டிட்வா’ சூறாவளியால்இலங்கையில் சேதமடைந்த பகுதிகளை மீண்டும் கட்டியெழுப்புவதற்கு இந்தியா 450 மில்லியன் அமெரிக்க டொலர் நிதியுதவி வழங்கும் என்று இந்திய வெளியுறவுத்துறை அமைச்சர் எஸ். ஜெய்சங்கர் தெரிவித்துள்ளார்.
இலங்கைக்கு வருகை தந்துள்ள இந்திய அமைச்சர் கூறுகையில் இந்த நிதியுதவியில் 350 மில்லியன் டாலர் சலுகை அடிப்படையிலான கடன் திட்டமாகவும் ( concessional lines of credit) 100 மில்லியன் டாலர் மானியமாகவும் (grants. ) வழங்கப்படும் என குறிப்பிட்டார்.
இன்று காலை ஜனாதிபதி அநுர குமார திஸாநாயக்கவுடன் நடத்திய கலந்துரையாடலின் விவரங்களை வெளியிட்ட அவர் இலங்கையில் ‘டிட்வா’ சூறாவளியால் ஏற்பட்ட பாதிப்புகள் குறித்து விரிவாக ஆலோசிக்கப்பட்டதாகக் கூறினார்.
“பிரதமர் நரேந்திர மோடியின் கடிதமானது பேரிடரின் போது முதல் பதிலளிப்பவர் ( first responder role ) என்ற எமது பங்கை உறுதிப்படுத்துவதுடன் இலங்கைக்கு 450 மில்லியன் டொலர் புனரமைப்புத் தொகுப்பை வழங்க உறுதிபூண்டுள்ளது. இந்த வாக்குறுதியை எவ்வளவு விரைவாகச் செயல்படுத்த முடியும் என்பதிலேயே எமது பேச்சுவார்த்தைகள் அமைந்திருந்தன” என்று அவர் தெரிவித்தார்.
மேலும் இலங்கையின் மிக நெருங்கிய அண்டை நாடு என்ற ரீதியில் பொருளாதார நெருக்கடியைப் போன்றே தற்போதைய இக்கட்டான காலத்திலும் இந்தியா முன்வந்து உதவுவது இயல்பானது என்றும் அமைச்சர் ஜெய்சங்கர் குறிப்பிட்டார்.
கொழும்பில் இன்று வெளிநாட்டு அலுவல்கள் அமைச்சர் விஜித ஹேரத்துடன் இணைந்து நடத்திய கூட்டு ஊடகவியலாளர் சந்திப்பின் போதே அவர் இந்த கருத்துக்களைத் தெரிவித்தார்.
