அமெரிக்கா – ஈரான் – பாகிஸ்தான் இடையிலான நேரடி அமைதிப் பேச்சுவார்த்தை 15 மணித்தியாலங்களைக் கடந்து நீடிப்பு

துணை ஜனாதிபதிவான்ஸ் தலைமையில் இஸ்லாமாபாத்தில் சனிக்கிழமை தொடங்கிய அமெரிக்க, ஈரானிய மற்றும் பாகிஸ்தானிய தூதுக்குழுக்களுக்கு இடையிலான நேரடி அமைதிப் பேச்சுவார்த்தை 15 மணித்தியாலங்களுக்கும் மேலாக நீடித்து வருகிறது. ஞாயிற்றுக்கிழமை உள்ளூர் நேரப்படி அதிகாலை 5 மணி வரையிலும் இந்தப் பேச்சுவார்த்தைகள் தொடர்ந்ததாக சிபிஎஸ் செய்தி நிறுவனம் அறிந்துள்ளது.

இந்த முத்தரப்பு நேருக்கு நேர் சந்திப்பில், அமெரிக்க தரப்பில் ஜே.டி. வேன்ஸ், டிரம்பின் மருமகன் ஜாரெட் குஷ்னர் மற்றும் சிறப்புத் தூதர் ஸ்டீவ் விட்காஃப் ஆகியோர் பங்கேற்றுள்ளனர். ஈரான் தரப்பில் நாடாளுமன்ற சபாநாயகர் முகமது பாகர் கலிபாப், வெளியுறவுத்துறை அமைச்சர் அப்பாஸ் அராக்ச்சி மற்றும் பாகிஸ்தானிய உயர் அதிகாரி ஒருவரும் பேச்சுவார்த்தையில் ஈடுபட்டுள்ளனர்.

பேச்சுவார்த்தையின் காலவரிசை:

சனிக்கிழமை மதியம் 12:00 மணி: ஜே.டி. வான்ஸின் வாகனத்தொடரணி பேச்சுவார்த்தை நடைபெறும் இடத்திற்கு வந்தடைந்தது.
சனிக்கிழமை மதியம் 2:00 மணி: வான்ஸ் மற்றும் பாகிஸ்தானிய தூதுக்குழுவினருக்கு இடையிலான பேச்சுவார்த்தை தொடங்கியது.
சனிக்கிழமை மாலை 5:00 மணி: ஈரானிய அதிகாரிகளுடனான முத்தரப்பு பேச்சுவார்த்தைகள் ஆரம்பமாகின.
ஞாயிறு அதிகாலை 5:00 மணி: பல இடைவேளைகளுடன் பேச்சுவார்த்தை தொடர்ந்து நடைபெற்று வருகிறது.

மியாமி (Miami) செல்வதற்காக வெள்ளை மாளிகையிலிருந்து புறப்பட்ட டொனால்ட் டிரம்ப்பிடம் செய்தியாளர்கள் இது குறித்துக் கேட்டபோது, “எனக்குத் தொடர்ந்து தகவல்கள் வந்தவண்ணம் உள்ளன. நீங்களும் கவனித்திருப்பீர்கள், அவர்கள் பல மணிநேரமாகப் பேச்சுவார்த்தையில் ஈடுபட்டுள்ளனர். என்ன நடக்கிறது என்று பார்ப்போம்” என்று பதிலளித்தார்.