பெண் தலைமைத்துவக் குடும்பங்களின் வாழ்க்கைத் தரத்தை அதிகரிக்கும் நோக்கில், 181 பயனாளிகளுக்கான சுயதொழில் உற்பத்தி உபகரணங்கள் மற்றும் இயந்திரங்கள் வழங்கும் நிகழ்வு, கிளிநொச்சி மாவட்டத் திறன்விருத்தி மண்டபத்தில் நேற்றைய தினம் சிறப்பாக நடைபெற்றது.
கிளிநொச்சி மாவட்டத்தைச் சேர்ந்த 181 பெண் தலைமைத்துவக் குடும்பங்களுக்கு, ரூபா 14,624,400.00 பெறுமதியான சுயதொழில் ஊக்குவிப்புப் பொருட்கள், சிங்கப்பூரைச் சேர்ந்த திரு. திருமதி துரை குடும்பத்தினர் மற்றும் செல்வி சரசியா இராமன் ஆகியோரின் நிதிப்பங்களிப்பில் வழங்கி வைக்கப்பட்டன.
தமிழர் தாயகத்தில் 1000 பெண் தலைமைத்துவ குடும்பங்களுக்கு வாழ்வாதார உதவிகள் வழங்கும் இந்த செயற்திட்டத்தை மேனாள் வடக்கு மாகாண சபை உறுப்பினரும், மேனாள் யாழ் வர்த்தக சங்கத்தின் தலைவருமான திரு ஜெயசேகரம் அவர்களின் முயற்சியாலேயே முன்னெடுக்கப்படுகிறது.
இந்நிகழ்வில் பிரதம விருந்தினராக வடக்கு மாகாண ஆளுனர் வேதநாயம் அவர்களும் நாடாளுமன்ற உறுப்பினரும், இலங்கைத் தமிழரசுக் கட்சியின் நாடாளுமன்றக் குழுத் தலைவருமாகிய சிவஞானம் சிறீதரன் அவர்களும் கலந்து சிறப்பித்தனர்.
இந்நிகழ்வில் உரையாற்றிய தமிழரசுக்கட்சியின் நாடாளுமன்ற குழுத்தலைவர் சி.சிறீதரன் அவர்கள், “சிங்கப்பூரைத் தளமாகக் கொண்டு இயங்கினாலும், தாயகத்தின் பொருளாதாரக் கட்டமைப்பை வலுப்படுத்த எம்முடன் கரம்கோர்த்தமைக்கு அனைத்து உறவுகள் சார்பிலும் நன்றிகளையும் பாராட்டுக்களையும் தெரிவிப்பதாகக்” குறிப்பிட்டார்.
தொடர்ந்து அவர் உரையாற்றுகையில், “போரின் பின்னரான வடக்கு, கிழக்கில் ஏறக்குறைய 90,000 பெண் தலைமைத்துவக் குடும்பங்கள் காணப்படுகின்றன. அவர்களின் வாழ்வியலை முன்னேற்ற வேண்டிய கடமையும் பொறுப்பும் எம் அனைவருக்கும் உரியது. புலம்பெயர்ந்த உறவுகள் அனைவரும், பெண் தலைமைத்துவக் குடும்பங்களின் வாழ்க்கைத் தரத்தை மேம்படுத்தத் தேவையான அபிவிருத்தித் திட்டங்களை முன்னெடுக்க முன்வர வேண்டும்” எனக் கோரிக்கை விடுத்தார்.
