இலங்கைக்குள் போதைப்பொருட்களைக் கடத்தி வருவதற்கு, சிறுவர்கள், முதியவர்கள் மற்றும் தீவிர மருத்துவ நிலைமைகளைக் கொண்ட நபர்களைப் போதைப்பொருள் கடத்தல் வலைப்பின்னல்கள் அதிகளவில் பயன்படுத்தி வருவதாக இலங்கை சுங்கத்துறை தெரிவித்துள்ளது.
போதைப்பொருள் கடத்தலின் சமீபத்திய போக்குகள் குறித்துப் பேசிய சுங்க போதைப்பொருள் கட்டுப்பாட்டுப் பிரிவின் பிரதிப் பணிப்பாளர் நுவான் அபேநாயக்க, கடந்த சில வாரங்களில் இந்த முறைமை மிகவும் வெளிப்படையாகத் தெரியவந்துள்ளது என்று கூறினார்.
“கடந்த ஒன்று அல்லது இரண்டு வாரங்களில், போதைப்பொருள் கடத்தல் நடவடிக்கைகளுக்கு இளைஞர்களையும் குறிப்பிட்ட நோய்களால் பாதிக்கப்பட்ட நபர்களையும் பயன்படுத்தும் போக்கை நாங்கள் அவதானித்துள்ளோம்” என்று அவர் தெரிவித்தார்.
அபேநாயக்கவின் கூற்றுப்படி, சிறுவர்கள், முதியவர்கள் அல்லது மாற்றுத்திறனாளிகளைப் பயன்படுத்துவதன் மூலம் சட்டத்தை நடைமுறைப்படுத்தும் அதிகாரிகளின் சோதனைகளில் இருந்து தப்பிக்க முடியும் என கடத்தல்காரர்கள் நம்புகின்றனர்.
“சிறுவர்கள், முதியவர்கள் அல்லது சிறப்பு மருத்துவ நிலைமைகளைக் கொண்ட நபர்களைப் பயன்படுத்துவதன் மூலம் அதிகாரிகளைத் திசைதிருப்பி, போதைப்பொருட்களை நாட்டுக்குள் மிக எளிதாகக் கொண்டு வர முடியும் என்று கடத்தல்காரர்கள் நினைக்கிறார்கள். இருப்பினும், விமான நிலையத்தில் அமல்படுத்தப்பட்டுள்ள புதிய நடைமுறைகளின் கீழ், எங்களால் அவர்களை அடையாளம் காண முடிகிறது” என்று அவர் கூறினார்.
சமீபத்தில் ஆப்பிரிக்க நாடுகளிலிருந்து வருகை தந்த சந்தேக நபர்கள் பலரைச் சுங்கத்துறை அதிகாரிகள் கைது செய்துள்ளதாகவும், அவர்களில் எச்.ஐ.வி (HIV) தொற்றால் பாதிக்கப்பட்ட 79 வயதான அங்கோலா பெண் ஒருவரும் அடங்குவார் என்றும் அவர் வெளிப்படுத்தினார்.
“எங்களது விசாரணைகளின் போது, அவர்களிடம் இருந்த மருத்துவ அறிக்கைகள் மற்றும் மருந்துகள் மூலம் அவர்களின் சுகாதார நிலைமைகளை எங்களால் அடையாளம் காண முடிந்தது” என்று அவர் கூறினார்.
இருப்பினும், இதேபோன்ற முறையில் இலங்கை பிரஜைகள் பயன்படுத்தப்பட்ட சம்பவங்களைச் சுங்கத்துறை இதுவரை சந்திக்கவில்லை என்றும் அபேநாயக்க சுட்டிக்காட்டினார்.
மேலும், நாட்டுக்குள் போதைப்பொருட்களைக் கடத்துவதற்குப் பயன்படுத்தப்படும் புதிய முறைகளை அதிகாரிகள் அடையாளம் கண்டுள்ளதாகவும், நுழைவாயில்களில் சோதன நடவடிக்கைகளைத் தொடர்ந்து வலுப்படுத்தி வருவதாகவும் அவர் தெரிவித்தார்.
