வடமாகாண சபையில் வெற்றிகரமாக நடைமுறைப்படுத்தப்பட்டு வரும் டிஜிட்டல் மயமாக்கல் திட்டங்கள் மற்றும் நவீன சேவை வழங்கல் முறைகளை நேரில் ஆராய்ந்து, அவற்றை ஊவா மாகாணத்திலும் செயல்படுத்துவதை நோக்கமாகக் கொண்டு, ஊவா மாகாண சபையின் சிரேஷ்ட தர உத்தியோகத்தர்கள் குழுவினர் வடமாகாண சபைக்கு உத்தியோகபூர்வ விஜயமொன்றை மேற்கொண்டனர்.
ஊவா மாகாண சபையின் அமைச்சுகளின் செயலாளர்கள், பிரதி பிரதம செயலாளர்கள் மற்றும் திணைக்களத் தலைவர்கள் உட்பட 25 சிரேஷ்ட நிறைவேற்று அதிகாரிகள் அடங்கிய குழுவினரே இவ்வாறு வடமாகாண சபைக்கு வருகை தந்திருந்தனர்.
வடமாகாண பிரதம செயலாளர் செயலக கேட்போர் கூடத்தில் இரு மாகாண அதிகாரிகளுக்கும் இடையிலான விசேட கலந்துரையாடல் ஒன்று நடைபெற்றது. இக்கலந்துரையாடலில், வடமாகாண சபை அமைச்சுகள் மற்றும் திணைக்களங்களில் தற்போது பயன்பாட்டில் உள்ள டிஜிட்டல் மயமாக்கல் செயற்பாடுகள் குறித்தும், கிடைக்கக்கூடிய வளங்களை மிகச் சிறந்த முறையில் பயன்படுத்தி நிறுவன ரீதியாக அடைந்துள்ள இலக்குகள் மற்றும் சாதனைகள் குறித்தும் விரிவான விளக்கக்காட்சிகள் மூலம் தெளிவுபடுத்தப்பட்டது.
இந்தக் கலந்துரையாடலில் வடமாகாண சபை சார்பில் பிரதிப் பிரதம செயலாளர்கள், திணைக்களத் தலைவர்கள், கணக்காளர்கள் மற்றும் துறைசார் உயர் அதிகாரிகள் எனப் பலரும் கலந்துகொண்டு தமது அனுபவங்களைப் பகிர்ந்துகொண்டனர்.
மாகாணங்களுக்கு இடையிலான இந்த பரஸ்பர அறிவுப் பகிர்வானது, நவீன தொழில்நுட்ப உத்திகளைப் பயன்படுத்தி இரு மாகாணங்களினதும் பொதுச் சேவைத் திறனை மேலும் வலுப்படுத்துவதற்கும், பொதுமக்களுக்கான சேவைகளை விரைவாகவும் வெளிப்படைத்தன்மையுடனும் வழங்குவதற்கும் பெரிதும் உதவும் என இக்கூட்டத்தில் சுட்டிக்காட்டப்பட்டது
