(பிபிசி – சிங்களம்)
“என்னை வேலையிலிருந்து நீக்கியதற்கான காரணம் என்னவென்று கூட எனக்குத் தெரியாது… நான் இவ்வளவு கடினமாக உழைத்து, மிகவும் விருப்பத்துடன் வேலை செய்த இடம் அது…”
இது, சில நாட்களுக்கு முன்னர் இலங்கையின் பாரிய தகவல் தொழில்நுட்ப (IT) நிறுவனம் ஒன்றில் பணியாற்றி, ஆட்குறைப்பு நடவடிக்கைக்கு உள்ளான ஒரு யுவதியின் கூற்றாகும். பிபிசி சிங்களத்துடன் உரையாடிய அவரது அடையாளத்தைப் பாதுகாப்பதற்காக, நாம் அவரை ‘மாயா’ என்ற புனைப்பெயரில் அழைக்கிறோம்.
சமூக ஊடக அறிக்கைகளின்படி, மாயா மட்டுமன்றி இன்னும் நூற்றுக்கணக்கான ஊழியர்கள் இந்த அபாயத்திற்கு ஆளாகியுள்ளனர். இது ஒரு நிறுவனத்திற்கு மட்டும் மட்டுப்படுத்தப்பட்டதல்ல, உலகளாவிய ரீதியில் அவதானிக்கப்படும் ஒரு போக்கு என இத்துறைசார் உயர்மட்ட அதிகாரிகள் கருதுகின்றனர்.
இது தனது தொழில்முறை வாழ்க்கையின் எதிர்காலம் குறித்து நிச்சயமற்ற தன்மையை உருவாக்கியுள்ளதாக மாயா போன்ற இளைஞர்கள் கூறுகின்றனர். தகவல் தொழில்நுட்பத் துறையில் இத்தகைய நெருக்கடி உருவாகக் காரணம் என்ன? இது எங்கே சென்று கொண்டிருக்கிறது? அடுத்த ஆட்குறைப்பில் நீங்கள் ஒரு பலியாகாமல் இருக்க என்ன செய்ய வேண்டும்? ஊழியர்களைப் பணிநீக்கம் செய்வதன் சட்டப்பூர்வ நிலை என்ன? பிபிசி சிங்களம் இது குறித்து ஆராய்ந்தது.
‘இழப்பீடு வழங்கப்பட்டுள்ளதால் அனைவரது வாய்களும் மூடப்பட்டுள்ளன’
மென்பொருள் பொறியாளராக (Software Engineer) பணியாற்றுவதை மாயா தேர்ந்தெடுத்தது, அந்தத் துறையின் மீது அவருக்கு இருந்த ஆர்வம் காரணமாகவே ஆகும். அதன் காரணமாகவே குறுகிய காலத்தில் ஒரு முன்னணி IT நிறுவனத்தில் பணியாற்றும் வாய்ப்பு அவருக்குக் கிடைத்தது.
“நான் இன்றும் சொல்கிறேன், நான் வேலை செய்த நிறுவனங்களிலேயே மிகச்சிறந்த ‘வேலை-வாழ்க்கை சமநிலை’ (Work-life balance) இருந்த இடம் இதுதான். நிறைய சலுகைகள் இருந்தன,” என்று அவர் தனது பணியிடம் குறித்து மகிழ்ச்சியுடன் நினைவு கூர்ந்தார். ஆனால், அவர் நேசித்த அதே வேலை, இப்போது அவரது எதிர்காலத்தை கட்டியெழுப்புவதற்கு தடையாக மாறியுள்ளது.
“நான் இங்கே வந்தது வேறு இடங்களில் வேலை செய்த பிறகுதான். மீண்டும் இப்படி ஒரு இடம் கிடைக்காது. இப்போது எனக்கு வேறு இடத்திற்கு விண்ணப்பிக்க எந்த உத்வேகமும் (Motivation) இல்லை,” என்று மாயா பிபிசி சிங்களத்திடம் தெரிவித்தார்.
