நான் மன்னிப்பை எதிர்பார்க்கவில்லை”: கலிபோர்னியா ஆசிரியரின் குறிப்புகளை அதிகாரிகள் ஆய்வு செய்கின்றனர்

CNN

வெள்ளை மாளிகை செய்தியாளர்கள் சங்க விருந்து நிகழ்ச்சியில் (White House Correspondents’ Association Dinner) துப்பாக்கிச் சூடு நடத்திய சந்தேக நபர் அனுப்பிய செய்திகளை அதிகாரிகள் தற்போது தீவிரமாக ஆராய்ந்து வருகின்றனர். மதிக்கப்படும் ஒரு கலிபோர்னியா ஆசிரியராக இருந்தவர், எதனால் ஒரு கொலையாளியாக மாற முயன்றார் என்பதைப் புரிந்துகொள்ள அவர்கள் முயற்சிக்கின்றனர்.

“யாரையெல்லாம் நான் ஏமாற்றினேனோ அவர்களிடமெல்லாம் மன்னிப்புக் கேட்டுக்கொள்கிறேன்” என்று தொடங்கும் ஒரு குறிப்பை, சந்தேக நபர் தனது குடும்பத்தினருக்கு அனுப்பியுள்ளார். கலிபோர்னியாவின் டொரன்ஸைச் சேர்ந்த 31 வயதான கோல் தாமஸ் ஆலன் (Cole Tomas Allen) என்பவரே அந்தச் சந்தேக நபர். இவர் பகுதிநேர ஆசிரியராகவும், வீடியோ கேம் உருவாக்குபவராகவும் பணியாற்றியவர்.

தாக்குதலுக்கு முன்னதாக அனுப்பப்பட்ட அந்தக் குறிப்பில், அரசாங்க அதிகாரிகளை இலக்கு வைக்கப் போவதாகவும், தனது அரசியல் ஆத்திரத்தையும் அவர் வெளிப்படுத்தியுள்ளார். அத்துடன், “நான் மன்னிப்பை எதிர்பார்க்கவில்லை” என்றும் அவர் குறிப்பிட்டுள்ளார்.

திட்டமிட்ட பயணம் மற்றும் தாக்குதல் முயற்சி

லாஸ் ஏஞ்சல்ஸில் இடதுசாரி செயல்பாடுகளில் (Left-wing activism) ஆலன் ஈடுபட்டிருந்ததாகவும், துப்பாக்கிகளை வாங்கி தொடர்ந்து பயிற்சி பெற்று வந்ததாகவும் அவரது சகோதரி அதிகாரிகளிடம் தெரிவித்துள்ளார்.

சமீப நாட்களாக, அவரது பேச்சுகள் செயலாக மாறின. லாஸ் ஏஞ்சல்ஸிலிருந்து ரயில் மூலம் சிகாகோ சென்று, அங்கிருந்து வாஷிங்டன் டி.சி.க்கு அவர் வந்துள்ளார். அதிபர் டொனால்ட் டிரம்ப் மற்றும் உயர்மட்ட அதிகாரிகள் பங்கேற்ற விருந்து நிகழ்ச்சி நடைபெற்ற ஹோட்டலில் அவர் தங்கியுள்ளார்.

அவர் .38 ரக கைத்துப்பாக்கி மற்றும் ஒரு ஷாட்கன் (Shotgun) ஆகியவற்றுடன் வந்ததாக அதிகாரிகள் தெரிவித்தனர். தாக்குதலுக்கு முன்னதாக, தன்னை ஒரு “நட்பான கூட்டாட்சி கொலையாளி” (Friendly Federal Assassin) என்று அழைத்துக்கொண்டு, டிரம்ப் எதிர்ப்பு கருத்துக்களை உள்ளடக்கிய செய்தியைத் தனது குடும்பத்தினருக்கு அனுப்பியுள்ளார்.

சனிக்கிழமை இரவு, பாதுகாப்புச் சோதனைகளைத் தாண்டி அவர் உள்ளே நுழைய முயன்றபோது, பாதுகாப்பு அதிகாரிகள் அவரை மடக்கிப் பிடித்தனர். இதில் ஒரு பாதுகாப்பு அதிகாரி காயமடைந்தார். அந்த நேரத்தில் அதிபர் டிரம்ப் மற்றும் பிற தலைவர்கள் பாதுகாப்பான இடத்திற்கு அழைத்துச் செல்லப்பட்டனர்.

