ஹம்பாந்தோட்டை சர்வதேச துறைமுக விற்பனைக்கு எதிராக நடத்தப்பட்ட போராட்டத்தின் போது கைது செய்யப்பட்ட 41 சந்தேகநபர்களுக்கு எதிராகத் தாக்கல் செய்யப்பட்ட வழக்கு, இன்று ஹம்பாந்தோட்டை பிரதான நீதவான் நீதிமன்றத்தில் எடுத்துக்கொள்ளப்பட்டது.
இந்த வழக்கை ஹம்பாந்தோட்டை மேல் நீதிமன்றத்திற்கு அனுப்பி வைத்து, எதிர்வரும் நவம்பர் 16 ஆம் திகதி சந்தேகநபர்களுக்குக் குற்றப்பத்திரிகைகளை வழங்குமாறு ஹம்பாந்தோட்டை பிரதான நீதவான் இசுரு நெத்திகுமார உத்தரவிட்டார்.
பாராளுமன்ற உறுப்பினர் நாமல் ராஜபக்ஷ உள்ளிட்ட 41 பேர் இவ்வழக்கில் சந்தேகநபர்களாகப் பெயரிடப்பட்டுள்ளனர்.
பாராளுமன்ற உறுப்பினர் டி.வி. சானக்க, முன்னாள் பாராளுமன்ற உறுப்பினர்களான உபாலி கொடிகார மற்றும் பிரசன்ன ரணவீர, முன்னாள் மாகாண சபை உறுப்பினர் அஜித் பிரசன்ன உள்ளிட்ட 35 பிரதிவாதிகள் இன்று நீதிமன்றத்தில் ஆஜராகியிருந்தனர்.
கடந்த பத்து வருடங்களாகப் நிலுவையில் இருந்த இந்த வழக்கை ஹம்பாந்தோட்டை நீதவான் நீதிமன்றத்தில் முடிவுக்குக் கொண்டுவந்து, மேல் நீதிமன்றத்திற்கு அனுப்பி வைக்க நடவடிக்கைகள் எடுக்கப்பட்டதாக ஹம்பாந்தோட்டை பிரதான நீதவான் சுட்டிக்காட்டினார்.
மேலும், தற்போது விளக்கமறியலில் உள்ள நாமல் ராஜபக்ஷவுக்குக் குற்றப்பத்திரிகைகளை வழங்குவதற்காக எதிர்வரும் 16 ஆம் திகதி மேல் நீதிமன்றத்தில் ஆஜர்ப்படுத்துமாறு சிறைச்சாலை அதிகாரிகளுக்குப் பிரதான நீதவான் உத்தரவிட்டார்.
