மத்திய கிழக்கு நெருக்கடி காரணமாக உலகளாவிய ரீதியில் சவால்கள் நிலவிய போதிலும், இலங்கையின் சுற்றுலாத்துறை பின்னடைவுகளைத் தாண்டி முன்னேறி வருவதாக இலங்கை சுற்றுலா ஊக்குவிப்பு பணியகத்தின் (SLTPB) தலைவர் புத்திக ஹேவாவசம் தெரிவித்தார். இலங்கை வர்த்தக சம்மேளனத்தில் (CCC) அண்மையில் நடைபெற்ற ஏப்ரல் மாதக் குழு கூட்டத்தில் அவர் இதனைத் குறிப்பிட்டார்.
இது குறித்து ஹேவாவசம் கூறுகையில்:
“மத்திய கிழக்கு நெருக்கடியினால் சுற்றுலாத்துறை பாதிப்பை எதிர்நோக்கியுள்ளது. 2026 ஆம் ஆண்டின் முற்பகுதியில் சுற்றுலாப் பயணிகளின் வருகை கடந்த ஆண்டை விட சுமார் 20% குறைந்துள்ளது. இருப்பினும், இலங்கை சும்மா இருக்கவில்லை; சுற்றுலாத்துறை தனது கவனத்தை ஆசிய பசிபிக் பிராந்தியத்தை நோக்கி விரைவாக மாற்றியுள்ளது.”
“ஆசிய பசிபிக் சந்தையை மையப்படுத்திய மூலோபாய சந்தைப்படுத்தல் உத்தி காரணமாக, இந்திய சந்தையிலும் ஏனைய ஆசிய பசிபிக் சந்தைகளிலும் 20-30% வளர்ச்சியை நாங்கள் கண்டுள்ளோம்,” என்று அவர் சுட்டிக்காட்டினார்.
நெருக்கடிகளுக்கு மத்தியிலும், ஆசிய பசிபிக் பிராந்திய சுற்றுலாப் பயணிகளுக்கு இலங்கை ஒரு சிறந்த மாற்றீடாக உருவெடுத்துள்ளது. குறிப்பாகப் பொதுவான சுற்றுலாப் பயணிகள் மட்டுமன்றி, திருமண நிகழ்வுகள், மாநாடுகள் மற்றும் கண்காட்சிகள் (MICE) போன்ற விசேட பிரிவுகளுக்காக இந்தியா மற்றும் சீனா போன்ற பெரிய ஆசிய சந்தைகளை இலங்கை இலக்கு வைத்துள்ளது.
மேலும் அவர் தெரிவித்ததாவது:
புதிய சந்தைகள்: துபாய் போன்ற முதலீட்டு மையங்களுக்குச் செல்லும் சுற்றுலாப் பயணிகளை இலங்கைக்கு ஈர்க்கும் முயற்சிகள் ஆரம்பிக்கப்பட்டுள்ளன. அத்துடன் ஆஸ்திரேலியா மற்றும் பசிபிக் சந்தைகளுக்கும் விரிவடைய வாய்ப்புள்ளது.
தங்கும் காலம்: மத்திய கிழக்கு நெருக்கடியால் ஐரோப்பிய சுற்றுலாப் பயணிகள் இலங்கையில் தங்கும் கால அளவு அதிகரித்துள்ளது. எனவே, நீண்ட காலம் தங்கும் சுற்றுலாப் பயணிகளை (Long-stay tourists) ஊக்குவிக்கத் திட்டமிடப்பட்டுள்ளது.
சிறிய மற்றும் நடுத்தர வணிகங்களுக்கு ஆதரவு: சுற்றுலாத் துறையின் விநியோகச் சங்கிலியைத் தொடர்ந்து பேணுவதற்காக, இந்தத் துறையிலுள்ள சிறிய மற்றும் நடுத்தர அளவிலான நிறுவனங்களுக்கு (SMEs) சில சலுகைகளை வழங்க அரசாங்கம் திட்டமிட்டுள்ளது.
அரசாங்கத்தின் ஏனைய நிறுவனங்களுடன் இணைந்து, சுற்றுலாப் பயணிகளை அதிக நாட்கள் தங்க வைப்பதற்கும், இலங்கையின் பல்வேறு சுற்றுலாத் தயாரிப்புகளில் அவர்களை ஈடுபடுத்துவதற்கும் மாற்றுச் சந்தைகளை அடையாளம் கண்டு வருவதாக ஹேவாவசம் மேலும் தெரிவித்தார்.
