கபில சந்திரசேன என்பவர் யார்? ஏர்பஸ் ஊழல் விசாரணைக்கு மத்தியில் சடலமாக மீட்பு

இலங்கையின் மிகப்பெரிய விமான போக்குவரத்து ஊழல் மோசடிகளில் ஒன்று குறித்த விசாரணைகள் நடைபெற்று வரும் நிலையில், ஸ்ரீலங்கன் ஏர்லைன்ஸ் நிறுவனத்தின் முன்னாள் தலைமை நிர்வாக அதிகாரி (CEO) கபில சந்திரசேன, வெள்ளிக்கிழமை (08) கொள்ளுப்பிட்டியிலுள்ள இல்லமொன்றில் சடலமாக மீட்கப்பட்டுள்ளார்.

சந்திரசேன தற்கொலை செய்துகொண்டிருக்கலாம் என சந்தேகிக்கப்படுவதாக பொலிஸ் ஊடகப் பேச்சாளர் ஏ.எஸ்.பி (ASP) எப்.யு. வூட்லர் தெரிவித்துள்ளார். இது குறித்து கொள்ளுப்பிட்டி பொலிஸார் மேலதிக விசாரணைகளை ஆரம்பித்துள்ளனர்.

நீண்டகாலமாக நடைபெற்று வரும் ஏர்பஸ் (Airbus) லஞ்ச ஊழல் வழக்கில், அவருக்கு வழங்கப்பட்ட பிணையை ரத்து செய்ய இலஞ்ச ஊழல் விசாரணை ஆணைக்குழு (CIABOC) எடுத்த முயற்சி உட்பட, புதிய சட்டச் சிக்கல்கள் உருவான சில நாட்களிலேயே இந்த மரணம் நிகழ்ந்துள்ளது.

பொறியியலாளரிலிருந்து விமான நிறுவனத் தலைவர் வரை

கபில சந்திரசேன இலங்கையின் விமான போக்குவரத்து மற்றும் கார்ப்பரேட் துறைகளில் நன்கு அறியப்பட்ட ஒருவராவார். ஒரு பொறியியலாளரான இவர், தேசிய விமான நிறுவனமான ஸ்ரீலங்கன் ஏர்லைன்ஸ் நிறுவனத்தில் சிரேஷ்ட பதவிகளை வகித்த பிறகு அதன் தலைமை நிர்வாக அதிகாரியானார். அத்துடன், ராஜபக்ஷ அரசாங்கத்தின் கீழ் ஆரம்பிக்கப்பட்ட ‘மிஹின் லங்கா’ (Mihin Lanka) பட்ஜெட் விமான நிறுவனத்தின் சிஇஓ-வாகவும் பணியாற்றினார்.

எவ்வாறாயினும், ஸ்ரீலங்கன் ஏர்லைன்ஸ் நிறுவனத்தில் அவர் பதவியில் இருந்த காலத்தில் மேற்கொள்ளப்பட்ட ஏர்பஸ் விமானக் கொள்வனவு ஒப்பந்தமே அவரை சர்வதேச ஊழல் விசாரணையின் மையப்புள்ளியாக மாற்றியது.

ஏர்பஸ் சர்ச்சை என்பது என்ன?

முந்தைய ராஜபக்ஷ அரசாங்கத்தின் போது ஸ்ரீலங்கன் ஏர்லைன்ஸ் மேற்கொண்ட விமானக் கொள்வனவுகள் தொடர்பானதே இந்த ஏர்பஸ் ஊழலாகும்.

விமான ஒப்பந்தங்களைப் பெறுவதற்காக இலங்கை உட்பட பல நாடுகளில் பெருமளவிலான லஞ்சம் வழங்கியதாக விமானத் தயாரிப்பு நிறுவனமான ஏர்பஸ் 2020 இல் பிரித்தானிய நீதிமன்றத்தில் ஒப்புக்கொண்டதையடுத்து, இந்த விவகாரம் சர்வதேச அளவில் சர்ச்சையானது.

சர்வதேச விசாரணைகளின்படி, ஸ்ரீலங்கன் ஏர்லைன்ஸ் விமான கொள்வனவுகள் தொடர்பாக இலங்கையைச் சேர்ந்த இடைத்தரகர் நிறுவனம் ஒன்று மில்லியன் கணக்கான டாலர்களை இரகசியக் கொடுப்பனவுகளாகப் பெற்றுள்ளதாகக் கூறப்படுகிறது. ஏர்பஸ் ஒப்பந்தம் தொடர்பாக சந்திரசேன 2 மில்லியன் அமெரிக்க டாலர் லஞ்சத்தைக் கோரிப் பெற்றதாக இலங்கை புலனாய்வாளர்கள் பின்னர் குற்றம் சுமத்தினர்.

குற்றப் புலனாய்வுத் திணைக்களம் (CID) சட்டமா அதிபர் திணைக்களத்திடம் சமர்ப்பித்த தகவல்களின்படி, பிரியங்கா நியோமாலி விஜேநாயக்கவை ஒரே இயக்குநராகக் கொண்ட ‘பிஸ் சொல்யூஷன்ஸ்’ (Biz Solutions) என்ற நிறுவனத்தால் சிங்கப்பூரில் பராமரிக்கப்பட்ட ஸ்டாண்டர்ட் சார்ட்டட் வங்கி கணக்கிற்கு, 2013 டிசம்பரில் ஏர்பஸ் நிறுவனத்தின் தாய் நிறுவனமான EADS N.V. இடமிருந்து 2 மில்லியன் அமெரிக்க டாலர் பணம் வந்துள்ளது.

