப்படியே பகிர்ந்துள்ளார். இது, பாகிஸ்தான் முன்னெடுத்த அமைதிப் பேச்சுவார்த்தையில் இரு நாடுகளுக்கும் இடையே ஒருமித்த கருத்து ஏற்பட்டுள்ளதைக் காட்டுவதாக அரசியல் ஆய்வாளர்கள் கருதுகின்றனர்.

தற்போதைய நிலை:

அமெரிக்கா தனது தாக்குதல் திட்டத்தைத் தற்காலிகமாக ஒத்திவைத்துள்ள நிலையில், ஹோர்முஸ் நீரிணை வழியாக மீண்டும் எண்ணெய் விநியோகம் ஆரம்பமாவது உலகப் பொருளாதாரத்திற்குப் பெரும் நிம்மதியை அளித்துள்ளது. எனினும், “ஈரானின் ஒருங்கிணைப்புடன்” என்ற நிபந்தனை வரும் நாட்களில் எத்தகைய தாக்கத்தை ஏற்படுத்தும் என்பதைப் பொறுத்திருந்துதான் பார்க்க வேண்டும்.