டிட்வா (Ditwah) சூறாவளிக்குப் பின்னர் பெறப்பட்ட செயற்கைக்கோள் புகைப்படங்களின் அடிப்படையில், இலங்கையில் சுமார் 4,800மண்சரிவு ஏற்படக்கூடிய பகுதிகளை நவீன தொழில்நுட்பங்களுக்கான ஆர்தர் சி. கிளார்க் நிறுவகம் (ACCIMT) அடையாளம் கண்டுள்ளது.
மேம்பட்ட செயற்கைக்கோள் படங்களைப் பயன்படுத்தி இந்த வரைபடமாக்கல் மேற்கொள்ளப்பட்டதாக ACCIMT இன் பணிப்பாளர் நாயகம் திருமதி குமாரி மீகஹகொடுவ ஊடகங்களிடம் தெரிவித்தார். ஊடகங்களில் ஏற்கனவே செய்தியாக வெளியிடப்பட்ட இடங்களைத் தாண்டி, கணிசமான எண்ணிக்கையிலான புதிய மண்சரிவு அபாய வலயங்கள் இதன் மூலம் கண்டறியப்பட்டுள்ளதாக அவர் குறிப்பிட்டார். குறிப்பாக, மத்திய மலைநாட்டிலேயே அதிகளவிலான மண்சரிவுகள் பதிவாகியுள்ளன என்றும் அவர் கூறினார்.
“எமது நாட்டில் பெரும்பாலான நேரங்களில், நிலச்சரிவுகள் ஏற்படுவதற்கு முன்னர் முன்னெச்சரிக்கை நடவடிக்கைகளை எடுப்பதை விட, அவை நிகழ்ந்த பின்னரே அதற்கான ஏற்பாடுகள் செய்யப்படுகின்றன,” என திருமதி மீகஹகொடுவ தெரிவித்தார்.
இதனை நிவர்த்தி செய்யும் பொருட்டு, பேரிடர் மேலாண்மை கட்டமைப்பின் கீழ் உள்ள நிறுவனங்கள், பல்கலைக்கழகங்கள் மற்றும் ஏனைய வெளிவாரியான முகவர்களுடன் இந்த செயற்கைக்கோள் வரைபடத் தரவுகளை அறிவியல் மற்றும் தொழில்நுட்ப அமைச்சின் ஊடாகப் பகிர்ந்து கொள்ள ACCIMT தீர்மானித்துள்ளது.
கூடுதலாக, வெள்ளப்பெருக்கின் போது மூழ்கிய பகுதிகளைக் காட்டும் வரைபடங்களும் (Inundation maps) உருவாக்கப்பட்டுள்ளன. வெள்ள அபாயப் பகுதிகளில் இருந்து மீள்குடியேற்றப்பட வேண்டிய குடியிருப்பாளர்களை அடையாளம் காண அதிகாரிகளுக்கு இது உதவும்.