மாயா கூறுவதன்படி, அவர் முன்னறிவிப்பு ஏதுமின்றி வேலையிலிருந்து நீக்கப்பட்டார். அதற்கு முன்னர் சில அறிகுறிகள் தென்பட்டிருந்தாலும், தனக்கு இந்த நிலை ஏற்படும் என்று அவர் அறிந்திருக்கவில்லை. அதற்காக நிறுவனம் அவரிடம் இருந்து ஒரு ராஜினாமா கடிதத்தைப் பெற்றுக்கொண்டது. பின்னர், அந்த விடயத்தை வெளிப்படுத்த வேண்டாம் என்று கூறி மேலும் சில ஆவணங்களில் நிறுவன அதிகாரிகள் அவரிடம் கையெழுத்து வாங்கினர்.
“கிட்டத்தட்ட கட்டாயப்படுத்துவது போலவே அவர்கள் இதைச் செய்யத் தொடங்கினர்,” என்று அவர் தனது அனுபவத்தை மிகுந்த அதிர்ச்சியுடன் விவரித்தார். எவ்வாறாயினும், நிறுவனம் தனக்கு ஒரு இழப்பீட்டுத் தொகையை (Compensation) வழங்க ஒப்புக்கொண்டதாக அவர் கூறினார்.
“இழப்பீடு வழங்கப்பட்டிருப்பதால் அனைவரது வாய்களும் மூடப்பட்டுள்ளன. இழப்பீடு வழங்கினாலும் இது ஒரு மனிதாபிமானமற்ற செயல்,” என்று கூறிய அவர், நிரந்தர ஊழியராக இருந்த தனது சேவையை முடிவுக்குக் கொண்டுவர நிறுவனம் எடுத்த முடிவின் பின்னணியில் உள்ள காரணம் தெளிவற்றது என்றும் குறிப்பிட்டார்.
‘மிகத் தெளிவாக ஊழியர்களின் உரிமைகளை மீறும் செயல்’
தொழிலாளர் உரிமைகளுக்காகக் குரல் கொடுக்கும் சட்டத்தரணி இசுரு மஹேஷ் பிபிசி சிங்களத்திற்கு கருத்துத் தெரிவிக்கையில், இது “மிகத் தெளிவாக ஊழியர்களின் உரிமைகளை மீறும் செயல்” என்றார்.
“இலங்கையில் பல IT நிறுவனங்கள் இந்த வேலையைச் செய்து வருகின்றன. நான் சில ஊழியர்களின் வழக்குகளிலும் பணியாற்றியுள்ளேன். அங்கே உள்ள முக்கியமான விடயம் என்னவென்றால், அவர்கள் அதைச் சட்டப்பூர்வமான முறையில் செய்கிறார்கள். மேலோட்டமாகப் பார்த்தால், சட்டத்தின் முன் சென்றாலும் ஊழியர் நிர்க்கதிக்கு உள்ளாகிறார். காரணம், அவர் தனது விருப்பத்துடனேயே கடிதத்தில் கையெழுத்திட்டுள்ளார்,” என்று அவர் விளக்கினார்.
1971 ஆம் ஆண்டின் 45 ஆம் இலக்க தொழிலாளர்களின் சேவையை முடிவுக்குக் கொண்டுவருதல் (சிறப்பு ஏற்பாடுகள்) சட்டத்தின் கீழ், ஊழியரின் முன் அனுமதியுடன் அவ்வாறு செய்ய முடியும் என்றாலும், IT நிறுவனங்கள் முன்னெடுக்கும் இந்த செயல்முறை “சட்டத்தை வேண்டுமென்றே துஷ்பிரயோகம் செய்வது” என்று அவர் சுட்டிக்காட்டினார்.
“தகவல்களை வெளிப்படுத்த வேண்டாம் என்று கையெழுத்து வாங்கும் ஆவணமும் சட்டத்தின் முன் செல்லுபடியாகாது. ஏனெனில், இங்கே வெளிப்படுத்தப்படுவது நிறுவனத்தின் ரகசியங்கள் அல்ல,” என்று அவர் மேலும் கூறினார்.
