bbc

 ஜனாதிபதி ட்ரம்பிற்கு இது முடிவெடுக்க வேண்டிய நேரம்.

பத்து நாட்களுக்கு முன்பு, ஈரானிய அரசாங்கம் போராட்டக்காரர்களுக்கு எதிராக வன்முறையைப் பயன்படுத்தினால், அவர்களை “மீட்க” அமெரிக்கா தயாராக இருப்பதாக அவர் கூறியிருந்தார். அமெரிக்கா “துப்பாக்கி ஏந்தி, தயார் நிலையில் (locked and loaded) உள்ளது” என்று ஜனாதிபதி அப்போது குறிப்பிட்டிருந்தார்.

ஈரானில் வன்முறை ஒடுக்குமுறை உண்மையில் தொடங்குவதற்கு முன்பே அவர் இதனைத் தெரிவித்திருந்தார். இப்போது, அதன் முழு வீச்சும் அதிர்ச்சியூட்டும் வகையில் வெளிப்பட்டு வரும் நிலையில், ட்ரம்ப் எவ்வாறு பதிலடி கொடுப்பார் என்று உலகம் காத்திருக்கிறது.

“ஜனாதிபதி ட்ரம்ப் என்ன செய்யப்போகிறார் என்பது ஜனாதிபதி ட்ரம்பைத் தவிர வேறு யாருக்கும் தெரியாது,” என்று வெள்ளை மாளிகை ஊடகச் செயலாளர் கரோலின் லெவிட் கூறினார். “உலகம் தொடர்ந்து காத்திருக்கலாம் மற்றும் ஊகிக்கலாம்.” ஆனால் எவ்வளவு காலத்திற்கு?

சாத்தியமான நடவடிக்கைகள் குறித்து மூத்த அதிகாரிகள் செவ்வாய்க்கிழமை ஜனாதிபதிக்கு விளக்கமளிக்க உள்ளனர். ஞாயிற்றுக்கிழமை ‘ஏர் ஃபோர்ஸ் ஒன்’ விமானத்தில் செய்தியாளர்களிடம் பேசிய ட்ரம்ப், தான் “மிகவும் வலிமையான சில தெரிவுகளை” பரிசீலித்து வருவதாகக் கூறினார்.

வெனிசுலாவில் கிடைத்த வெற்றியின் உற்சாகத்தில் இருக்கும் ஜனாதிபதிக்கு — நிக்கோலஸ் மதுரோவின் பிடிபட்டதை அமெரிக்க வரலாற்றின் மிக வெற்றிகரமான நடவடிக்கைகளில் ஒன்று என்று அவர் விவரித்தார் — இராணுவத்தைப் பயன்படுத்துவதற்கான தூண்டுதல் கணிசமாக இருக்கலாம்.

தூரத்திலிருந்து தாக்குதல் நடத்தும் திறன்

கடந்த கோடையில் நடந்த நிகழ்வுகள் நிரூபித்தபடி, தூரத்திலிருந்து தாக்குதல்களை நடத்தும் திறன் அமெரிக்காவிடம் முழுமையாக உள்ளது. மிசோரியிலுள்ள வைட்மேன் விமானப்படை தளத்திலிருந்து 30 மணிநேர சுற்றுப்பயண பயணத்தில் பி-2 (B-2) ஸ்டெல்த் குண்டுவீச்சு விமானங்கள் பறந்து சென்று, ஈரானின் மிக முக்கியமான இரண்டு அணுசக்தி தளங்கள் மீது பதுங்கு குழி தகர்க்கும் குண்டுகளை வீசின.

அமெரிக்கா மீண்டும் அதே போன்ற நடவடிக்கையைத் தேர்ந்தெடுத்தாலும் அல்லது தற்போதைய ஒடுக்குமுறைக்கு காரணமான ஆட்சியின் கூறுகள் மீது துல்லியமான தாக்குதல்களை நடத்தினாலும், வாஷிங்டனிடம் ஒரு நீண்ட இலக்குப் பட்டியல் (Target list) இருப்பதாகக் கருதலாம்.

