துபாய்:
நீண்ட தூரப் பயணங்களை மேற்கொள்ளும் எகனாமி கிளாஸ் (Economy Class) பயணிகளின் பயண அனுபவத்தை மேம்படுத்தும் வகையில், உலகின் முதலாவது விசேட ‘யு-டிரீம் ஹெட்ரெஸ்ட்’ (U-Dream Headrest) தொழில்நுட்பத்தை எமிரேட்ஸ் (Emirates) விமான நிறுவனம் அறிமுகப்படுத்தியுள்ளது.
தனது விமானப் படைகளில் இந்த புதிய தலையணை/தலைசாய்க்கும் வசதியை நிறுவும் பணிகளை எமிரேட்ஸ் நிறுவனம் ஏற்கனவே தொடங்கியுள்ளது.
‘சஃப்ரான் சீட்ஸ்’ (Safran Seats) நிறுவனத்தின் Z400 எகனாமி ஆசன வடிவமைப்பின் ஒரு பகுதியாக உருவாக்கப்பட்டுள்ள இந்த ‘U-Dream Headrest’, பல கோணங்களில் சரிசெய்யக்கூடிய தோலினால் (Leather) ஆன வசதியைக் கொண்டுள்ளது. இதன் பக்கவாட்டு இறக்கைகளை உட்புறமாக வளைத்து, கழுத்து மற்றும் தலைப் பகுதிக்கு ஏற்ப மாற்றி அமைத்துக் கொள்ள முடியும். மேலும், பயணிகளின் உடலமைப்பிற்கு ஏற்ப இதன் உயரம் மற்றும் சாய்வு கோணத்தையும் தனிப்பயனாக்கிக் கொள்ள முடியும் என்பதால், கழுத்துவலி இன்றி சுகமாக உறங்க இது வழிவகுக்கிறது.
இந்தத் தொழில்நுட்பத்தை உலகில் முதன்முறையாக அறிமுகப்படுத்தும் விமான நிறுவனமாக எமிரேட்ஸ் திகழ்கிறது. இந்த ‘U-Dream’ தலைசாய்க்கும் வசதியானது, ஐரோப்பிய ஒன்றிய வான்வழி பாதுகாப்பு முகமையின் (EASA) பாதுகாப்புத் தரநிலைகளுக்கு அமைவாக சுயாதீனமாகப் பரிசோதிக்கப்பட்டு சான்றளிக்கப்பட்டுள்ளது.
இது குறித்து எமிரேட்ஸ் விமான நிறுவனத்தின் தலைவர் சர் டிம் கிளார்க் (Sir Tim Clark) கருத்து தெரிவிக்கையில்,
“வாடிக்கையாளர் சேவையைப் பொறுத்தவரையில் எமிரேட்ஸ் நிறுவனம் ஒருபோதும் சமரசம் செய்துகொள்வதில்லை. குறிப்பாக நீண்ட தூரப் பயணம் மேற்கொள்ளும் எகனாமி கிளாஸ் பயணிகளின் சௌகரியத்தை கணிசமாக உயர்த்தும் ஒரு வழியை நாங்கள் கண்டறிந்துள்ளோம். இந்த U-Dream தலைசாய்க்கும் வசதியானது, கழுத்திற்கு முழுமையான ஆதரவை வழங்குவதன் மூலம் தூக்கத்திற்கான சிறந்த சூழலை உருவாக்குகிறது. இனி பயணிகளுக்கு தனியாக ‘நெக் பில்லோ’ (Neck Pillow) தேவைப்படாது. இது எங்கள் வாடிக்கையாளர்களுக்கான அர்ப்பணிப்பைக் காட்டுவதுடன், எங்களது எகனாமி கிளாஸ் சேவையை மிகச்சிறந்ததாக மீண்டும் உறுதிப்படுத்துகிறது,”
எனக் கூறினார்.
தற்போது எமிரேட்ஸ் நிறுவனத்தின் மூன்று ஏர்பஸ் A350 (Airbus A350) விமானங்களில் இந்த வசதி ஏற்கனவே உள்ளமைக்கப்பட்டுள்ளதுடன், இந்த ஆண்டின் இறுதிக்குள் அனைத்து A350 விமானங்களிலும் இது நிறுவப்படவுள்ளது. மேலும், புதிதாக ஆர்டர் செய்யப்பட்டுள்ள 270 போயிங் 777X (Boeing 777X) விமானங்களிலும் இது நேரடியாகப் பொருத்தப்பட்டு வெளிவரவுள்ளது. அதனைத் தொடர்ந்து 2027 ஆம் ஆண்டு முதல், பயன்பாட்டிலுள்ள ஏர்பஸ் A380 மற்றும் போயிங் 777 விமானங்களிலும் இந்த U-Dream வசதி மேம்படுத்தப்படவுள்ளது.
எளிதில் சரிசெய்யும் வகையிலும், தூய்மைப்படுத்தும் வகையிலும் வடிவமைக்கப்பட்டுள்ள இந்த லெதர் ஹெட்ரெஸ்ட், ஒவ்வொரு விமானப் பயணத்திற்குப் பிறகும் கிருமி நீக்கம் (Sanitised) செய்யப்படுவதுடன், இதனைப் பயன்படுத்துவது குறித்து பயணிகளுக்கு உதவ விமானப் பணிப்பெண்களுக்குப் பயிற்சியும் அளிக்கப்பட்டுள்ளது.
