அரசாங்கம் வழங்கும் நிவாரணநிதியையையும் பாதிக்கப்பட்டவர்களுக்கான வங்கி கடன்களையும் பெறும்போது மக்கள் மிகுந்த அவதானத்துடன் இருக்கவேண்டும் செயற்படவேண்டும் என மத்திய வங்கி ஆளுநர் நந்தலால் வீரசிங்க வலியுறுத்தியுள்ளார்.
கண்டியில் நடைபெற்ற நிகழ்வொன்றில் கலந்துகொண்டு உரையாற்றிய ஆளுநர், தாம் பெறும் கடன்களையும் நிவாரணங்களையும் முறையாக முகாமைத்துவம் செய்வது பொதுமக்களின் கடமையாகும் எனக் குறிப்பிட்டார்.
அவரது உரையின் முக்கிய அம்சங்கள் வருமாறு:
-
நிவாரண நிதி ஒதுக்கீடு: அனர்த்தத்தினால் பாதிக்கப்பட்டவர்களுக்கு நிவாரணம் வழங்குவதற்காக அரசாங்கம் பெருமளவிலான நிதியை ஒதுக்கியுள்ளது.
-
குடிமக்களின் பொறுப்பு: குடிமக்கள் என்ற ரீதியில், தமக்குத் தேவையான அளவு நிவாரண நிதியை மாத்திரம் பெற்றுக்கொள்ள வேண்டிய பொறுப்பு அனைத்துத் தரப்பினருக்கும் உள்ளது. அவ்வாறு முறையாக முகாமைத்துவம் செய்யப்படும்போதுதான், ஏனைய தேவையுள்ள தரப்பினருக்கு அந்த நிதியை வழங்க அரசாங்கத்தால் முடியும்.
-
நிதி முகாமைத்துவம்: பெறப்படும் நிதி நிவாரணங்கள் முறையான திட்டமிடலுடன் பயன்படுத்தப்பட வேண்டும்.
சுற்றுலாத் துறை அனுபவத்திலிருந்து ஒரு பாடம்
கடந்தகால பொருளாதார நெருக்கடியின் போது சுற்றுலாத் துறை வீழ்ச்சியடைந்தபோது, அத்துறைக்காக அறிமுகப்படுத்தப்பட்ட சலுகைக் கடன் திட்டத்தை ஆளுநர் சுட்டிக்காட்டினார்.
“அப்போது பாதிக்கப்பட்ட மற்றும் பாதிக்கப்படாத பல தரப்பினர், தமக்குத் தேவையான அளவை விட அதிகமான கடன்களைப் பெற்றனர். அதன் விளைவாக, கடனைத் திருப்பிச் செலுத்த முடியாமல் அந்த வணிகங்கள் பின்னர் பெரும் சிரமங்களை எதிர்கொண்டன.”
தமது வணிகங்களுக்குத் தேவையான அளவு சலுகைக் கடன்களை மாத்திரம் பெற்றுக்கொள்வதன் மூலம், அவர்கள் கடன் நெருக்கடிக்கு (Credit Crisis) ஆளாக மாட்டார்கள் என்று ஆளுநர் குறிப்பிட்டார். மக்களின் வாழ்க்கையையும் வணிகங்களையும் மீட்டெடுக்க அரசாங்கம் வழங்கும் கடன்களை முறையான முகாமைத்துவத்தின் கீழ் பெற்றுப் பயன்படுத்துவது அனைவரினதும் பொறுப்பு என்றும் அவர் வலியுறுத்தினார்.