ஆட்குறைப்பின் போது ஒரு நிறுவனம் வழங்கும் இழப்பீட்டுத் தொகை போதுமானதா என்பது குறித்து ஊழியர்கள் சட்ட ஆலோசனைகளைப் பெற முடியும் என்று சட்டத்தரணி இசுரு மஹேஷ் குறிப்பிட்டார். இலங்கையின் தகவல் தொழில்நுட்பத் துறையில் தொழிற்சங்கங்கள் இருந்திருந்தால், இத்தகைய முடிவுகளின் போது கூட்டுப் பேரம் பேசுவதற்கு (Collective Bargaining) வாய்ப்பு கிடைத்திருக்கும் என்றும் அவர் சுட்டிக்காட்டினார்.
‘அது உண்மையாகவே நடக்கிறது’
தகவல் தொழில்நுட்பத் துறையில் ஆட்குறைப்புகள் நடப்பது ஒரு ரகசியம் அல்ல என்று Sysco Labs நிறுவனத்தின் நிர்வாக இயக்குநர் துஷேர கவுடவத்த பிபிசி சிங்களத்துடனான உரையாடலில் தெரிவித்தார். “அது உண்மையாகவே நடக்கிறது,” என்று கூறிய அவர், அதற்கான காரணத்தையும் விளக்கினார்.
“எமது ஊழியர்களின் தகவமைப்புத் திறன் (Adaptability) சற்று குறைவாக உள்ளது. எமது திறன்களைப் பன்முகப்படுத்துவது அல்லது விரிவுபடுத்துவது குறித்து நாம் அதிக கவனம் செலுத்துவதில்லை,” என்று அவர் சுட்டிக்காட்டினார்.
வாடிக்கையாளர்களின் தேவைகள் மற்றும் தொழில்நுட்ப மாற்றங்களுக்கு ஏற்ப நிறுவனங்கள் மாறத் தீர்மானிக்கும்போது, முதலில் தானியங்கி மயமாக்கப்படக்கூடிய (Automation) வேலைகளை நீக்குகின்றன என்றும், அது எளிதான இடத்திலிருந்தே தொடங்குகிறது என்றும் அவர் கூறினார்.
“நிறுவனங்கள் அந்த மாற்றத்தைச் செய்யும்போது, ஊழியர்கள் புதிய தொழில்நுட்பத்தை ஏற்றுக்கொள்வதை அவர்கள் விரும்புகிறார்கள். உதாரணமாக, அவர்கள் AI சார்ந்த டிஜிட்டல் மாற்றங்களுக்கு மாறுகிறார்கள் என்று வைத்துக்கொள்வோம்… அப்போது அவர்கள் உங்களிடம் உங்கள் திறனை மேம்படுத்த (Upgrade) முடியுமா என்று கேட்கிறார்கள்.”
அத்தகைய சந்தர்ப்பங்களில் ஊழியர்கள் சற்று பின்தங்கியிருப்பதாக அவர் சுட்டிக்காட்டினார். “நேரடியாக ‘என்னால் முடியாது’ என்று சொல்ல மாட்டார்கள். ஆனால் அவர்கள் அதை ஒரு சவாலாக எடுத்துத் தங்களை மாற்றிக்கொள்வதில்லை. அப்போது தானியங்கி மயமாக்கக்கூடிய வேலைகள் மெதுவாகக் குறைகின்றன.”
மொரட்டுவ பல்கலைக்கழகத்தின் கணினி அறிவியல் மற்றும் பொறியியல் துறையின் பேராசிரியர் கிஹான் டயஸ் இது போன்ற கருத்தைப் பகிர்ந்து கொள்கையில், புதிய தொழில்நுட்பம் குறித்த அறிவு உள்ளவர்களுக்கு இது ஒரு பிரச்சினையாக இருக்காது என்றார்.
