இந்தியப் பிரதமர் நரேந்திர மோடியின் விசேட அழைப்பின் பேரில், புதுடெல்லியில் நடைபெறவுள்ள ‘AI Impact 2026’ உச்சிமாநாட்டில் பங்கேற்பதற்காக அங்கு சென்றுள்ள ஜனாதிபதி அநுர குமார திஸாநாயக்க, இன்று (18) முதல் 20ஆம் திகதி வரை தொடர்ச்சியான உயர்மட்டச் சந்திப்புகளை நடத்தவுள்ளார்.
இன்றைய முக்கிய சந்திப்புகள்:
-
அமெரிக்கப் பிரதிநிதியுடன் சந்திப்பு: இன்று காலை, அமெரிக்க ஜனாதிபதி டொனால்ட் ட்ரம்பின் தெற்கு மற்றும் மத்திய ஆசியாவிற்கான விசேட பிரதிநிதி செர்ஜியோ கோர் (Sergio Gor) மற்றும் இந்தியாவுக்கான அமெரிக்க தூதுவர் ஆகியோரை ஜனாதிபதி சந்தித்துப் பேச்சுவார்த்தை நடத்தினார். இதன்போது பிராந்திய ஒத்துழைப்பு மற்றும் பரஸ்பர நலன்கள் குறித்து கலந்துரையாடப்பட்டது.
-
பிரதமர் மோடியின் இராப்போசன விருந்து: உச்சிமாநாட்டில் பங்கேற்க வந்துள்ள உலகத் தலைவர்களுக்காக பிரதமர் நரேந்திர மோடி இன்று மாலை ஏற்பாடு செய்துள்ள விசேட இராப்போசன விருந்துபசாரத்தில் ஜனாதிபதி கலந்து கொள்ளவுள்ளார்.
AI Impact 2026 உச்சிமாநாடு:
மனிதகுலத்தின் நலனுக்காக செயற்கை நுண்ணறிவை (Artificial Intelligence) பொறுப்புடன் பயன்படுத்துவதை ஊக்குவிக்கும் நோக்கில் இந்த உச்சிமாநாடு புதுடெல்லியில் உள்ள பாரத் மண்டபத்தில் (Bharat Mandapam) நடைபெறுகிறது.
-
ஜனாதிபதியின் உரை: ஜனாதிபதி அநுர குமார திஸாநாயக்க நாளை (19) உச்சிமாநாட்டில் உரையாற்றவுள்ளார்.
-
இருதரப்புப் பேச்சுவார்த்தைகள்: பிரதமர் மோடியுடன் விசேட இருதரப்புப் பேச்சுவார்த்தைகளை நடத்தவுள்ளதுடன், உச்சிமாநாட்டில் பங்கேற்கும் ஏனைய உலகத் தலைவர்களுடனும் அவர் கலந்துரையாடல்களை முன்னெடுக்கவுள்ளார்.
