“வெட்க உணர்வு தொலைந்துவிட்டது”தன்னை குரங்காகச் சித்தரித்து ட்ரம்ப் பகிர்ந்த இனவெறி வீடியோ குறித்து ஒபாமா கருத்து

முன்னாள் அமெரிக்க ஜனாதிபதி பராக் ஒபாமா, ஜனாதிபதி டொனால்ட் ட்ரம்ப்பின் சமூக வலைதளத்தில் பகிரப்பட்ட இனவெறி கலந்த வீடியோ குறித்து தனது மௌனத்தை கலைத்துள்ளார். பிப்ரவரி 14, 2026 அன்று வெளியான ‘பிரையன் டைலர் கோஹன்’ (Brian Tyler Cohen) உடனான நேர்காணலில், அவர் இந்த விவகாரம் குறித்து மிகக் காட்டமான அதேவேளை நாகரீகமான விமர்சனங்களை முன்வைத்துள்ளார்.

• முன்னாள் அமெரிக்க ஜனாதிபதி பராக் ஒபாமா, ஜனாதிபதி டொனால்ட் ட்ரம்ப்பின் சமூக ஊடகத்தில் பகிரப்பட்ட இனவெறி வீடியோ குறித்து மறைமுகமாகப் பதிலளித்துள்ளார். ஒரு காலத்தில் பொது அதிகாரிகளை வழிநடத்திய “வெட்க உணர்வு” மற்றும் “கண்ணியம்” ஆகியவை இப்போது தொலைந்துவிட்டதாக அவர் ஒரு போட்காஸ்ட் (Podcast) நேர்காணலில் தெரிவித்துள்ளார்.

  ஒபாமா மற்றும் அவரது மனைவி மிச்சலை குரங்குகளாகச் சித்தரிக்கும் அந்த அருவருப்பான வீடியோ, ஜனநாயகக் கட்சியினர் மற்றும் குடியரசுக் கட்சியினர் என இரு தரப்பிலிருந்தும் பரவலான விமர்சனங்களைப் பெற்றுள்ளது.

  ஆரம்பத்தில் வெள்ளை மாளிகை இந்த வீடியோவைத் தற்காத்துப் பேசியதுடன், இதற்கு வரும் எதிர்ப்புகளை “போலி ஆத்திரம்” (Fake outrage) என்று அழைத்தது. பின்னர், அந்தப் பதிவு ஒரு ஊழியரால் தவறுதலாகப் பகிரப்பட்டதாகக் கூறி நீக்கப்பட்டது.

  அமெரிக்காவின் முதல் கறுப்பின ஜனாதிபதியான ஒபாமாவிடம், அரசியல் உரையாடல்களின் தரம் குறித்து லிபரல் போட்காஸ்டர் பிரையன் டைலர் கோஹன் கேள்வி எழுப்பினார். சமீபத்திய பல சர்ச்சைகளில் ஒன்றாக ட்ரம்ப்பின் இந்தப் பதிவை கோஹன் சுட்டிக்காட்டினார்.

  சர்ச்சைக்குரிய வீடியோவின் பின்னணி

  “The Lion Sleeps Tonight” என்ற பாடலுடன் அமைக்கப்பட்ட அந்த வீடியோ கிளிப், 2020 தேர்தலில் வாக்கு மோசடி நடந்ததாக ஆதாரமற்ற குற்றச்சாட்டுகளைக் கொண்ட ட்ரம்ப்பின் ‘Truth Social’ கணக்கில் பகிரப்பட்ட வீடியோவின் இறுதியில் இணைக்கப்பட்டிருந்தது.

  இந்த பதிவு, ட்ரம்ப்பின் குடியரசுக் கட்சியைச் சேர்ந்த மூத்த உறுப்பினர்கள் உட்பட அரசியல்வாதிகளிடையே கடும் கொந்தளிப்பை ஏற்படுத்தியது. ஒரே ஒரு கறுப்பின குடியரசுக் கட்சி செனட்டரான டிம் ஸ்காட் (Tim Scott), இதனை “இந்த வெள்ளை மாளிகையிலிருந்து நான் பார்த்த மிகவும் இனவெறி பிடித்த செயல்” என்று வர்ணித்தார்.

