சபாநாயகர் ஜகத்விக்கிரமரட்ணவிற்கு எதிரான நம்பிக்கையில்லா பிரேரணை உட்பட பல சிறப்புரிமை பிரச்சினைகளை உடனடியாக எழுப்புவதற்கு பிரதிசபாநாயகர் ரிஸ்வி சாலிஹ் மறுத்ததை தொடர்ந்து எதிர்கட்சியினர் அதற்கு எதிர்ப்பை வெளியிட்டதால் நாடாளுமன்றத்தில் குழப்பமான நிலை நிலவியது.
எதிர்கட்சியினரின் கோரிக்கைகளுக்கு பதில் அளித்த பிரதிசபாநாயகர் இன்று காலை 9 மணிக்கு பின்னரே பல நாடாளுமன்ற உறுப்பினர்களால் சமர்ப்பிக்கப்பட்ட சிறப்புரிமை பிரச்சினைகளின் பிரதிகள் தனக்கு கிடைத்ததாக தெரிவித்தார்.
அந்த சமர்ப்பிப்புகளை தான் உடனடியாக பரிசிலீக்காததால் உடனடியாக சிறப்புரிமை தொடர்பான கேள்விகளை எழுப்புவதற்கு தான் அனுமதிக்க முடியாது எனவும் அவர் தெரிவித்தார்.
இதற்கிடையில் சபாநாயகருக்கு எதிரான நம்பிக்கையில்லா தீர்மானத்தை விவாதத்திற்கு எடுத்துக்கொள்ள மறுப்பது குறித்து கரிசனை வெளியிட்ட எதிர்கட்சி தலைவர் சஜித்பிரேமதாச இந்த தீர்மானம் நாடாளுமன்ற சிறப்புரிமை மற்றும் ஜனநாயக கொள்கைகளை மீறும் செயல் என குறிப்பிட்டார்.
எதிர்கட்சி தலைவர் மேலும் தெரிவிக்கையில் குறிப்பிட்டதாவது
எதிர்கட்சியினர் சபாநாயகருக்கு எதிராக 50 குற்றச்சாட்டுகள் அடங்கிய நம்பிக்கையில்லா தீர்மானத்தை சமர்ப்பித்துள்ளனர் என தெரிவித்த அவர் 44 எதிர்கட்சி நாடாளுமன்ற உறுப்பினர்கள் அதில் கைச்சாத்திட்டுள்ளனர்.
இந்த தீர்மானம் ஒக்டோபர் 12ம் திகதி நாடாளுமன்ற ஒழுங்குபத்திரத்தில் சேர்க்கப்பட்டது ஆனால் பின்னர் நாடாளுமன்ற விவகாரங்கள் பற்றிய குழுவின் தீர்மானத்தை தொடர்ந்து நிராகரிக்கப்பட்டது இதனால் சபாநாயகருக்கு எதிரான குற்றச்சாட்டுகள் குறித்து விவாதிப்பதற்கான வாய்ப்பு எதிர்கட்சியினருக்கு மறுக்கப்பட்;டது.
இந்த தீர்மானத்தின் மீதான விவாதத்தை தடுப்பது சபாநாயகரின் நடுநிலைமை நாடாளுமன்றத்தின் சுதந்திரம் மற்றும் எதிர்கட்சி நாடாளுமன்ற உறுப்பினர்களின் ஜனநாயக உரிமைகள் பற்றிய கடும் கவலைகைளை எழுப்புகின்றது.
நாடாளுமன்றத்தின் பேச்சு கருத்து விவாதத்திற்கான சுதந்திரம் ஆகியவற்றின் மீது கட்டுப்பாடுகள் விதிக்கப்படுகின்றன
சபாநாயகர் அரசியலமைப்பு ரீதியாக நடுநிலைமையாக செயற்பட கடமைப்பட்டவர் அரசாங்க மற்றும் எதிர்கட்சி நாடாளுமன்ற உறுப்பினர்கள் தங்களது நியாயமான உரிமைகளை பயன்படுத்துவதற்கு வாய்ப்பினை வழங்கவேண்டும்,
நம்பிக்கையில்லா தீர்மானத்தின் மீதான விவாதத்திற்கு அனுமதி மறுத்தமை நாடாளுமன்ற சிறப்புரிமைகளை மீறும் செயல் என சஜித்பிரேமதாச தெரிவித்தார்.
எதிர்கட்சி தலைவரின் இந்த உரைக்கு பின்னர் எதிர்கட்சியினர் பிரதிசபாநாயகரின் தீர்மானத்திற்கு கடும் எதிர்ப்பு வெளியிட்டதால் அவையில் குழப்பமான நிலையேற்பட்டது.
