‘நான் ஒரு முஸ்லிம் பாகிஸ்தானைச் சேர்ந்தவர். ஆஸ்திரேலியாவிற்காக விளையாட முடியாது என்று என்னிடம் கூறப்பட்டது. இப்போது என்னைப் பாருங்கள் உங்களாலும் இது முடியும்’-தனது இறுதிடெஸ்ட் போட்டியில் விளையாடவுள்ள கவாஜா இளம் தலைமுறையினருக்கு ஆலோசனை

ஐந்தாவது ஆஷஸ் தொடருடன் தனது நீண்ட கால டெஸ்ட் வாழ்க்கையை நிறைவு செய்யும் ஆஸ்திரேலிய கிரிக்கெட் வீரர் உஸ்மான் கவாஜா, தன்னைப்போல் “வித்தியாசமான” பின்னணி கொண்ட சிறுவர்களுக்கு ஆஸ்திரேலியாவிற்காக விளையாடுவது சாத்தியம் என்ற நம்பிக்கையைத் தனது பயணம் வழங்கும் என்று எதிர்பார்ப்பதாகத் தெரிவித்துள்ளார்.

கடந்த மாதம் 39 வயதை எட்டிய இந்த டாப்-ஆர்டர் பேட்ஸ்மேன், சிட்னி கிரிக்கெட் மைதானத்தில் ஞாயிற்றுக்கிழமை தொடங்கவுள்ள தனது 88-வது டெஸ்ட் போட்டியுடன் சர்வதேச கிரிக்கெட்டிலிருந்து ஓய்வு பெறுவதாக வெள்ளிக்கிழமை அறிவித்தார்.

2010-11 ஆஷஸ் தொடரின் இறுதிப் போட்டியில் இதே மைதானத்தில் அறிமுகமான கவாஜா, இதுவரை 16 சதங்கள் உட்பட 43.39 சராசரியுடன் 6,206 ரன்களைக் குவித்துள்ளார்.

அவர் எடுத்த ரன்களையும் தாண்டி, ஆஸ்திரேலிய கிரிக்கெட்டில் பன்முகத்தன்மையின் (Diversity) அடையாளமாக கவாஜா திகழ்கிறார். பாகிஸ்தானில் பிறந்து, தனது ஐந்து வயதிலிருந்து சிட்னியில் வளர்ந்தவர் இவர்.

செய்தியாளர் சந்திப்பில் பேசிய கவாஜா, “தங்கள் வித்தியாசமானவர்கள் என்றும், தங்களுக்கு இங்கு இடமில்லை என்றும் நினைக்கும் குழந்தைகளுக்கும், ‘உன்னால் சாதிக்க முடியாது’ என்று மற்றவர்களால் சொல்லப்பட்டவர்களுக்கும் நான் ஒரு உந்துதலாக இருந்திருப்பேன் என்று நம்புகிறேன்,” என்றார்.

“ஒரு ஆஸ்திரேலிய கிரிக்கெட் வீரராக வளர முயன்றபோது நானும் இதையே உணர்ந்தேன். ஆனால், நேரில் காண்பதே நம்பிக்கை தரும். உங்களால் எதையும் சாதிக்க முடியும் என்று சொல்லவே நான் இங்கு இருக்கிறேன். தொடர்ந்து முயற்சி செய்யுங்கள். நான் ஒரு பெருமைமிக்க முஸ்லிம், பாகிஸ்தானைச் சேர்ந்தவர். ஆஸ்திரேலியாவிற்காக விளையாட முடியாது என்று என்னிடம் கூறப்பட்டது. இப்போது என்னைப் பாருங்கள், உங்களாலும் இது முடியும்,” என்று அவர் உருக்கமாகத் தெரிவித்தார்.

கவாஜா தனது டெஸ்ட் வாழ்க்கையின் பெரும்பகுதியை மிடில்-ஆர்டர் வரிசையில் விளையாடினார், ஆனால் 2021-22 ஆஷஸ் தொடரின் போது மார்னஸ் லாபுஷேனிடம் தனது இடத்தை இழந்தார். இருப்பினும், சிட்னி டெஸ்டிற்கு முன்னதாக டிராவிஸ் ஹெட்டிற்கு கோவிட் தொற்று ஏற்பட்டதால் கடைசி நிமிடத்தில் அவர் அழைக்கப்பட்டார். அந்தப் போட்டியின் இரண்டு இன்னிங்ஸ்களிலும் சதமடித்து தனது கிரிக்கெட் வாழ்க்கையை மீண்டும் உயிர்ப்பித்தார்.

