-
ஈரானுக்கு எதிரான இராணுவ நடவடிக்கையை இன்னும் குறைந்தது மூன்று வாரங்களுக்குத் தொடர இஸ்ரேல் இராணுவம் திட்டமிட்டுள்ளது. இன்னும் “ஆயிரக்கணக்கான இலக்குகள்” எஞ்சியுள்ளதாக இஸ்ரேல் பாதுகாப்புப் படைகளின் (IDF) பேச்சாளர் பிரிகேடியர் ஜெனரல் எஃபி டெஃப்ரின் இன்று சிஎன்என் (CNN) செய்தி நிறுவனத்திடம் தெரிவித்தார்.
“எங்களுக்கு முன்னால் இன்னும் ஆயிரக்கணக்கான இலக்குகள் உள்ளன. எங்களது அமெரிக்க நட்பு நாடுகளுடன் ஒருங்கிணைந்து, குறைந்தது இன்னும் மூன்று வாரங்களில் வரவிருக்கும் யூதர்களின் ‘பாஸோவர்’ (Passover) விடுமுறை வரை இந்தத் திட்டங்களைச் செயல்படுத்த நாங்கள் தயாராக உள்ளோம். அதற்குப் பிந்தைய அடுத்த மூன்று வாரங்களுக்கும் எங்களிடம் ஆழமான திட்டங்கள் உள்ளன,” என்று அவர் கூறினார்.
இஸ்ரேல் பாதுகாப்புப் படைகளின் கூற்றுப்படி, பிப்ரவரி 28 அன்று ஈரானுக்கு எதிரான போர் தொடங்கியதிலிருந்து, இஸ்ரேலிய விமானப்படை மேற்கு மற்றும் மத்திய ஈரானில் சுமார் 400 முறை வான்வழித் தாக்குதல்களை நடத்தியுள்ளது. இவை உள்கட்டமைப்புகளை அழிப்பதிலும், பாதுகாப்பு மற்றும் உற்பத்தி பிரிவுகளின் செயல்பாட்டாளர்களைக் குறிவைப்பதிலும் கவனம் செலுத்துகின்றன.
அமெரிக்காவும் இஸ்ரேலும் போர் தொடங்கியதிலிருந்து ஏற்கனவே ஆயிரக்கணக்கான இலக்குகளைத் தாக்கியுள்ளதாக இஸ்ரேலிய அதிகாரிகள் தெரிவிக்கின்றனர்.
மேலும், எஃபி டெஃப்ரின் கூறுகையில், இஸ்ரேல் இராணுவம் காலக்கெடுவை அடிப்படையாகக் கொண்டு செயல்படவில்லை என்றும், “ஈரானிய ஆட்சியை கடுமையாக பலவீனப்படுத்துவது” என்ற இலக்கை அடைவதற்காகவே செயல்படுவதாகவும் குறிப்பிட்டார்.
ஈரானுக்கு எதிரான இந்த பாரிய அமெரிக்க-இஸ்ரேலிய தாக்குதலால், லெபனானின் ஹிஸ்புல்லா அமைப்பு இந்த மோதலில் இணைந்துள்ளதாக அவர் கூறினார். கடந்த கோடையில் நடந்த 12 நாள் போரின்போது ஹிஸ்புல்லா விலகி இருக்கத் தீர்மானித்தது குறிப்பிடத்தக்கது. “ஜூன் மாதம், இது ஈரானுக்குள் ஒரு மட்டுப்படுத்தப்பட்ட நடவடிக்கை என்பதை அவர்கள் புரிந்து கொண்டனர், அதனால் அவர்கள் தாக்கவில்லை. இப்போது இது ஒரு முழுமையான போர் என்பதால் அவர்கள் இணைந்துள்ளனர்,” என்று டெஃப்ரின் விளக்கினார்.
ஈரானில் போர் முடிவடைந்த பின்னரும் லெபனானில் இஸ்ரேலின் இராணுவ நடவடிக்கைகள் தொடரலாம் என்று அதிகாரிகள் கூறுகின்றனர். ஹிஸ்புல்லா அமைப்பை பின்னுக்குத் தள்ளி அந்தப் பகுதிகளைக் கைப்பற்றும் முயற்சியாக, இஸ்ரேல் தனது வடக்கு எல்லைக்கு மேலதிகப் படைகளை அனுப்பி வருகிறது