“18-ம் நூற்றாண்டிலும் இயந்திரமயமாக்கல் காரணமாக மனிதர்களின் வேலைகள் பறிபோயின… IT துறையில் உள்ள பலருக்கும் இப்போது ஒரு பயம் வந்துள்ளது, எனது வேலை பறிபோகுமா? செயற்கை நுண்ணறிவு காரணமாக எனது வேலை கணினியாலேயே செய்யப்படுமா? இது உண்மையில் ஒரு நியாயமான பயம்,” என்று அவர் கூறினார்.
‘எமது சிறந்த தலைமைத்துவம் இலங்கையை விட்டு வெளியேறியது’
இலங்கை எதிர்கொண்ட பொருளாதார நெருக்கடிக்கு மத்தியில், இங்குள்ள தகவல் தொழில்நுட்பத் துறையின் முன்னணி நிபுணர்கள் நாட்டை விட்டு வெளியேறியதாக துஷேர கவுடவத்த குறிப்பிட்டார். இது மற்ற நாடுகளிலிருந்து இலங்கைக்கு கிடைக்கவிருந்த வாய்ப்புகளை இழக்கச் செய்ததாக அவர் கருதுகிறார்.
“அப்போது இலங்கை நிறுவனங்களின் தலைமைத்துவப் பதவிகளில் ஒரு இடைவெளி உருவானது. அதன் பொருள் இருப்பவர்களுக்குத் திறமை இல்லை என்பதல்ல. சிலநேரம் அவர்கள் அந்தப் பதவிகளை ஏற்கும் அளவுக்கு முதிர்ச்சி அடையாமல் இருக்கலாம் அல்லது அதற்கான பயிற்சி இல்லாமல் இருக்கலாம்,” என்று அவர் விளக்கினார். அத்துடன் நிறுவனங்களால் தங்களது மீண்டுவரும் திறனை (Resilience) நிரூபிக்க முடியாமல் போனதாகவும் அவர் கூறினார்.
அதிகமான நிறுவனங்கள் இலங்கையை நோக்கி வருவது குறைந்த செலவில் உழைப்பைப் பெறுவதற்காகவே ஆகும். ஆனால் செயற்கை நுண்ணறிவு (AI) காரணமாக இப்போது அவர்களின் அந்தத் தேவை மாறியுள்ளதாக பேராசிரியர் கிஹான் டயஸ் சுட்டிக்காட்டினார்.
AI ஒரு காரணமா?
“இப்போது மிகச் சாதாரணமான விடயங்களைச் செய்வதென்றால், அவற்றை எம்மால் செயற்கை நுண்ணறிவு மூலம் செய்ய முடியும். ஆனால் சிக்கலான விடயங்களை இன்னும் செய்ய முடியாது. சிலவேளைகளில் இன்னும் சில ஆண்டுகளில் அவையும் AI மூலம் செய்யப்படலாம்,” என்று பேராசிரியர் கிஹான் டயஸ் கூறினார்.
ஆனால் IT துறையில் வேலை இழப்புகளுக்கு AI உண்மையாகவே பாதிப்பை ஏற்படுத்தியுள்ளதா?
மாயா பிபிசியிடம் கூறுகையில், தனது வேலை இழப்புக்கு AI காரணமா என்ற சந்தேகம் தனக்கு இருப்பதாகத் தெரிவித்தார். ஆனால் துஷேர கவுடவத்த கூறுவதன்படி, ஆட்குறைப்பின் பின்னாலுள்ள “உண்மையான காரணம்” அதுவல்ல.
செயற்கை நுண்ணறிவு என்பது பெரிய நிறுவனங்களுக்குத் தங்களுக்குத் தேவையில்லாத ஊழியர்களை நீக்குவதற்கு ஒரு சாக்குப்போக்காக மாறியுள்ளது என்று அவர் சுட்டிக்காட்டினார். எவ்வாறாயினும், AI காரணமாகப் பாதிக்கப்படும் வேலைகள் உள்ளன என்பதையும் அவர் ஒப்புக்கொண்டார்.
