BBC
மறைந்த பாலியல் குற்றவாளி ஜெப்ரி எப்ஸ்டீன் தொடர்பான புதிய கோப்புகளில், தனது முன்னாள் கணவரும் மைக்ரோசாப்ட் இணை நிறுவனருமான பில் கேட்ஸின் பெயர் இடம் பெற்றுள்ளது, தனது “திருமண வாழ்க்கையின் வலிமிகுந்த காலங்களை” மீண்டும் கிளறியுள்ளதாக கோடீஸ்வர பரோபகாரர் மெலிண்டா பிரெஞ்ச் கேட்ஸ் தெரிவித்துள்ளார்.
ஒரு என்.பி.ஆர் (NPR) பாட்காஸ்டில் பேசிய அவர், எப்ஸ்டீன் தொடர்பான குற்றச்சாட்டுகள் குறித்து தான் “நம்பமுடியாத சோகத்தை” உணர்வதாகவும், தனது முன்னாள் கணவர் உட்பட அந்த ஆவணங்களில் பெயரிடப்பட்டுள்ள நபர்கள் அதற்குப் பதிலளிக்க வேண்டியது அவசியம் என்றும் கூறினார்.
“இந்த அசுத்தங்களில் இருந்து விலகி இருப்பதை இட்டு நான் மிகவும் மகிழ்ச்சியடைகிறேன்,” என்று அவர் கூறினார். 27 ஆண்டுகால திருமண வாழ்க்கைக்குப் பிறகு, இந்தத் தம்பதியினர் 2021-இல் விவாகரத்து செய்தனர்.
அமெரிக்க நீதித்துறையால் வெளியிடப்பட்ட ஆவணங்களில், பில் கேட்ஸிற்கு பாலியல் ரீதியாகப் பரவும் நோய் ஏற்பட்டதாக எப்ஸ்டீன் கூறியுள்ள ஒரு குற்றச்சாட்டும் அடங்கும். இந்தக் கூற்றை பில் கேட்ஸ் “முற்றிலும் அபத்தமானது” என்று குறிப்பிட்டுள்ளார்.
“நிரூபிக்கப்பட்ட, அதிருப்தி கொண்ட ஒரு பொய்யரிடமிருந்து வந்துள்ள இந்தக் கூற்றுகள் முற்றிலும் அபத்தமானவை மற்றும் முற்றிலும் பொய்யானவை” என்று பில் கேட்ஸின் செய்தித் தொடர்பாளர் இக்குற்றச்சாட்டுகள் குறித்துத் தெரிவித்துள்ளார். இது குறித்து பிபிசி (BBC) அவரது பிரதிநிதிகளைத் தொடர்பு கொண்டுள்ளது.
எப்ஸ்டீனால் பாதிக்கப்பட்ட எவராலும் பில் கேட்ஸ் மீது தவறான நடத்தை குறித்த குற்றச்சாட்டு முன்வைக்கப்படவில்லை. மேலும் இந்த ஆவணங்களில் அவரது பெயர் இடம் பெற்றிருப்பது எந்தவொரு குற்றச் செயலையும் குறிக்காது.
என்.பி.ஆரின் ‘வைல்ட் கார்ட்’ (Wild Card) பாட்காஸ்டிற்கு அளித்த பேட்டியில் மெலிண்டா பிரெஞ்ச் கேட்ஸ் கூறியதாவது: “என்னைப் பொறுத்தவரை, அந்த விவரங்கள் வெளிவரும்போதெல்லாம் அது தனிப்பட்ட முறையில் கடினமாக இருக்கிறது, இல்லையா? ஏனெனில் அது எனது திருமணத்தின் சில மிக மிக வலிமிகுந்த காலங்களின் நினைவுகளை மீண்டும் கொண்டு வருகிறது.”
அவர் மேலும் கூறுகையில்: “அங்கே எஞ்சியிருக்கும் கேள்விகள் எதுவாக இருந்தாலும் – அவை என்னவென்று முழுமையாக என்னால் அறிய முடியாது – அந்த கேள்விகள் அந்த நபர்களுக்கும் மற்றும் எனது முன்னாள் கணவருக்குமானது. அவர்கள் அந்த விஷயங்களுக்குப் பதிலளிக்க வேண்டும், நான் அல்ல.”
அவர்களின் பிரிவுக்கு முன்பே, எப்ஸ்டீனுடனான தனது கணவரின் தொடர்பு குறித்து மெலிண்டா வருத்தமடைந்திருந்ததாக அமெரிக்க ஊடகங்கள் செய்தி வெளியிட்டிருந்தன. அவர்களின் விவாகரத்து அறிவிக்கப்பட்ட பிறகு, 2019-இல் மைக்ரோசாப்ட் ஊழியர் ஒருவருடன் தனக்கு தொடர்பு இருந்ததை பில் கேட்ஸ் ஒப்புக்கொண்டார்.
