ஐரோப்பிய ஒன்றியத்தின் (EU) திருத்தப்பட்ட GSP+ வரிச்சலுகைத் திட்டத்திற்கு மீண்டும் விண்ணப்பிப்பதற்கான ஆயத்தங்கள் ஆரம்பமாகியுள்ள நிலையில், இலங்கையின் ஆடைத் தொழிற்துறை ஒரு முக்கியமான காலகட்டத்தை எதிர்கொண்டுள்ளது. கடுமையான தேவைகளைப் பூர்த்தி செய்யத் தவறினால், நாட்டின் மிக முக்கியமான ஏற்றுமதிச் சலுகைகளில் ஒன்று ஆபத்துக்குள்ளாகலாம் என தொழிற்துறைத் தலைவர்கள் எச்சரிக்கின்றனர்.
2017 ஆம் ஆண்டில் இச்சலுகை மீண்டும் வழங்கப்பட்டதைத் தொடர்ந்து தொழிற்துறையின் திறனானது, இலங்கைப் பொருளாதாரத்திற்கு GSP+ திட்டத்தின் முக்கியத்துவத்தை உணர்த்துகிறது. 2018 ஆம் ஆண்டில் முதன்முறையாக ஆடை ஏற்றுமதி 5 பில்லியன் டொலர்களைத் தாண்டியதுடன், 350,000 க்கும் மேற்பட்ட மக்களுக்கு வேலைவாய்ப்பை வழங்கி, மொத்த ஏற்றுமதியில் சுமார் 40-45% பங்களிப்பையும், மொத்த உள்நாட்டு உற்பத்தியில் (GDP) தோராயமாக 6-7% பங்களிப்பையும் வழங்கி, நாட்டின் மிகப்பெரிய ஏற்றுமதி வருவாய் ஈட்டும் துறையாக இது விளங்கி வருகிறது.
22 மே 2026 அன்று ஐரோப்பிய ஒன்றியத்தின் திருத்தப்பட்ட GSP ஒழுங்குமுறை ஏற்றுக்கொள்ளப்பட்டதைத் தொடர்ந்து இதன் அவசரத்தன்மை அதிகரித்துள்ளது. 2027 ஜனவரி 1 முதல், இச்சலுகையைப் பெறும் நாடுகள் மனித உரிமைகள், தொழிலாளர் தரநிலைகள், சுற்றாடல் பாதுகாப்பு, நல்ஆளுமை, மாற்றுத்திறனாளிகள் உரிமைகள், சிறுவர் பாதுகாப்பு, தொழிலாளர் ஆய்வு, பாரிஸ் ஒப்பந்தம் மற்றும் ஒழுங்கமைக்கப்பட்ட குற்றங்கள் ஆகியவற்றை உள்ளடக்கிய விரிவாக்கப்பட்ட கடப்பாடுகளுக்குக் கட்டுப்பட வேண்டும். இந்த புதிய கட்டமைப்பு விரைவான சலுகை விலக்கிக் கொள்ளல் பொறிமுறையையும் அறிமுகப்படுத்துவதுடன், மறுஆய்வுச் சுழற்சியை இரண்டு ஆண்டுகளில் இருந்து மூன்று ஆண்டுகளாக உயர்த்துகிறது.
தற்போதைய GSP+ சலுகைகள் 2028 ஆம் ஆண்டின் இறுதி வரை அமலில் இருக்கும் என்றாலும், இலங்கை 2027 ஆம் ஆண்டிற்குள் திருத்தப்பட்ட திட்டத்தின் கீழ் முறைப்படி மீண்டும் விண்ணப்பிக்க வேண்டும். இந்தச் செயல்முறையின் ஒரு பகுதியாக, வெறும் கொள்கை சார்ந்த வாக்குறுதிகளை மட்டும் வழங்காமல், நடைமுறைப்படுத்தப்பட்டதற்கான சான்றுகளுடன் மேம்படுத்தப்பட்ட நிபந்தனைகளை எவ்வாறு பூர்த்தி செய்யும் என்பதைக் காட்டும் விரிவான செயல்பாட்டுத் திட்டத்தை அரசாங்கம் சமர்ப்பிக்க வேண்டும்.
ஒழுங்குமுறை இணக்கப்பாட்டுடன் (Regulatory compliance) சேர்த்து, இத்துறை நீண்டகால வணிக ரீதியான சவால் ஒன்றையும் எதிர்கொள்கிறது. சமீபத்திய ஆண்டுகளில் இலங்கையின் GSP+ சலுகைப் பயன்பாட்டு விகிதம் 49% முதல் 59% வரையே உள்ளது; அதாவது தகுதியுள்ள ஏற்றுமதிகளில் கணிசமான பகுதி முன்னுரிமை அணுகலைப் பெறத் தவறுகிறது. ஐரோப்பிய ஒன்றியத்தின் மூல விதிகள் (Rules of origin) ஆடைகள் உள்நாட்டில் உற்பத்தி செய்யப்பட்ட நூல்களைப் பயன்படுத்தி தயாரிக்கப்பட வேண்டும் எனக் கட்டுப்பாடு விதிக்கின்றன; ஆனால் தேவையைப் பூர்த்தி செய்ய நாட்டின் உள்நாட்டுத் துணி உற்பத்தித் திறன் போதுமானதாக இல்லை என்பதே இதற்கான முக்கியத் தடையாகும்.
