மத்திய கிழக்கில் நிலவும் போர்ச் சூழலுக்கு மத்தியில், உருவாகி வரும் நிலைமைகளை முன்கூட்டியே முழுமையாகக் கணிக்க முடியாது என்று ஜனாதிபதி அநுர குமார திஸாநாயக்க தெரிவித்துள்ளார். எனவே, நாட்டின் முன்னேற்றங்களைத் தொடர்ச்சியாகக் கண்காணித்து, இந்தச் சவால்களைக் கூட்டாக எதிர்கொள்ள வேண்டியதன் அவசியத்தை அவர் வலியுறுத்தினார்.
தற்போதைய சூழ்நிலையில் அத்தியாவசிய பொதுச் சேவைகளைப் பராமரிப்பதில் எழும் சிக்கல்கள் குறித்து விவாதிப்பதற்காக, சம்பந்தப்பட்ட அமைச்சுகளின் செயலாளர்கள் மற்றும் நிறுவனத் தலைவர்களுடன் இன்று (15) ஜனாதிபதி அலுவலகத்தில் நடைபெற்ற கூட்டத்தின் போதே அவர் இவ்வாறு குறிப்பிட்டார்.
கல்வி போன்ற துறைகளின் செயல்பாடுகளைத் தொடர்வது குறித்தும் இக்கூட்டத்தில் ஆலோசிக்கப்பட்டது. அத்தியாவசியச் சேவைகள் தொடர்வதை உறுதி செய்யும் அதேவேளை, முறையான எரிபொருள் ஒதுக்கீட்டு முறையை நிறுவி, ‘வீட்டிலிருந்தே பணிபுரியும்’ (Work from home) நடைமுறைச் சாத்தியக்கூறுகள் குறித்து ஆராயுமாறு அதிகாரிகளுக்கு ஜனாதிபதி உத்தரவிட்டார் என ஜனாதிபதி ஊடகப் பிரிவு தெரிவித்துள்ளது.
தடையற்ற சேவை வழங்கலை உறுதி செய்வதற்காக அத்தியாவசிய எரிபொருளின் பிராந்திய இருப்புக்களை (Regional reserves) பராமரிப்பதற்கான சாத்தியக்கூறுகளை ஆய்வு செய்யுமாறு அதிகாரிகளுக்கு ஜனாதிபதி அறிவுறுத்தினார்.
கூடுதலாக, விவசாயம், மீன்பிடி மற்றும் கைத்தொழில் துறைகளுக்கான எரிபொருள் விநியோகத்தை எளிதாக்குவதற்கு டிஜிட்டல் QR குறியீடு (Digital QR code) முறையை நடைமுறைப்படுத்த வேண்டிய அவசரத் தேவையை ஜனாதிபதி அநுர குமார திஸாநாயக்க சுட்டிக்காட்டினார். இந்த முறையை தாமதமின்றி செயல்பாட்டிற்கு கொண்டு வர வேண்டும் என்றும் அவர் வலியுறுத்தினார்.
