ஞானசார தேரரின் நான்கு வருட கடுங்காவல் சிறைத்தண்டனையை உறுதி செய்தது நீதிமன்றம்-தீர்ப்பில் நீதியரசர்கள் சுட்டிக்காட்டிய முக்கிய விடயங்கள் என்ன?

கொழும்பு, நவம்பர் 18, 2026:

இஸ்லாமிய மதத்தையும் முஸ்லிம்களின் மத நம்பிக்கைகளையும் அவமதிக்கும் வகையில் பொது பல சேனா (BBS) அமைப்பின் பொதுச்செயலாளர் கலகொட அத்தே ஞானசார தேரர் வெளியிட்ட கருத்துக்கள், திட்டமிட்டதும் உள்நோக்கம் கொண்டதும் ஆகும் எனத் தெரிவித்துள்ள மேன்முறையீட்டு நீதிமன்றம், கருத்துச் சுதந்திரம் எனும் அரசியலமைப்பு உரிமையின் கீழ் அவற்றை நியாயப்படுத்த முடியாது எனத் தீர்ப்பளித்துள்ளது.

இதற்கமைய, அவருக்கு விதிக்கப்பட்ட நான்கு வருட கடுங்காவல் சிறைத்தண்டனையை மேன்முறையீட்டு நீதிமன்றம் உறுதி செய்துள்ளது. நீதியரசர்களான பி. குமாரரத்னம் மற்றும் நவரத்ன மாரசிங்க ஆகியோர் அடங்கிய நீதியரசர்கள் குழாம் இன்று (18) வழங்கிய விரிவான தீர்ப்பில், பௌத்த போதனைகள், மத சகிப்புத்தன்மை மற்றும் ஏனைய மதங்களுக்கு மதிப்பளித்து ஒழுக்க நெறிகளைப் பேண வேண்டிய பௌத்த பிக்குகளின் பொறுப்புக்கள் குறித்தும் முக்கிய அவதானிப்புகளைப் பதிவு செய்துள்ளது.

மேல்முறையீடு நிராகரிக்கப்பட்டதற்கான காரணங்கள்:

2016 நவம்பர் 1-ஆம் திகதி நடைபெற்ற ஊடகவியலாளர் சந்திப்பில் வெளியிட்ட கருத்துக்கள் தொடர்பில், தண்டனைச் சட்டக்கோவையின் 291B பிரிவின் கீழ் 2024 மார்ச் 28-ஆம் திகதி கொழும்பு மேல் நீதிமன்றம் ஞானசார தேரரைக் குற்றவாளியாகக் கண்டது. இரண்டு குற்றச்சாட்டுகளுக்குத் தலா இரண்டு வருடங்கள் வீதம், அவை ஒன்றன்பின் ஒன்றாக அனுபவிக்கப்பட வேண்டும் என்ற நிபந்தனையுடன் மொத்தமாக 4 வருட கடுங்காவல் சிறைத்தண்டனையும், தலா 50,000 ரூபா அபராதமும் விதிக்கப்பட்டது.

  • உள்நோக்கம் நிரூபிக்கப்பட்டுள்ளது: குறித்த கருத்துக்கள் திட்டமிட்டுக் கூறப்பட்டவை அல்ல எனவும், ஊடகவியலாளர் சந்திப்பில் இலங்கை முஸ்லிம்களின் வறுமை மற்றும் சமூகப் பிரச்சினைகள் குறித்து அவர் அனுதாபத்துடன் பேசியதையும் மேல் நீதிமன்றம் கவனத்தில் கொள்ளத் தவறிவிட்டது எனவும் தேரர் தரப்பு சட்டத்தரணிகள் வாதிட்டனர். எனினும், ஊடகவியலாளர் சந்திப்பின் சூழல், பயன்படுத்தப்பட்ட மொழி மற்றும் தொனி ஆகியவற்றை ஆராய்ந்ததில், முஸ்லிம்களின் மத உணர்வுகளைப் புண்படுத்தும் திட்டமிட்ட நோக்கம் தெளிவாகத் தெரிவதாக நீதியரசர்கள் குழாம் சுட்டிக்காட்டியது.