உள்நாட்டு ஆடைத் உற்பத்தியில் அதிக முதலீடு செய்தல், பிராந்திய கூட்டு ஒப்பந்தங்கள் (Regional cumulation agreements) மற்றும் மூல விதிகள் தொடர்பாக ஐரோப்பிய ஒன்றியத்துடன் பேச்சுவார்த்தை நடத்துதல் ஆகியவை பயன்பாட்டு விகிதங்களை கணிசமாக மேம்படுத்தி, தொழிற்துறையின் போட்டித்தன்மையை பலப்படுத்தும் என இத்துறை அவதானிகள் வாதிடுகின்றனர்.
இலங்கையின் சமீபத்திய பொருளாதார முன்னேற்றத்தால் இதன் காலநேரம் மேலும் சிக்கலாகியுள்ளது. ஜூலை 2026 இல், உலக வங்கி இலங்கையைத் தலா மொத்த தேசிய வருமானம் 4,670 அமெரிக்க டொலர்களைக் கொண்ட மேல்-நடுத்தர வருவாய் கொண்ட பொருளாதாரமாக (Upper-middle-income economy) மறுவகைப்படுத்தியது, இது தகுதி வரம்பை விட சற்று அதிகமாகும். இது ஒரு முக்கியமான மைல்கல்லாகக் கருதப்பட்டாலும், தொடர்ச்சியாக மூன்று ஆண்டுகளுக்கு மேல்-நடுத்தர வருமான நிலையப் பேணுவது இறுதியில் இலங்கையை GSP+ சலுகையைப் பெறுவதற்குத் தகுதியற்றதாக்கும்.
இதுவே நாட்டின் விண்ணப்பத்திற்கான காலநேரத்தை மிகவும் முக்கியமானதாக மாற்றுகிறது. 2027 இல் முன்னதாகவே விண்ணப்பிப்பது, திட்டத்திற்கான தொடர்ச்சியான அணுகலைப் பாதுகாக்கவும் ஒரு மாற்றக் காலத்தை (Transition period) அனுமதிக்கவும் உதவும்; அதேநேரம் 2028 இன் பிற்பகுதி வரை தாமதிப்பது, புதுப்பித்தல் உறுதியாகாவிட்டால் 2029 இன் நடுப்பகுதியில் இருந்து ஏற்றுமதிகள் மீண்டும் சாதாரண ‘மிகவும் விரும்பப்படும் தேச’ (MFN) வரிகளுக்குத் திரும்பும் அபாயத்தை அதிகரிக்கும்.
கட்டமைப்பு சீர்திருத்தங்களை விரைவுபடுத்துமாறு ஐரோப்பிய ஒன்றியமும் இலங்கையை வலியுறுத்தியுள்ளது. இலங்கை-ஜெர்மன் வர்த்தக மன்றத்தில் அண்மையில் உரையாற்றிய ஐரோப்பிய ஒன்றிய தூதுவர் கார்மன் மொரேனோ, இலங்கை GSP+ சலுகையை முழுமையாகப் பயன்படுத்திக் கொள்ளவில்லை என்று குறிப்பிட்டதுடன், உற்பத்தித் துறை இன்னும் மொத்த உள்நாட்டு உற்பத்தியில் கால் பகுதியை மட்டுமே பிரதிநிதித்துவப்படுத்துகிறது என்றும், மறுவிண்ணப்பச் செயல்முறைக்கு முன்னர் அதிக தொழில்மயமாக்கல், முதலீடு மற்றும் சீர்திருத்தங்களுக்கு அழைப்பு விடுத்தார்.
அடையாளம் காணப்பட்ட முன்னுரிமைகளில், பயங்கரவாதத் தடைச் சட்டத்திற்குப் பதிலாக சர்வதேசத் தரங்களைச் சந்திக்கும் சட்டத்தைக் கொண்டுவருதல், மனித உரிமைகள், தொழிலாளர், சுற்றாடல் பாதுகாப்பு, காலநிலை மற்றும் நல்ஆளுமை தொடர்பான ஐரோப்பிய ஒன்றியத்தின் கவலைகளுக்குத் தீர்வுகாணுதல் மற்றும் சட்டவிரோத போதைப்பொருட்கள் மற்றும் சட்டவிரோத மீன்பிடித்தலை எதிர்ப்பதற்கான நடவடிக்கைகளை வலுப்படுத்துதல் ஆகியவை அடங்கும்.
