இலங்கையின் முக்கிய பௌத்த பீடங்களின் மகாநாயக்க தேரர்கள் கூட்டாக அறிக்கை ஒன்றை வெளியிட்டுள்ளனர். அதில், வெலிகம அத்தத்தே ஞானசார தேரருக்கு ஜனாதிபதி பொதுமன்னிப்பு வழங்குமாறு கோரி இடம்பெறும் போராட்டங்களுக்கு மத்தியில், பௌத்த துறவிகளுக்கான துறவு ஒழுக்கத்தைப் பேணவும், பிக்குகளுக்கு வழங்கப்பட்டுள்ள கௌரவத்தையும் மரியாதையையும் பாதுகாக்குமாறும் மகா சங்கத்தினரை வலியுறுத்தியுள்ளனர்.
அக்டோபர் 25 ஆம் திகதியிடப்பட்ட இந்த அறிக்கை, மல்வத்து மற்றும் அஸ்கிரிய பீடங்கள், அமரபுர மகா நிகாய மற்றும் ராமபுர மகா நிகாய ஆகியவற்றின் மகாநாயக்க தேரர்களின் கையொப்பத்துடன் வெளியிடப்பட்டுள்ளது.
பௌத்த சாசனத்தின் கௌரவத்தைப் பேணுவதும், மகா சங்கத்தினருக்கு பாரம்பரியமாக வழங்கப்பட்டு வரும் மரியாதையைப் பாதுகாப்பதும் எவ்வளவு முக்கியம் என்பதை மூத்த பௌத்த தலைவர்கள் வலியுறுத்தியுள்ளனர்.
போராட்டங்கள் மற்றும் ஏனைய செயற்பாடுகளின் போது ஒழுக்கத்தைக் கடைப்பிடிப்பதும், பௌத்த துறவு பாரம்பரியங்களுக்கு இணங்கச் செயற்படுவதன் அவசியத்தையும் அவர்கள் சுட்டிக்காட்டினர்.
இந்த அறிக்கையைத் தொடர்ந்து, கொழும்பு விகாரமகாதேவி பூங்காவில் சத்யக்கிரகப் போராட்டத்தில் ஈடுபட்டு வந்த பௌத்த பிங்குகள், கடந்த 10 நாட்களாகத் தொடர்ந்து நடைபெற்று வந்த தமது போராட்டத்தை தற்காலிகமாக இடைநிறுத்த முடிவு செய்துள்ளனர்.
வெலிகம ஞானசார தேரரின் விடுதலையை அரசாண்டுடன் பேச்சுவார்த்தை நடத்தி உறுதி செய்வதற்கான நடவடிக்கைகள் எடுக்கப்பட்டு வருவதாக மகாநாயக்க தேரர்கள் எழுத்துமூலம் அறிவித்ததை அடுத்து இந்த முடிவு எடுக்கப்பட்டதாக உலாபனே சுமங்கல தேரர் தெரிவித்தார்.
