இந்திய அமைதிப்படை இலங்கையிலிருந்து திரும்பிய நாள் இன்று- உங்கள் தமிழ் சகோதாரர்களுக்கு எதிராக செயற்பட இந்திய படைகளை அனுப்பினீர்கள்-ராஜீவ்காந்தியின் இராஜதந்திர அணுகுமுறை குறித்து பாஜக நாடாளுமன்ற உறுப்பினர் கேள்வி

புது டெல்லி, 2024 மார்ச் 24

முன்னாள் பிரதமர் ராஜீவ் காந்தி தலைமையிலான அன்றைய அரசாங்கத்தின் இராஜதந்திர அணுகுமுறையை, இலங்கையுடனான வரலாற்று நிகழ்வுகளைக் குறிப்பிட்டு பாஜக நாடாளுமன்ற உறுப்பினர் நிஷிகாந்த் துபே செவ்வாய்க்கிழமை கேள்வி எழுப்பினார்.

முன்னாள் இலங்கை ஜனாதிபதி ரணசிங்க பிரேமதாசா, ராஜீவ் காந்திக்கு மிகவும் காட்டமான கடிதம் ஒன்றை எழுதியிருந்ததாக அவர் குறிப்பிட்டார். அந்த கடிதத்தில், பொருத்தமற்ற கொள்கைகள் பின்பற்றப்படுவதாகவும், இந்திய வீரர்களின் நடவடிக்கைகள் சரியாக இல்லை என்றும், அமைதி பேணப்படுவதற்குப் பதிலாக மோதல்கள் தீவிரமடைந்து வருவதாகவும் குற்றம் சாட்டப்பட்டிருந்ததாக அவர் கூறினார்.

செய்தியாளர்களிடம் பேசிய துபே, “இந்திய அமைதி காக்கும் படை (IPKF) இலங்கையிலிருந்து திரும்பிய நாளான மார்ச் 24, 1990-ஐ இன்று குறிக்கிறது. அந்த நேரத்தில் நாம் பெரும் இழப்புகளைச் சந்தித்தோம்,” என்றார்.

அவர் மேலும் கூறுகையில், “அக்காலப்பகுதியில் தற்போதைய வெளியுறவுத்துறை அமைச்சர் எஸ். ஜெய்சங்கர் உள்ளிட்ட அதிகாரிகள் அங்கு பணியில் இருந்தனர். முன்னதாக, 1989-ல் இலங்கை ஜனாதிபதி பிரேமதாசா, அன்றைய பிரதமர் ராஜீவ் காந்திக்கு எழுதிய கடிதத்தில், தவறான கொள்கைகள் பின்பற்றப்படுவதாகவும், இராணுவத்தின் செயல்பாடுகள் முறையாக இல்லை என்றும், அமைதிக்கு மாறாக மோதல்களே நடப்பதாகவும் கடுமையாகச் சாடியிருந்தார்,” எனத் தெரிவித்தார்.

முந்தைய நிகழ்வுகளைக் குறிப்பிட்ட துபே, “ஆராய்ச்சிகளை மேற்கொள்ளும்போது, இதே மார்ச் 24, 1971 அன்று இந்திய இராணுவம் கொழும்புக்கு அனுப்பப்பட்டதைக் காண முடிகிறது. அன்றைய இலங்கை பிரதமர் சிறிமாவோ பண்டாரநாயக்க, இந்திரா காந்திக்கு ஒரு கடிதம் எழுதியிருந்தார். இந்தியாவில் 1974-75 காலப்பகுதியில் மாணவர் போராட்டங்கள் நடந்தது போலவே, அங்கேயும் போராட்டங்கள் நடந்தன,” என்றார்.

“1971-ல் இந்திய இராணுவம் மற்றொரு நாட்டின் உள்விவகாரங்களில் தலையிட்டதை நீங்கள் புரிந்து கொள்ள வேண்டும். பின்னர், இந்தியா பாகிஸ்தானுடன் போர் புரிந்து வங்கதேசம் சுதந்திரம் பெற்றபோது, இலங்கை பாகிஸ்தானுக்குப் பாதுகாப்பான பாதையை (safe passage) வழங்கியது. இது என்ன மாதிரியான இராஜதந்திரம்? உங்கள் ‘தமிழ் சகோதரர்களுக்கு’ எதிராகச் செயல்பட இந்திய இராணுவத்தை அனுப்பினீர்கள். 1987 முதல் 1990 வரை பல தமிழர்களும் இந்தியர்களும் கொல்லப்பட்டனர்,” என்று அவர் மேலும் விமர்சித்தார்.

இன்று காலை ‘X’ சமூக வலைதளத்தில் பதிவிட்ட துபே, இந்த நிகழ்வை காங்கிரஸ் கட்சியின் “கருப்பு அத்தியாயம்” என்று வர்ணித்தார்.

அவரது பதிவின் சுருக்கம்: “காங்கிரஸின் கருப்பு அத்தியாயம் 8. இன்று, மார்ச் 24, 1990 அன்று, இந்திய இராணுவம் தோற்கடிக்கப்பட்டு, இலங்கையிலிருந்து வலுக்கட்டாயமாக வெளியேற்றப்பட்டுத் திரும்பியது. இந்திய இராணுவத்தின் கடைசிப் பிரிவை வழிநடத்தி அனுப்பியவர்களில், அப்போது இலங்கையில் பணியிலிருந்த நமது தற்போதைய வெளியுறவு அமைச்சர் டாக்டர் ஜெய்சங்கரும் ஒருவர்.

அன்றைய பிரதமர் ராஜீவ் காந்தியின் பிடிவாதம் மற்றும் வெறி காரணமாக, 1987-ல் இந்திய இராணுவம் தனது சொந்த தமிழ் சகோதரர்களைக் கொல்ல இலங்கைக்குள் வலுக்கட்டாயமாக நுழைந்தது. காந்தி குடும்பத்தின் இந்த பிடிவாதம் புதியதல்ல. முன்னதாக, 1971 மார்ச் 24 அன்று, இந்திரா காந்தி அங்குள்ள மாணவர் இயக்கத்தின் மீது துப்பாக்கிச் சூடு நடத்த இந்திய இராணுவத்தை இலங்கைக்கு அனுப்பினார். இருப்பினும், 1971 பாகிஸ்தான் போரின் போது இலங்கை பாகிஸ்தானை ஆதரித்தது. 1987 முதல் 1990 வரை ஆயிரக்கணக்கான நமது வீரர்கள் கொல்லப்பட்டனர்.

அன்றைய இலங்கை ஜனாதிபதி பிரேமதாசா, இந்திய வீரர்கள் மீது பல்வேறு குற்றச்சாட்டுகளை முன்வைத்து ராஜீவ் காந்திக்கு கடிதம் எழுதினார். முதல்முறையாக, ஒரு இந்தியப் பிரதமர் வெளிநாட்டு மண்ணில் தாக்கப்பட்டார்…” என்று அவர் குறிப்பிட்டுள்ளார்