(Catherine Nicholls) CNN
கடந்த பெப்ரவரி 28 அன்று தொடங்கிய மத்திய கிழக்கு மோதல்களில் இதுவரை ஆயிரக்கணக்கான மக்கள் கொல்லப்பட்டுள்ளதாக பிராந்திய அதிகாரிகளால் வெளியிடப்பட்ட இறப்பு எண்ணிக்கைகளின் அடிப்படையில் சிஎன்என் (CNN) தொகுத்துள்ள தரவுகள் தெரிவிக்கின்றன.
யுத்தம் தொடங்கியதில் இருந்து கொல்லப்பட்டவர்களின் எண்ணிக்கை குறித்து அந்தந்த நாட்டு அதிகாரிகள் வெளியிட்டுள்ள விபரங்கள் வருமாறு (இந்த எண்களை சிஎன்என் தனிப்பட்ட முறையில் சரிபார்க்கவில்லை):
-
ஈரான்: பெப்ரவரி 28 முதல் ஈரான் மீது நடத்தப்பட்ட தாக்குதல்களில் குறைந்தது 1,900 பேர் கொல்லப்பட்டுள்ளதாக ஈரானிய ரெட் கிரசண்ட் (Red Crescent) வெள்ளிக்கிழமை தெரிவித்துள்ளது. மார்ச் 16 அன்று ஈரானிய வெளிவிவகார அமைச்சர் கூறுகையில், மோதல் தொடங்கியதில் இருந்து 200க்கும் மேற்பட்ட குழந்தைகள் உட்பட “நூற்றுக்கணக்கான ஈரானிய சிவிலியன்கள்” கொல்லப்பட்டுள்ளதாகத் தெரிவித்தார்.
-
லெபனான்: மார்ச் 2 முதல் லெபனான் மீது இஸ்ரேல் நடத்திய தாக்குதல்களில் குறைந்தது 1,247 பேர் கொல்லப்பட்டுள்ளதாக அந்நாட்டு சுகாதார அமைச்சின் இன்றைய புதுப்பிப்பு தெரிவிக்கிறது. கொல்லப்பட்டவர்களில் குறைந்தது 124 குழந்தைகள் அடங்குவர் என அமைச்சகம் நேற்று குறிப்பிட்டிருந்தது.
-
ஈராக்: போர் தொடங்கியதில் இருந்து ஈராக் முழுவதும் குறைந்தது 101 பேர் கொல்லப்பட்டுள்ளதாக அதிகாரிகள் தெரிவித்துள்ளனர். இதில் அரை தன்னாட்சி பெற்ற குர்திஸ்தான் பிராந்தியத்தில் மட்டும் குறைந்தது 13 பேர் கொல்லப்பட்டுள்ளதாக அந்த பிராந்திய அரசாங்கம் தெரிவித்துள்ளது.
-
இஸ்ரேல்: மோதல் தொடங்கியதில் இருந்து இஸ்ரேலுக்குள் சுமார் 19 சிவிலியன்கள் கொல்லப்பட்டுள்ளனர் (நேரடித் தாக்குதல்கள் அல்லாத உயிரிழப்புகள் இதில் சேர்க்கப்படவில்லை). அத்துடன் தெற்கு லெபனானில் 6 இஸ்ரேலிய இராணுவத்தினர் கொல்லப்பட்டுள்ளதாக இஸ்ரேலிய இராணுவம் தெரிவித்துள்ளது.
-
அமெரிக்கா: ஈரானுடனான அமெரிக்கப் போர் தொடங்கி ஒரு மாதமாகியுள்ள நிலையில், இதுவரை 13 அமெரிக்க சேவை உறுப்பினர்கள் (Service members) கொல்லப்பட்டுள்ளதாக அமெரிக்க மத்திய கட்டளைப் பணியகம் (US Central Command) தெரிவித்துள்ளது.
மேலும், ஐக்கிய அரபு அமீரகம், கத்தார், குவைத், ஆக்கிரமிக்கப்பட்ட மேற்குக் கரை, ஓமான், பஹ்ரைன் மற்றும் சவூதி அரேபியா ஆகிய நாடுகளிலும் பெப்ரவரி 28 முதல் மோதல் தொடர்பான உயிரிழப்புகள் பதிவாகியுள்ளதாக உள்ளூர் அதிகாரிகள் தெரிவிக்கின்றனர்.
