முன்மொழியப்பட்டுள்ள சர்வதேச நன்கொடையாளர் மாநாடு தொடர்பாக தாம் இன்னும் எந்த நடவடிக்கையும் எடுக்கவில்லை என வெளிவிவகார அமைச்சு தெரிவித்துள்ளது. இது தொடர்பாக நிதி அமைச்சிடமிருந்து உத்தியோகபூர்வ வழிகாட்டல்கள் கிடைக்கும் வரை காத்திருப்பதாக அமைச்சு குறிப்பிட்டுள்ளது.
அமைச்சின் அதிகாரி ஒருவர், அத்தகைய முயற்சி குறித்து இதுவரை அமைச்சுக்கு உத்தியோகபூர்வமாக அறிவிக்கப்படவில்லை என்று கூறினார். “நன்கொடையாளர் மாநாடு நடத்தப்பட வேண்டுமானால், வெளிவிவகார அமைச்சு உள்நாட்டிலும் சர்வதேச ரீதியிலும் பல தரப்பினருடன் ஒருங்கிணைந்து செயல்பட வேண்டும். இது குறித்த உத்தியோகபூர்வ தகவல் கிடைக்காததால் அத்தகைய முயற்சிகள் எதுவும் எடுக்கப்படவில்லை. வழிகாட்டல்கள் வழங்கப்பட்டதும், அந்தச் செயல்முறைக்கு ஆதரவளிக்க நாம் தயாராக உள்ளோம்,” என்றார்.
டிட்வா சூறாவளியின் பின்னர் சர்வதேச நன்கொடையாளர் மாநாட்டை நடத்த அரசாங்கம் திட்டமிட்டுள்ளதாக வெளிவிவகார அமைச்சர் விஜித ஹேரத் அறிவித்திருந்த நிலையிலேயே இந்த விளக்கம் அளிக்கப்பட்டுள்ளது. முன்னதாக, நிதி பிரதி அமைச்சர் கலாநிதி அனில் ஜயந்த பெர்னாண்டோவும் இந்த முன்மொழியப்பட்ட மாநாடு குறித்து ஊடகங்களுக்கு கருத்து தெரிவித்திருந்தார்.