வருத்தம் தெரிவிப்பதால் மத அவமதிப்பை இல்லாதொழிக்க முடியாது:

மேல் நீதிமன்ற விசாரணையின் போது, குற்றப்பத்திரிகையில் குறிப்பிடப்பட்ட கருத்துக்களைத் தான் வெளியிட்டதை ஏற்றுக்கொண்ட ஞானசார தேரர், முஸ்லிம் சமூகத்தின் மத உணர்வுகளைப் புண்படுத்தும் நோக்கம் தனக்கில்லை எனக் கூறி வருத்தம் தெரிவித்திருந்தார். இது குறித்துத் தீர்ப்பில் குறிப்பிட்ட நீதியரசர்கள்:

“வெறுமனே வருத்தம் தெரிவிப்பதானது, முஸ்லிம் சமூகத்தின் மதத்திற்கும் மத உணர்வுகளுக்கும் ஏற்படுத்தப்பட்ட அவமதிப்பின் பாரதூரத்தன்மையை இல்லாதொழித்து விடாது” எனத் திட்டவட்டமாகத் தெரிவித்தனர்.

இரண்டு தனித்தனி தண்டனைகள் உறுதி செய்யப்பட்டமை:

ஒரே ஊடகவியலாளர் சந்திப்பில் வெளியிடப்பட்ட கருத்துக்களுக்காக இரண்டு தனித்தனித் தண்டனைகள் வழங்கப்பட்டமைக்கு எதிராக முன்வைக்கப்பட்ட வாதத்தையும் நீதிமன்றம் நிராகரித்தது. இரண்டு குற்றச்சாட்டுகளும் இஸ்லாத்தையும் முஸ்லிம்களின் மத உணர்வுகளையும் அவமதிக்கும் இரண்டு வெவ்வேறு வகையான கருத்துக்களுடன் தொடர்புடையவை என்பதால், மேல் நீதிமன்றத்தின் தீர்ப்பில் தலையிட எந்தக் காரணமும் இல்லை என நீதியரசர்கள் தீர்மானித்தனர்.

கருத்துச் சுதந்திரம் என்பது வரம்பற்ற உரிமை அல்ல:

அரசியலமைப்பின் 10-ஆம் உறுப்புரை (மத சுதந்திரம்) மற்றும் 14(1)(a) உறுப்புரை (கருத்துச் சுதந்திரம்) ஆகியவற்றை ஆராய்ந்த நீதிமன்றம், கருத்துச் சுதந்திரம் என்பது முழுமையான அல்லது வரம்பற்ற உரிமை அல்ல என்பதை வலியுறுத்தியது.

  • அரசியலமைப்பின் 15(2) மற்றும் 15(7) உறுப்புரைகளின் கீழ், இன மற்றும் மத நல்லிணக்கம், பொது ஒழுங்கு மற்றும் ஏனையவர்களின் உரிமைகளைப் பாதுகாக்கும் நோக்கில் கருத்துச் சுதந்திரத்திற்குச் சட்டரீதியான கட்டுப்பாடுகளை விதிக்க முடியும் என நீதிமன்றம் சுட்டிக்காட்டியது.

  • நகைச்சுவை நடிகை நடாஷா எதிரிசூரியவின் வழக்கு உள்ளிட்ட முன்னைய தீர்ப்புகள் மற்றும் இலங்கை மனித உரிமைகள் ஆணைக்குழுவின் அவதானிப்புகளை மேற்கோள் காட்டிய நீதியரசர்கள், மத உணர்வுகளைப் புண்படுத்தும் சாதாரண பேச்சுக்கள் அனைத்தும் குற்றமாகிவிடாது எனினும், ஞானசார தேரரின் கருத்துக்கள் தண்டனைச் சட்டக்கோவை 291B பிரிவின் கீழ் குற்றவியல் பொறுப்பை உறுதிப்படுத்தும் அனைத்துக் கூறுகளையும் பூர்த்தி செய்துள்ளதாகத் தெரிவித்தனர்.

ஏனைய மதங்களை மதிப்பது குறித்த பௌத்த போதனைகள்:

பௌத்த தர்மத்தின் அடிப்படைக் கோட்பாடுகள் மற்றும் பௌத்த பிக்குகளிடம் எதிர்பார்க்கப்படும் ஒழுக்க நெறிகள் குறித்தும் தீர்ப்பில் விசேடமாகக் குறிப்பிடப்பட்டுள்ளது:

  • பௌத்த மதம் அகிம்சை, கருணை, அன்பு மற்றும் ஏனைய உயிரினங்களையும் நம்பிக்கைகளையும் மதிக்கும் பண்புகளை அடிப்படையாகக் கொண்டது. ஏனைய மதங்களின் இருப்பையும் வழிபாடுகளையும் அங்கீகரிக்கும் பௌத்த போதனைகள், அவற்றின் மதத் தலைவர்களையும் பின்பற்றுபவர்களையும் மதிக்குமாறு ஊக்குவிக்கின்றன.