  இந்த வீடியோ கிளிப், கறுப்பின மக்களை குரங்குகளுடன் ஒப்பிடும் இனவெறி கேலிச்சித்திரங்களை நினைவுபடுத்துகிறது. இது கடந்த அக்டோபரில் ‘Xerias’ என்ற பழமைவாத மீம் (Meme) உருவாக்குநரால் பகிரப்பட்ட பதிவிலிருந்து எடுக்கப்பட்டதாகத் தெரிகிறது.

  இந்த வீடியோவின் ஒரு பகுதியில் ஒபாமா தம்பதியினர் காட்டப்பட்டதை தான் “பார்க்கவில்லை” என்று ட்ரம்ப் செய்தியாளர்களிடம் கூறினார். மன்னிப்பு கேட்கத் திட்டமிட்டுள்ளீர்களா என்று கேட்டதற்கு, “நான் எந்தத் தவறும் செய்யவில்லை” என்று அவர் பதிலளித்தார்.

  ஒபாமாவின் பதில்

  ஒபாமா பங்கேற்ற 47 நிமிட போட்காஸ்ட் சனிக்கிழமை வெளியிடப்பட்டது. நேர்காணலின் தொடக்கத்தில், அமெரிக்க அரசியல் உரையாடல் குறித்து கேட்டபோது, அது “நாம் இதுவரை கண்டிராத அளவிலான குரூரமான நிலைக்குச் சரிந்துவிட்டது” என்று ஒபாமா கூறினார்.

  குடியேற்ற மற்றும் சுங்க அமலாக்கப் பிரிவின் (ICE) நடவடிக்கைகளால் பாதிக்கப்பட்டவர்களை “உள்நாட்டுப் பயங்கரவாதிகள்” என்று வெள்ளை மாளிகை கூறுவதையும், சமீபத்தில் டொனால்ட் ட்ரம்ப் ஒபாமாவின் முகத்தை ஒரு குரங்கின் உடலில் ஒட்டிப் பகிர்ந்ததையும் கோஹன் சுட்டிக்காட்டினார்.

  அதற்கு பதிலளித்த ஒபாமா:

  “பெரும்பான்மையான அமெரிக்க மக்கள் இத்தகைய நடத்தையை மிகவும் வருத்தமளிப்பதாகக் கருதுகிறார்கள் என்பதை அங்கீகரிப்பது முக்கியம். இத்தகைய செயல்கள் கவனத்தை ஈர்க்கின்றன என்பது உண்மைதான். இது ஒரு திசைதிருப்பல் (Distraction) என்பதும் உண்மைதான்.”

  ஆனால், அமெரிக்கா முழுவதும் பயணம் செய்யும் போது, தான் இன்னும் “கண்ணியம், நாகரீகம் மற்றும் இரக்கம்” ஆகியவற்றில் நம்பிக்கை கொண்ட மக்களைச் சந்திப்பதாக ஒபாமா கூறினார்.

  அவர் மேலும் கூறுகையில்:

  “சமூக ஊடகங்களிலும் தொலைக்காட்சிகளிலும் ஒருவித கோமாளித்தனமான காட்சி (Clown show) நடந்து கொண்டிருக்கிறது. ஒரு காலத்தில் கண்ணியம், ஒழுக்கம் மற்றும் தான் வகிக்கும் பதவிக்கு மரியாதை இருக்க வேண்டும் என்று நினைத்தவர்களிடம், இப்போது அதைப் பற்றிய எந்த வெட்க உணர்வும் இருப்பதாகத் தெரியவில்லை. அந்தப் பண்பு இப்போது தொலைந்துவிட்டது.”

  தனது பதிலில் அவர் ட்ரம்ப்பின் பெயரை நேரடியாகக் குறிப்பிடவில்லை.

  இந்த நேர்காணலின் போது ஒபாமா பல்வேறு விடயங்களைப் பற்றிப் பேசினார். குடியேற்ற நடவடிக்கைகளுக்கு எதிராக அமைதியாகப் போராடும் போராட்டக்காரர்களைப் பாராட்டினார், தேர்தல் தொகுதி மறுசீரமைப்பு குறித்து விவாதித்தார் மற்றும் அடுத்த ஆண்டு சிகாகோவில் திறக்கப்படவுள்ள தனது ஜனாதிபதி நூலகம் குறித்தும் பேசினார்