வெளிநாடுகளில் உள்ள பயங்கரவாதக் குழுக்களில் மக்கள் இணைவதைத் தடுக்கும் புதிய சட்டத்தை நோக்கி இலங்கை -சிறீதரன் எம்பி கடும் எதிர்ப்பு
நவம்பர் 14, 2026 | காலை 8:39
பயங்கரவாதக் குழுக்களில் இணைவதற்காக அல்லது பயங்கரவாத நடவடிக்கைகளில் பங்கேற்பதற்காக நபர்கள் வெளிநாடுகளுக்குச் செல்வதைத் தடுக்கும் நோக்கில் புதிய சட்டமொன்றை கொண்டுவருவதற்கான தீவிர நடவடிக்கைகளை இலங்கை அரசாங்கம் ஆரம்பித்துள்ளது.
‘வெளிநாட்டுப் பயங்கரவாதப் போராளிகளைத் தடுத்தல் சட்டமூலத்திற்கு’ (Prevention of Foreign Terrorist Fighters Bill) பொருளாதார அபிவிருத்தி மற்றும் சர்வதேச உறவுகள் பற்றிய பாராளுமன்றத் துறைசார் மேற்பார்வைக் குழுவின் (Sectoral Oversight Committee) அங்கீகாரம் கிடைத்துள்ளது.
பாராளுமன்ற உறுப்பினர் லக்மாலி ஹேமச்சந்திர தலைமையில் அண்மையில் நடைபெற்ற குழுக் கூட்டத்தில் விரிவான கலந்துரையாடலின் பின்னர் இந்தச் சட்டமூலம் அங்கீகரிக்கப்பட்டது.
பாராளுமன்றத் தகவல்களின்படி, வெளிநாட்டுப் பயங்கரவாதப் போராளிகளால் ஏற்படும் அச்சுறுத்தல்களைத் தடுப்பதற்கும் அடக்குவதற்கும் 2014 செப்டம்பரில் நிறைவேற்றப்பட்ட ஐக்கிய நாடுகள் பாதுகாப்புச் சபையின் 2178ஆவது தீர்மானத்தை (UN Security Council Resolution 2178) நடைமுறைப்படுத்துவதே இந்த முன்மொழியப்பட்ட சட்டத்தின் நோக்கமாகும்.
பயங்கரவாத நடவடிக்கைகளில் ஈடுபடுதல், திட்டமிடுதல், தயாராதல் அல்லது பங்கேற்பது, அத்துடன் பயங்கரவாதப் பயிற்சிகளை வழங்குதல் அல்லது பெறுதல் உள்ளிட்ட பயங்கரவாதம் தொடர்பான பல குற்றங்களை இந்தப் புதிய சட்டம் உள்ளடக்கும் என அதிகாரிகள் விளக்கமளித்துள்ளனர்.
மேலும், முன்மொழியப்பட்ட சட்டத்தில் குறிப்பிடப்பட்டுள்ள நிபந்தனைகளுக்கு உட்பட்டு, இலங்கைப் பிரஜைகள் அல்லது வெளிநாட்டவர்களால் வெளிநாடுகளில் மேற்கொள்ளப்படும் சில பயங்கரவாதம் தொடர்பான குற்றங்களுக்காக இலங்கையில் சட்ட நடவடிக்கை எடுப்பதற்கும் இந்தச் சட்டம் அனுமதிக்கும்.
இன அடிப்படையில் வெளிநாடுகளில் வாழும் இலங்கையர்களை இலக்கு வைக்கும் நோக்கில் இந்தச் சட்டம் கொண்டுவரப்படவில்லை எனக் குழுக் கலந்துரையாடலின் போது அதிகாரிகள் வலியுறுத்தினர்.
எவ்வாறாயினும், குழு இதற்கு அங்கீகாரம் வழங்கிய போதிலும், பாராளுமன்ற உறுப்பினர் சிவஞானம் சிறீதரன் இந்தச் சட்டமூலத்திற்குத் தனது எதிர்ப்பை வெளியிட்டிருந்தார்.
இந்தச் சட்டமூலம் முதன்முதலில் கடந்த ஒக்டோபர் 20ஆம் திகதி வெளிவிவகார, வெளிநாட்டு வேலைவாய்ப்பு மற்றும் சுற்றுலாத்துறை அமைச்சரினால் முதல் வாசிப்பிற்காகப் பாராளுமன்றத்தில் சமர்ப்பிக்கப்பட்டது.
இக்கலந்துரையாடல்களில் வெளிவிவகார அமைச்சு, பாதுகாப்பு அமைச்சு, சட்டமா அதிபர் திணைக்களம் மற்றும் சட்ட வரைஞர் திணைக்களம் ஆகியவற்றின் பிரதிநிதிகள் பங்கேற்றிருந்தனர்.
இந்தச் சட்டமூலம் சட்டமாக மாறுவதற்கு முன்னர் எஞ்சிய பாராளுமன்ற நடைமுறைகளைப் பூர்த்தி செய்ய வேண்டியுள்ளது
