முன்னாள் அமைச்சர்கள் 16 பேருக்கு எதிராக அதிகாரம் தவறாகப் பயன்படுத்தப்பட்டமை மற்றும் நிதி முறைகேடுகள் தொடர்பான குற்றச்சாட்டுகள் குறித்து விசாரணைகள் இடம்பெறுகின்றன
முன்னாள் அமைச்சர்கள் மற்றும் பாராளுமன்ற உறுப்பினர்கள் உட்பட சுமார் 20 அரசியல்வாதிகளின் சொத்துக்கள் தொடர்பான விசாரணை தொடர்பான ஆவணங்களைப் பொலிஸ் சொத்து விசாரணைப் பிரிவு, இலஞ்ச ஊழல் பற்றிய குற்றச்சாட்டுகளை விசாரணை செய்வதற்கான ஆணைக்குழுவிடம் (CIABOC) ஒப்படைத்துள்ளது
பொலிஸ் விசாரணைகளின் போது கண்டறியப்பட்ட அனைத்துத் தகவல்களும் இலஞ்ச ஊழல் ஆணைக்குழுவிற்கு அனுப்பி வைக்கப்பட்டுள்ளதாகப் பொதுப்பாதுகாப்பு மற்றும் பாராளுமன்ற விவகார அமைச்சர் ஆனந்த விஜேபால தெரிவித்துள்ளார்.
இதனிடையே, 55 க்கும் மேற்பட்ட அரசியல்வாதிகள் சம்பந்தப்பட்ட இலஞ்சம் மற்றும் ஊழல் குற்றச்சாட்டுகள் குறித்து இலஞ்ச ஊழல் ஆணைக்குழு தனியாக விசாரணைகளை முன்னெடுத்துள்ளது
, கிட்டத்தட்ட 60 அரசியல்வாதிகள் மற்றும் முன்னாள் அமைச்சர்கள் உட்பட நாடு முழுவதும் 500 க்கும் மேற்பட்ட நபர்களின் சொத்துக்கள் குறித்தும் விசாரணைகள் முன்னெடுக்கப்பட்டு வருகின்றன.
குறிப்பாக, அதிகாரம் தவறாகப் பயன்படுத்தப்பட்டமை மற்றும் நிதி முறைகேடுகள் தொடர்பாக முன்னாள் அமைச்சர்கள் 16 பேர் மீதான விசாரணைகள் மிக முக்கியமானவையாகக் கருதப்படுகின்றன.
கடந்த மாதங்களில் நடத்தப்பட்ட விசாரணைகள் தொடர்பில் பல அரசியல்வாதிகளும் அவர்களது உதவியாளர்களும் கைது செய்யப்பட்டுள்ளதாகவும் அந்த அறிக்கையில் மேலும் தெரிவிக்கப்பட்டுள்ளது.
இலஞ்சம், ஊழல் மற்றும் சட்டவிரோத சொத்துக்குவிப்பைத் தடுப்பதை நோக்கமாகக் கொண்டு அண்மையில் மேற்கொள்ளப்பட்ட சட்டச் சீர்திருத்தங்களின் கீழ் இலஞ்ச ஊழல் ஆணைக்குழுவிற்கு விரிவுபடுத்தப்பட்ட விசாரணை அதிகாரங்கள் வழங்கப்பட்டுள்ளன.
விசாரணைகள் இன்னமும் தொடர்ந்து நடைபெற்று வருகின்றதுடன், அறிக்கையில் குறிப்பிடப்பட்டுள்ள நபர்களுக்கு எதிரான குற்றச்சாட்டுகள் இதுவரை நிரூபிக்கப்படவில்லை.
