சமீபத்திய மோசமான வானிலை காரணமாகப் பல நீர் ஆதாரங்கள் மாசுபட்டுள்ளதால், வரும் வாரங்களில் வயிற்றுப்போக்கு, வைரஸ் காய்ச்சல், எலி காய்ச்சல் (லெப்டோஸ்பைரோசிஸ்) மற்றும் பல தொற்றாத நோய்கள் பரவ வாய்ப்புள்ளதாக இலங்கை பொதுச் சுகாதார பரிசோதகர்கள் சங்கம் எச்சரித்துள்ளது.
சங்கத்தின் செயலாளர் சாமில் முத்துக்குட கருத்துப்படி, சுத்தமான குடிநீருக்கு ஏற்கனவே பற்றாக்குறை ஏற்பட்டுள்ளது என்றும், வெள்ளம் சூழ்ந்த பயிரிடப்பட்ட பகுதிகள் காரணமாகக் காய்கறிகள் மற்றும் பழங்களும் மாசடைந்துள்ளன என்றும் தெரிவித்துள்ளார்.
இந்த நிலைமைகள் வயிற்றுப்போக்கு, வைரஸ் காய்ச்சல் மற்றும் நிமோனியாவாக மாறக்கூடிய சளி, எலி காய்ச்சல் மற்றும் டெங்கு போன்ற பிற வைரஸ் தொற்றுகள் ஏற்படுவதற்கான வாய்ப்புகளை அதிகரிக்கிறது என்றும் அவர் கூறினார்.
இந்த அபாயங்களைக் குறைக்க, முத்துக்குட பொதுமக்களுக்குப் பின்வரும் பல முன்னெச்சரிக்கை நடவடிக்கைகளை எடுக்குமாறு வலியுறுத்தினார்:
குடிநீரை நன்றாகக் கொதிக்க வைத்து அருந்துதல்.
வெள்ளத்தால் பாதிக்கப்பட்ட வீடுகள் மற்றும் வடிகால்களைச் சுத்தம் செய்வதற்கு முன், எலி காய்ச்சலைத் தடுக்கும் மருந்துகளை எடுத்துக்கொள்வது.
காய்ச்சல், தசை வலி, மயக்கம் அல்லது சோர்வு போன்ற அறிகுறிகள் தோன்றினால் உடனடியாக வைத்தியசாலைக்குச் செல்வது.
ஏற்கனவே நோய்வாய்ப்பட்டவர்களை முடிந்தவரை விரைவாக வைத்தியசாலையில் அனுமதிப்பதை உறுதி செய்வது.
பாதுகாப்பு மையங்களில் உள்ளவர்கள் முடிந்தபோதெல்லாம் முகக்கவசங்களை அணிய வேண்டும்.
பழங்கள் மற்றும் காய்கறிகளை உட்கொள்ளும் முன் உப்பு நீரில் நன்கு கழுவ வேண்டும்.
ஒவ்வொரு பாதுகாப்பு மையத்திற்கும் ஒரு பொதுச் சுகாதார பரிசோதகர் நியமிக்கப்பட்டுள்ளார் என்றும், சுகாதார தொடர்பான எந்தவொரு கவலையும் அவர்களிடம் தெரிவிக்கப்படலாம் என்றும் அவர் குறிப்பிட்டார்.
