மழை பெய்யாவிட்டாலும் கூடத் தொடர்ச்சியாக மூன்று மாதங்களுக்குத் தடையற்ற குடிநீர் விநியோகத்தை வழங்க முடியும் என வீடமைப்பு, நிர்மாணத்துறை மற்றும் நீர்வழங்கல் அமைச்சர் டொக்டர் சுசில் ரணசிங்க தெரிவித்துள்ளார்.
லபுகம நீர்த்தேக்கத்திற்கு மேற்கொண்ட அவதானிப்பு விஜயத்தின் போதே அமைச்சர் இந்தக் கருத்துக்களைத் தெரிவித்தார்.
கணிக்கப்பட்டுள்ள ‘எல் நினோ’ (El Niño) காலநிலை மாற்றத்தின் சாத்தியமான தாக்கங்களைக் குறைப்பதற்கான நடவடிக்கைகள் ஏற்கனவே அமல்படுத்தப்பட்டுள்ளதாக வீடமைப்பு, நிர்மாணத்துறை மற்றும் நீர்வழங்கல் அமைச்சர் டொக்டர் சுசில் ரணசிங்க கூறினார்.
தற்போதுள்ள நீர் வளங்களைச் சரியாக நிர்வகிப்பதன் மூலம் ஆகஸ்ட் மற்றும் செப்டம்பர் மாதங்களில் தடையற்ற நீர் விநியோகத்தை உறுதி செய்வதே முக்கிய சவாலாக உள்ளது என அவர் குறிப்பிட்டார்.
தேசிய நீர் வழங்கல் மற்றும் வடிகாலமைப்புச் சபையின் நிபுணர்களின் தரவு பகுப்பாய்வு மற்றும் மதிப்பீடுகளின்படி, இக்காலப்பகுதியில் மழை பெய்யாவிட்டாலும் கூட, லபுகம மற்றும் கலடுவாவ நீர்த்தேக்கங்களின் தற்போதைய நீர் மட்டம் மூன்று மாதங்களுக்குத் தடையற்ற விநியோகத்தைப் பேணப் போதுமானதாக உள்ளது என்று அமைச்சர் கூறினார்.
மேல் மாகாணத்திற்கான நீர் விநியோக நடவடிக்கைகள் களனி கங்கை, களு கங்கை மற்றும் லபுகம – கலடுவாவ நீர்த்தேக்கங்கள் ஆகிய மூன்று முக்கிய ஆதாரங்களை நம்பியே அமைந்துள்ளதாகவும், தற்போதைய நீர் கொள்ளளவின் அடிப்படையில் அடுத்த இரண்டு மாதங்களுக்கு எந்தவித ஆபத்தும் எதிர்பார்க்கப்படவில்லை என்றும் அவர் மேலும் தெரிவித்தார்.