  • பௌத்த பிக்குகளுக்கான ஒழுக்க விதிகளை வகுக்கும் ‘வினய பிடகத்தை’ (Vinaya Pitaka) சுட்டிக்காட்டிய நீதிமன்றம், நல்வாக்கு (Right speech) மற்றும் நற்செயலின் முக்கியத்துவத்தை வலியுறுத்தியது. சங்க உறுப்பினர்கள் உயர்ந்த ஒழுக்க நெறியையும் கட்டுப்பாட்டையும் பேண வேண்டும் எனவும், இக்கோட்பாடுகளை மீறும் செயல்கள் பௌத்த துறவற ஒழுக்கத்தை மீறுவதற்குச் சமமானது எனவும் தீர்ப்பில் குறிப்பிடப்பட்டுள்ளது.

இறுதித் தீர்ப்பு: அனைத்துச் சாட்சியங்களையும் சட்டக் கோட்பாடுகளையும் பரிசீலித்த நீதியரசர்கள் பி. குமாரரத்னம் மற்றும் நவரத்ன மாரசிங்க ஆகியோர், ஞானசார தேரருக்கு எதிரான குற்றச்சாட்டுகள் சந்தேகத்திற்கு இடமின்றி நிரூபிக்கப்பட்டுள்ளதாகத் தீர்மானித்தனர். அதன்படி, மேல்முறையீட்டு மனுவைத் தள்ளுபடி செய்த நீதிமன்றம், 4 வருட கடுங்காவல் சிறைத்தண்டனையையும் அபராதத்தையும் உறுதி செய்ததுடன், தீர்ப்பின் பிரதியையும் மூல வழக்குக் கோவையையும் கொழும்பு மேல் நீதிமன்றத்திற்கு அனுப்பி வைக்குமாறு பதிவாளருக்கு உத்தரவிட்டது.

Facebook
Twitter
LinkedIn
WhatsApp

Leave a Reply

Your email address will not be published. Required fields are marked *

Recent Post

namal courts
எயார்பஸ் (Airbus) வழக்கில் நாமல் ராஜபக்ஷவுக்கு பிணை மறுப்பு; டிசம்பர் 2 வரை விளக்கமறியல் நீடிப்பு
1000018452-533x400
முன்மொழியப்பட்டுள்ள பயங்கரவாத எதிர்ப்புச் சட்டங்களுக்கு எதிராக பாரிய போராட்டங்கள் நடத்தப்படும் என செயற்பாட்டாளர்கள் எச்சரிக்கை
rohinya1
ரோஹிங்யாமக்களுக்கு எதிராக 'இனப்படுகொலை நோக்குடன்' மியன்மார் செயல்பட்டது: சர்வதேச நீதிமன்றம் தீர்ப்பு
court-judge-hammer-gavel-696x398
2008-ஆம் ஆண்டு மட்டக்களப்பு கடத்தல் மற்றும் கொலை வழக்கு: ஈ.பி.டி.பி உறுப்பினர்கள் எண்மருக்கு மரண தண்டனை
maveerar thu1
எந்தத் தடைகள் ஏற்படுத்தப்பட்டாலும் சாட்டியில் வழமை போன்று மாவீரர் நாள் அனுஷ்டிக்கப்படும்..! ஏற்பாட்டாளர்கள் உறுதி
sajith ff
அரசாங்கம் தற்போது தொழில்சங்க தலைவர்களை இலக்குவைத்து செயற்படுகின்றது – நாடாளுமன்றத்தில் எதிர்கட்சியினரின் உரிமைகள் மறுக்கப்படுகின்றன- சஜித்
monks fight
அழிவின் தீப்பிழம்புகள்: இலங்கையை மீண்டும் எரிப்பதற்கு முன் அந்தத் தீப்பொறியை அணைத்திடுங்கள்
JAGATH WI
தேசிய மக்கள் சக்தி அரசாங்கத்தின் ஊழல் எதிர்ப்பு நம்பகத்தன்மை மீதான கண்காணிப்பு தீவிரமடைந்துள்ள நிலையில், சபாநாயகர் இலஞ்ச ஊழல் ஆணைக்குழுவின் விசாரணைக்கு உள்ளாகியுள்ளார்
gajendran
நினைவேந்தல் நிகழ்வை முன்னெடுத்தமைக்காக செல்வராசா கஜேந்திரனுக்கு பொலிஸ் விசாரணைக்கு அழைப்பு!
ship on fire
ஹோர்முஸ்நீரிணையில் எண்ணெய் கப்பல் மீது தாக்குதல்: பற்றி எரியும் தீ