யார் இந்த கோல் தாமஸ் ஆலன்?

ஆலனின் பின்னணி மற்றும் சமூக வலைதளப் பதிவுகளை அதிகாரிகள் ஆய்வு செய்து வருகின்றனர். டிரம்ப் இதனை “கிறிஸ்தவ மதத்திற்கு எதிரானது” என்று வர்ணித்துள்ளார்.

• கல்வி: ஆலன் 2013-2017 காலப்பகுதியில் புகழ்பெற்ற கால்டெக் (CalTech) பல்கலைக்கழகத்தில் பயின்றவர். அங்கு மெக்கானிக்கல் இன்ஜினியரிங் பட்டம் பெற்றார். மாணவராக இருந்தபோது, சக்கர நாற்காலிகளுக்கான அவசர பிரேக் முறையை உருவாக்கியதற்காகச் செய்திகளில் இடம்பிடித்தவர்.

• பணி: பட்டம் பெற்ற பிறகு ‘C2 Education’ என்ற கல்வி நிறுவனத்தில் பகுதிநேர ஆசிரியராகப் பணியாற்றினார். 2024 டிசம்பரில் அந்த நிறுவனத்தின் “மாதத்தின் சிறந்த ஆசிரியராக” அவர் தேர்வு செய்யப்பட்டார்.

• வீடியோ கேம்: ‘Bohrdom’ என்ற பெயரில் ஒரு வீடியோ கேமை உருவாக்கி விற்பனை செய்துள்ளார். ‘First Law’ என்ற பெயரில் மற்றொரு கேமை உருவாக்கும் பணியிலும் அவர் ஈடுபட்டிருந்தார்.

• அரசியல்: கடந்த சில ஆண்டுகளில் அவர் அரசியல் ரீதியாகத் தீவிரமடைந்துள்ளார். ‘The Wide Awakes’ என்ற இடதுசாரி அமைப்பில் இணைந்த அவர், 2024 அக்டோபரில் கமலா ஹாரிஸின் பிரச்சாரத்திற்கு $25 நன்கொடை வழங்கியுள்ளார்.

துப்பாக்கிகள் கொள்முதல்

ஆலன் தனது துப்பாக்கிகளைச் சட்டப்பூர்வமாகவே வாங்கியுள்ளார். 2023 அக்டோபரில் ஒரு கைத்துப்பாக்கியையும், 2025 ஆகஸ்டில் ஒரு ஷாட்கன்னையும் அவர் வாங்கியுள்ளார். இரண்டு முறையும் அவரது பின்னணித் தகவல்கள் (Background checks) முறையாகச் சரிபார்க்கப்பட்டுள்ளன.

ஆலனின் ஆவேசமான குறிப்புகள்

குடும்பத்தினருக்கு அவர் அனுப்பிய குறிப்பில் பல அதிர்ச்சிகரமான தகவல்கள் உள்ளன:

“மற்றவர்கள் ஒடுக்கப்படும்போது அமைதியாக இருப்பது கிறிஸ்தவ பண்பு அல்ல; அது ஒடுக்குபவர்களின் குற்றத்திற்குத் துணை போவதாகும்.”

அரசாங்க அதிகாரிகள் மீது தனக்கு இருக்கும் ஆத்திரத்தை அவர் வெளிப்படுத்தியுள்ளார். எதற்கும் துணிந்து தான் வந்திருப்பதாகவும், இலக்கை அடைய யாரை வேண்டுமானாலும் எதிர்கொள்ளத் தயார் என்றும் அவர் எழுதியுள்ளார்.

இந்தச் செய்தியைப் பெற்றவுடன் அவரது சகோதரர் உடனடியாகக் காவல்துறைக்குத் தகவல் தெரிவித்துள்ளார். ஆனால், அதற்குள்ளாகவே ஹோட்டலில் தாக்குதல் முயற்சி நடந்துள்ளது.

தற்போது அவர் மீது கூட்டாட்சி அதிகாரியைத் தாக்கியது மற்றும் ஆபத்தான ஆயுதங்களைப் பயன்படுத்தியது உள்ளிட்ட பல குற்றச்சாட்டுகள் சுமத்தப்பட்டுள்ளன. அவர் அதிகாரிகளுக்கு ஒத்துழைக்க மறுத்து வருவதாகத் தெரிவிக்கப்பட்டுள்ளது.