இந்த நிதி (சுமார் ரூ. 363 மில்லியன்) ஸ்ரீலங்கன் ஏர்லைன்ஸ் விமானக் கொள்வனவு ஒப்பந்தத்துடன் தொடர்புடையது என புலனாய்வாளர்கள் குற்றம் சுமத்தினர். சந்திரசேன 2020 இல் முதன்முதலில் கைது செய்யப்பட்டு பின்னர் பிணையில் விடுவிக்கப்பட்டார். இந்த ஆண்டு தொடக்கத்தில், அதிக விலைக்கு விமானங்கள் வாங்கப்படுவதை உறுதி செய்ததற்காக லஞ்சம் பெற்ற குற்றச்சாட்டில் அவர் மீண்டும் கைது செய்யப்பட்டார்.

அமெரிக்கத் தடைகள் மற்றும் ஊழல் குற்றச்சாட்டு

சந்திரசேன மீது அமெரிக்கா 2023 இல் பொருளாதார மற்றும் விசா தடைகளை விதித்தபோது இந்த வழக்கு சர்வதேச கவனத்தைப் பெற்றது. ஸ்ரீலங்கன் ஏர்லைன்ஸ் சிஇஓ-வாக இருந்தபோது லஞ்சம் பெற்ற “பாரிய ஊழல்” குற்றச்சாட்டுக்காக அமெரிக்க இராஜாங்கத் திணைக்களம் அவரை தடைப் பட்டியலில் சேர்த்தது. இந்தத் தடைகள் அவரது குடும்ப உறுப்பினர்களுக்கும் விதிக்கப்பட்டது.

அரசியல் பிரமுகர்கள் மீதான குற்றச்சாட்டுகள்

ஏர்பஸ் ஒப்பந்தம் மூலம் பெறப்பட்ட நிதியில் ஒரு பகுதி சிரேஷ்ட அரசியல் பிரமுகர்களுக்கு விநியோகிக்கப்பட்டதாக சந்திரசேன கூறியதாக இலஞ்ச ஊழல் ஆணைக்குழு மார்ச் மாதம் நீதிமன்றத்தில் தெரிவித்ததையடுத்து விசாரணை தீவிரமடைந்தது.

அவரது வாக்குமூலத்தின்படி:

• முன்னாள் ஜனாதிபதி மஹிந்த ராஜபக்ஷவுக்கு மூன்று சந்தர்ப்பங்களில் 60 மில்லியன் ரூபாய் வழங்கப்பட்டது.

• முன்னாள் சிவில் விமானப் போக்குவரத்து அமைச்சர் பிரியங்கர ஜயரத்னவுக்கு 20 மில்லியன் ரூபாய் வழங்கப்பட்டது.

இந்தத் தகவல்களைத் தொடர்ந்து, மே 12ஆம் திகதி வாக்குமூலம் அளிக்குமாறு மஹிந்த ராஜபக்ஷ மற்றும் பிரியங்கர ஜயரத்ன ஆகியோருக்கு அழைப்பு விடுக்கப்பட்டது. எவ்வாறாயினும், பின்னர் தனது சட்டத்தரணிகள் ஊடாக வெளியிட்ட பிரமாணப் பத்திரத்தில் (Affidavit) சந்திரசேன அந்த குற்றச்சாட்டுகளைத் திரும்பப் பெற்றார். அச்சுறுத்தல் மற்றும் அழுத்தத்தின் கீழேயே அந்த வாக்குமூலம் பெறப்பட்டதாக அவர் அதில் குறிப்பிட்டிருந்தார்.

கைது  மற்றும் விரிவடையும் விசாரணை

இந்த விசாரணையின் ஒரு பகுதியாக:

• முன்னாள் அமைச்சர் சமல் ராஜபக்ஷவின் மகனும், ஸ்ரீலங்கன் ஏர்லைன்ஸ் முன்னாள் பணிப்பாளர் சபை உறுப்பினருமான ஷமிந்திர ராஜபக்ஷ.

• பிரியங்கா நியோமாலி விஜேநாயக்க. ஆகியோருக்கு எதிராக கொழும்பு நீதவான் நீதிமன்றம் திறந்த பிடிவிறாந்து உத்தரவுகளை பிறப்பித்தது.

மரணத்திற்கு சில நாட்களுக்கு முன் பிணை சர்ச்சை

சந்திரசேன மரணிப்பதற்கு சில நாட்களுக்கு முன்பு, அவர் பிணையில் விடுவிக்கப்பட்ட விவகாரத்தில் மற்றொரு சர்ச்சை ஏற்பட்டது. தலா 15,000 ரூபாயைப் பெற்றுக்கொண்டு சந்திரசேனவுக்காக நீதிமன்றத்தில் போலிப் பிணையாளராகத் தோன்றிய இருவர் கைது செய்யப்பட்டனர்.

இதனையடுத்து சந்திரசேனவின் பிணையை ரத்து செய்ய இலஞ்ச ஊழல் ஆணைக்குழு நடவடிக்கை எடுத்ததுடன், அவரை மீண்டும் கைது செய்து நீதிமன்றத்தில் முன்னிலைப்படுத்துமாறு கொழும்பு நீதவான் நீதிமன்றம் உத்தரவிட்டது. இந்த நிலையிலேயே, அவர் வெள்ளிக்கிழமை சடலமாக மீட்கப்பட்டுள்ளார்.