“உண்மையில் நாம் AI-இல் முதலீடு செய்கிறோம். அதன் மூலம் கிடைக்கும் பலன் வேலையின் முயற்சியைக் குறைப்பதே ஆகும். தெளிவாகச் சொன்னால் சில வேலைகளுக்கான தேவை இல்லாமல் போயுள்ளது,” என்று அவர் விளக்கினார். “இதன் மூலம் அவர்களுக்கு இரண்டு நன்மைகள் கிடைக்கின்றன. ஒன்று, கட்டமைப்பு சீராகிறது. இரண்டாவது, நாங்கள் இப்போது AI-ஐப் பயன்படுத்தும் ஒரு நிறுவனம் என்ற செய்தியை மக்களுக்கு வழங்குகிறார்கள்.”
இயந்திரமயமாக்கல் காரணமாக ஒருவரின் வேலை பறிபோனாலும், வேறு வேலை வாய்ப்புகள் உருவாகும் என்று பேராசிரியர் கிஹான் டயஸ் சுட்டிக்காட்டினார்.
தீர்வு என்ன?
இன்று மட்டுமல்லாது எதிர்காலத்தையும் கருத்தில் கொண்டு முடிவுகளை எடுப்பது வேலைப் பாதுகாப்பை உறுதிப்படுத்தும் என்று பேராசிரியர் கிஹான் டயஸ் கூறினார். “இன்று மட்டுமல்ல, இன்னும் இரண்டு, மூன்று அல்லது ஐந்து ஆண்டுகளில் நிலைமை எப்படி இருக்கும், தொழில்நுட்பம் எந்தப் பக்கம் திரும்பும் என்பதை நாம் பார்க்க வேண்டும்.”
துஷேர கவுடவத்தவும் இதைப் போன்ற கருத்தைப் பகிர்ந்து கொண்டார். IT துறை மேலும் வளர்ச்சியடையும் என்றும், அதற்கு இணையாக வேலைகளுக்கான தேவையும் அதிகரிக்கும் என்றும் அவர் கூறினார்.
“அந்தத் தேவை அதிகரிப்பது தற்போதுள்ள திறன்களுக்கு அல்ல. எனவே அந்த மாற்றத்தை நாம் இப்போதே ஏற்படுத்திக்கொள்ள வேண்டும்,” என்று அவர் விளக்கினார். IT துறையின் விரிவாக்கம் காரணமாக சைபர் பாதுகாப்பு (Cyber Security) மற்றும் தரவுப் பொறியியல் (Data Engineering) போன்ற துறைகளில் வேலைகளுக்கான தேவை எதிர்காலத்தில் அதிகரிக்கும் என்று அவர் கூறினார்.
அத்துடன், இலங்கையில் அரசுத் துறை இன்னும் டிஜிட்டல் மயமாக்கப்படாத பின்னணியில், தற்போதுள்ள ஊழியர் பலம் அதற்குப் போதாது என்பது அவரது கருத்தாகும். “மருத்துவமனைகள், பாடசாலைகள் என அனைத்தும் டிஜிட்டல் மயமாக்கப்பட வேண்டும். அதற்குப் மிகப்பெரிய உழைப்பு சக்தி தேவை.”
“தற்போதுள்ள சிக்கலை வைத்துக்கொண்டு, IT சரியான பாதை அல்ல என்று முடிவெடுப்பது தவறானது. ஏனெனில் IT-க்கான தேவை தொடர்ந்து அதிகரித்துக்கொண்டே இருக்கும்,” என்று அவர் உரையாடலை நிறைவு செய்தார்.
எவ்வாறாயினும், சவால்களை ஏற்கத் தயாராக இருக்கும் மாயா போன்ற இளைஞர்கள் கூறுவது என்னவென்றால், “அநீதியான முறையில் பணிநீக்கம் செய்வதற்கு” பதிலாக, இன்னும் நியாயமான முடிவுகளை நிறுவனங்கள் எடுத்திருக்க முடியும் என்பதாகும்.