பிபிசியின் அமெரிக்க பங்காளியான சிபிஎஸ் நியூஸ் (CBS News) மேற்கோள் காட்டிய பென்டகன் அதிகாரிகள் கூறுகையில், பதிலடி என்பது சைபர் செயல்பாடுகள் மற்றும் ஈரானின் கட்டளை அமைப்புகளைக் குழப்பவும் சீர்குலைக்கவும் உத்தேசிக்கப்பட்ட ரகசிய உளவியல் பிரச்சாரங்கள் உள்ளிட்ட பல்வேறு ரகசிய முறைகளையும் உள்ளடக்கியிருக்கலாம் என்று தெரிவித்தனர்.

இருப்பினும், ஜனவரி 3 அன்று கராகஸில் (வெனிசுலா) நடந்ததைப் போன்ற ஒரு சூழல் ஈரானில் நடப்பதற்கான வாய்ப்பு அறவே இல்லை.

ஈரான் வெனிசுலா அல்ல

சமீபத்திய அமெரிக்க மற்றும் இஸ்ரேலிய தாக்குதல்களால் ஈரான் பலவீனமடைந்திருந்தாலும், அது வெனிசுலா அல்ல. இஸ்லாமிய குடியரசு என்பது போர்க்களத்தில் அனுபவம் வாய்ந்த ஒரு ஆட்சி முறையாகும். ஒரு தனி நபரை அகற்றுவது முழு நாட்டையும் வாஷிங்டனின் விருப்பத்திற்கு பணிய வைக்காது.

1980 ஆம் ஆண்டு ஈரானில் வைக்கப்பட்டிருந்த அமெரிக்க பிணைக் கைதிகளை மீட்க ஜிம்மி கார்ட்டர் மேற்கொண்ட பேரழிவுகரமான முயற்சி குறித்து ட்ரம்ப் சமீபத்தில் குறிப்பிட்டிருந்தார். இது அமெரிக்க இராணுவத்தை ஈரானில் களமிறக்குவதில் உள்ள ஆபத்துகளை அவர் அறிவார்ந்தே இருக்கிறார் என்பதைக் காட்டுகிறது.

ஈரானின் கிழக்கு பாலைவனத்தில் ஹெலிகாப்டர் மற்றும் ஈசி-130 (EC-130) போக்குவரத்து விமானம் மோதிக்கொண்டதில் எட்டு அமெரிக்க இராணுவ வீரர்கள் கொல்லப்பட்டனர். அந்தத் தோல்வியடைந்த நடவடிக்கை மற்றும் டெஹ்ரானில் பிணைக் கைதிகள் அணிவகுத்துச் செல்லப்பட்ட அவமானம் ஆகியவை அந்த ஆண்டின் பிற்பகுதியில் கார்ட்டர் தேர்தலில் தோல்வியடைய முக்கியக் காரணமாக அமைந்தன.

வாஷிங்டனின் உண்மையான இலக்கு என்ன?

நாற்பத்தாறு ஆண்டுகளுக்குப் பிறகு, வாஷிங்டனின் இராணுவ கணக்கீடுகளைத் தூண்டும் ஒரு பெரிய கேள்வி உள்ளது: ட்ரம்ப் நிர்வாகம் ஈரானில் உண்மையில் எதை அடைய முயல்கிறது?

ஜனாதிபதி ட்ரம்ப் ஈரானிய ஆட்சியை கவிழ்ப்பதை விட, அதன் நடத்தையில் மாற்றத்தை ஏற்படுத்தவே பெரும்பாலும் முயல்கிறார் என்று ஆய்வாளர் வில் டாட்மேன் கூறுகிறார். “ஆட்சி மாற்றத்தின் அபாயங்கள் மிகவும் அதிகம் என்பதால், அதுவே அவரது முதன்மை நோக்கம் என்று நான் இன்னும் நம்பவில்லை,” என்று அவர் கூறினார். “இது அணுசக்தி பேச்சுவார்த்தைகளில் கூடுதல் சலுகைகளைப் பெறுவதற்காகவோ, ஒடுக்குமுறையை நிறுத்துவதற்காகவோ அல்லது சில பொருளாதாரத் தடைகளை நீக்க வழிவகுக்கும் சீர்திருத்தங்களைச் செயல்படுத்துவதற்காகவோ இருக்கலாம்.”