வார்னருடன் தொடக்க வீரராக…

அதன் பிறகு, இரண்டு ஆண்டுகளுக்கு முன்பு சிட்னி டெஸ்டிற்குப் பிறகு ஓய்வு பெற்ற டேவிட் வார்னருடன் இணைந்து ஒரு வெற்றிகரமான தொடக்க ஜோடியை கவாஜா உருவாக்கினார். இந்த ஆஷஸ் தொடரில், பெர்த்தில் நடந்த முதல் போட்டியில் அவருக்கு முதுகில் காயம் ஏற்பட்டது. இதனால் இரண்டாவது போட்டியை தவறவிட்ட அவர், ஆரம்பத்தில் அடிலெய்டில் நடந்த மூன்றாவது போட்டிக்கான அணியில் இருந்து நீக்கப்பட்டார்.

ஸ்டீவ் ஸ்மித்திற்கு தலைச்சுற்றல் (vertigo) ஏற்பட்டதையடுத்து அவர் மீண்டும் கடைசி நேரத்தில் அழைக்கப்பட்டார். தொடக்க வீரராக இல்லாமல் நான்காவது வரிசையில் களமிறங்கி 82 மற்றும் 40 ரன்கள் எடுத்தார். இதன் மூலம் ஆஸ்திரேலியா 82 ரன்கள் வித்தியாசத்தில் வெற்றி பெற்று தொடரைக் கைப்பற்றியதுடன் ஆஷஸ் கிண்ணத்தையும் (Urn) தக்க வைத்துக் கொண்டது.

பெர்த்தில் ஏற்பட்ட முதுகுவலி காயத்திற்குப் பிறகு ஊடகங்கள் தன்னை நடத்திய விதம், தனது பின்னணி காரணமாக தான் இன்னும் மற்ற வீரர்களை விட வித்தியாசமாக நடத்தப்படுவதற்கான சான்று என்று கவாஜா கூறினார்.

“ஊடகங்களும் முன்னாள் வீரர்களும் வெளிவந்து என்னைத் தாக்கிய விதம்… நான் தொடர்ந்து ஐந்து நாட்கள் அதை அனுபவித்தேன்,” என்று அவர் நினைவு கூர்ந்தார்.

“அவர் அணிக்கு அர்ப்பணிப்புடன் இல்லை, அவர் தன்னைப்பற்றி மட்டுமே கவலைப்படுகிறார், போட்டிக்கு முந்தைய நாள் அவர் கோல்ஃப் விளையாடினார் போன்ற தனிப்பட்ட விமர்சனங்கள் முன்வைக்கப்பட்டன. அவர் சுயநலவாதி, போதுமான அளவு கடினமாகப் பயிற்சி செய்வதில்லை, போட்டிக்கு முந்தைய நாள் அவர் பயிற்சி செய்யவில்லை, அவர் சோம்பேறி என விமர்சித்தனர். இவை நான் என் வாழ்நாள் முழுவதும் வளர்ந்த அதே இன ரீதியான ஒரே மாதிரியான பிம்பங்கள் (racial stereotypes) ஆகும்.”

“அடுத்த உஸ்மான் கவாஜாவின் பயணம் வித்தியாசமாக இருக்க வேண்டும் என்று நான் விரும்புகிறேன்,” என்று அவர் மேலும் கூறினார். “அவரை நீங்கள் சமமாக நடத்த வேண்டும் என்று நான் விரும்புகிறேன், அவர் யாராக இருப்பார் என்பது குறித்த இன ரீதியான முன்முடிவுகளைக் கொண்டிருக்காதீர்கள்.”

உரிமைகளுக்காகக் குரல் கொடுத்தல்

2023-ஆம் ஆண்டில், மனித உரிமைகள் குறித்த தனது கருத்துக்களை வெளிப்படுத்தியதற்காக உஸ்மான் கவாஜா கட்டுப்பாடுகளை எதிர்கொண்டார். “அனைத்து உயிர்களும் சமம்” மற்றும் “சுதந்திரம் ஒரு மனித உரிமை” என்று எழுதப்பட்ட காலணிகளை அணிய அவருக்கு தடை விதிக்கப்பட்டது. பின்னர் ஒரு கருப்பு பட்டை (black armband) அணிந்ததற்காக அவர் கண்டிக்கப்பட்டார்.

பாலஸ்தீன உரிமைகள் மற்றும் இஸ்லாமிய எதிர்ப்பு உணர்வுகளுக்கு எதிரான (anti-Islamophobia) தனது வெளிப்படையான நிலைப்பாடு சிலருக்குப் பிடிக்காமல் போகலாம் என்பதைத் தான் புரிந்துகொள்வதாகக் கூறிய கவாஜா, ஆனால் குரல் கொடுக்க வேண்டிய கட்டாயத்தை தான் உணர்வதாகவும் கூறினார்.

“சிலர் மக்களைப் பிரிக்கவும் வெறுப்பைப் பரப்பவும் முயற்சிக்கும் இடத்தில், நான் மக்களை ஒன்றிணைக்கவும் ஆஸ்திரேலியாவில் அனைவரையும் உள்ளடக்கிய ஒரு பண்பாட்டை ஊக்குவிக்கவும் முயற்சிக்கிறேன்,” என்று அவர் கூறினார்.