ஞானசாரதேரருக்கு பொதுமன்னிப்பு வழங்கப்போவதில்லை என திட்டவட்டமாக தெரிவித்துள்ள ஜனாதிபதி அனுரகுமாரதிசநாயக்க தனது அரசாங்கம் உயர்நீதிமன்ற தீர்ப்பை மதிக்கும் நீதித்துறை செயற்பாடுகளில் தலையிடாது என குறிப்பிட்டுள்ளார்.
பதுளையில் இடம்பெற்ற கட்சியின் மக்கள் கூட்டத்தில் உரையாற்றிய ஜனாதிபதி மேலும் தெரிவித்துள்ளதாவது
அரசாங்கம் நீதித்துறையின் தீர்ப்பினை மதிக்கும்,நீதித்துறை தீர்ப்பை ஜனாதிபதி மாற்றியமைப்பார் என எவரும் எதிர்பார்க்க கூடாது.
சட்டங்களை இயற்றுவது நாடாளுமன்றம் அதேவேளை பொலிஸார் குற்றப்புலனாய்வு திணைக்களம் இலஞ்ச ஊழல் விசாரணை ஆணைக்குழு போன்றவை விசாரணை செய்து சட்டத்தினை நடைமுறைப்படுத்துவதற்கு பொறுப்பு.
ஆனால் சட்டத்தை சரியாக அர்த்தப்படுத்தி அதனை நடைமுறைப்படுத்தும் பொறுப்பு நீதித்துறையிடம் உள்ளது குறிப்பாக உயர்நீதிமன்றத்திடம்.
நீதிமன்றம் தீர்ப்பு வழங்கியதும் சிலர் கூச்சலிட ஆரம்பிக்கின்றனர் அந்த சட்டங்களை அகற்றவேண்டும் என்கின்றனர்.நாங்கள் நீதிமன்றத்தின் தீர்ப்பிற்கு கட்டுப்படுவோம் எவரும் எங்களிடமிருந்து தீர்மானங்களை எதிர்பார்க்க கூடாது என அவர் தெரிவித்துள்ளார்.