தங்களுடன் பேச்சுவார்த்தை நடத்த ஈரான் ஆட்சியின் சில தரப்பினர் ஆர்வம் காட்டுவதாக ட்ரம்ப் கூறியுள்ளார். “ஈரானிய ஆட்சியிடமிருந்து பகிரங்கமாக நீங்கள் கேட்பது, நிர்வாகத்திற்கு ரகசியமாக வரும் செய்திகளிலிருந்து முற்றிலும் மாறுபட்டது,” என்று கரோலின் லெவிட் திங்களன்று கூறினார்.

இராஜதந்திரம் அல்லது பலம்?

இதற்கிடையில், துணை ஜனாதிபதி ஜே.டி. வான்ஸ் (JD Vance) உட்பட ஒரு சில மூத்த ஆலோசகர்கள், ட்ரம்பை முதலில் இராஜதந்திர ரீதியில் செயல்படுமாறு வலியுறுத்தி வருகின்றனர். ஆனால், ஈரான் முழுவதும் இரத்தம் தோய்ந்த ஒடுக்குமுறை தொடர்ந்தால், இராஜதந்திரம் என்பது பலவீனமாகக் கருதப்படும் அபாயம் உள்ளது.

இந்தச் சூழலில், இணைய முடக்கம் இருந்தபோதிலும் ஈரானில் இருந்து வெளிவரும் கொடூரமான தகவல்கள் காரணமாக, இராஜதந்திர வழிகளை ஆராய்வதற்கு முன்பே தான் நடவடிக்கை எடுக்க வேண்டிய கட்டாயம் ஏற்படலாம் என்று ஜனாதிபதி கூறியுள்ளார்.

ஒரு வரையறுக்கப்பட்ட தாக்குதல் (Limited strike), போராட்டக்காரர்களை ஊக்குவிக்க உதவும் என்றும், இன்னும் மோசமான விளைவுகள் ஏற்படக்கூடும் என்று ஆட்சிக்கு எச்சரிக்கை விடுக்கும் என்றும் சிலர் நம்புகிறார்கள். ஆனால், இராணுவ நடவடிக்கை எதிர்மறையான விளைவுகளையும் ஏற்படுத்தக்கூடும். இது ஈரான் ஆட்சியின் ஆதரவாளர்களை ஒன்றுதிரட்ட வழிவகுக்கலாம்.

தன்னுடைய எந்தவொரு அமெரிக்கத் தாக்குதலுக்கும் பதிலடி கொடுப்பதாக ஈரான் அச்சுறுத்தியுள்ளதும் இந்த கணக்கீட்டை சிக்கலாக்குகிறது. இஸ்ரேலிய மற்றும் அமெரிக்கத் தாக்குதல்களால் சேதம் ஏற்பட்டிருந்தாலும், ஈரானிடம் இன்னும் கணிசமான அளவு ஏவுகணைகள் உள்ளன. மேலும், யேமனில் உள்ள ஹூதிகள் மற்றும் ஈராக்கில் உள்ள ஷியா போராளிகள் இன்னும் செயல்படும் திறன் கொண்டுள்ளனர்.

ஜனாதிபதி ட்ரம்பை துணிச்சலாகச் செயல்படுமாறு வலியுறுத்தும் குரல்களில், ஈரானின் முன்னாள் மன்னரின் மகனான ரேச பஹ்லவியும் (Reza Pahlavi) ஒருவர். “ஈரானில் மக்கள் கொல்லப்படுவதைக் குறைக்கச் சிறந்த வழி, விரைவாகத் தலையிடுவதே,” என்று அவர் கூறியுள்ளார்.

வெள்ளை மாளிகையில் உள்ள அதிகாரிகளுக்கு இது அவ்வளவு எளிதல்ல என்பது நன்றாகவே தெரியும்.