அமெரிக்க நீதித்துறையினால் கடந்த வாரம் வெளியிடப்பட்ட மூன்று மில்லியனுக்கும் அதிகமான ஆவணங்களில் பில் கேட்ஸ் குறித்த இந்த குற்றச்சாட்டுகள் இடம்பெற்றுள்ளன.
2013 ஜூலை 18-ஆம் தேதியிட்ட இரண்டு மின்னஞ்சல்கள் எப்ஸ்டீனால் உருவாக்கப்பட்டதாகத் தெரிகிறது, ஆனால் அவை கேட்ஸிற்கு அனுப்பப்பட்டதா என்பது தெளிவாகத் தெரியவில்லை. இரண்டுமே எப்ஸ்டீனின் மின்னஞ்சல் கணக்கிலிருந்து அதே கணக்கிற்கு மீண்டும் அனுப்பப்பட்டுள்ளன. கேட்ஸுடன் தொடர்புடைய மின்னஞ்சல் கணக்கு எதுவும் அதில் காணப்படவில்லை, மேலும் இரண்டு மின்னஞ்சல்களிலும் கையொப்பங்கள் இல்லை.
ஒரு மின்னஞ்சல் ‘பில் மற்றும் மெலிண்டா கேட்ஸ் அறக்கட்டளை’யிலிருந்து விலகல் கடிதம் போல எழுதப்பட்டுள்ளது. அதில் “ரஷ்யப் பெண்களுடன் உறவு கொண்டதன் விளைவுகளைச் சமாளிக்க” பில் கேட்ஸிற்கு மருந்துகளைத் தான் வாங்கிக் கொடுக்க வேண்டியிருந்தது குறித்து அவர் புகார் கூறியுள்ளார்.
“டியர் பில்” என்று தொடங்கும் மற்றொன்று, பில் கேட்ஸ் தனது நட்பை முறித்துக் கொண்டது குறித்துப் புலம்புகிறது. மேலும் பில் கேட்ஸ் தனக்கு ஏற்பட்ட பாலியல் தொற்றை அப்போதைய மனைவி மெலிண்டா உட்பட அனைவரிடமிருந்தும் மறைக்க முயன்றதாகக் கூடுதல் குற்றச்சாட்டுகளை முன்வைக்கிறது.
பல ஆண்டுகளாகவே, பில் கேட்ஸ் மற்றும் அவரது பிரதிநிதிகள் எப்ஸ்டீனுடனான தனது தொடர்பைக் குறைத்துக் கூறி வருகின்றனர். நடக்காமல் போன ஒரு அறக்கட்டளைத் திட்டம் குறித்து விவாதிக்கத் தான் “சில முறை இரவு உணவு” மட்டுமே உண்டதாக அவர் முன்னதாகக் கூறியிருந்தார்.
சமீபத்திய குற்றச்சாட்டுகளுக்குப் பிறகு, பில் கேட்ஸின் செய்தித் தொடர்பாளர் கூறியதாவது: “இந்த ஆவணங்கள் நிரூபிக்கும் ஒரே விஷயம் என்னவென்றால், கேட்ஸுடன் தொடர்ச்சியான உறவைப் பேண முடியாததால் ஏற்பட்ட எப்ஸ்டீனின் ஏமாற்றமும், அவரைச் சிக்க வைப்பதற்கும் அவதூறு செய்வதற்கும் அவர் எவ்வளவு தூரம் செல்வார் என்பதுமே ஆகும்.”
கடந்த வாரம் நீதித்துறையால் வெளியிடப்பட்ட லட்சக்கணக்கான ஆவணங்கள், மின்னஞ்சல்கள் மற்றும் புகைப்படங்கள், பிரபலங்கள், வர்த்தகத் தலைவர்கள் மற்றும் உலகத் தலைவர்களுடன் எப்ஸ்டீன் கொண்டிருந்த பரந்த தொடர்புகளை வெளிச்சம் போட்டுக் காட்டுகின்றன. 2008-ஆம் ஆண்டில் 14 வயது சிறுமியிடம் பாலியல் ரீதியாக நடந்துகொண்டதற்காக அவர் தண்டிக்கப்பட்ட பின்னரும் இந்தத் தொடர்புகள் நீடித்திருந்தன.
2019-ஆம் ஆண்டு பாலியல் கடத்தல் வழக்கு தொடர்பான விசாரணைக்காகக் காத்திருந்த நிலையில், எப்ஸ்டீன் நியூயார்க் சிறையில் காலமானார்.
