கல்வி, உயர்கல்வி மற்றும் தொழிற்கல்வி அமைச்சின் கோரிக்கைக்கு இணங்க, சீரற்ற காலநிலையால் பாதிக்கப்பட்ட பாடசாலை மாணவர்களுக்கு ‘சுரக்ஷா’ (Suraksha) மாணவர் காப்புறுதித் திட்டத்தின் கீழ் விசேட சலுகைகளை வழங்க இலங்கை காப்புறுதி கூட்டுத்தாபனம் (SLIC) ஒப்புக்கொண்டுள்ளது.
சலுகைகள் பொருந்தும் காலம்: இந்தச் சலுகைகள் 2025 நவம்பர் 26 முதல் டிசம்பர் 31 வரை ஏற்பட்ட வெள்ளம், மண்சரிவு மற்றும் சூறாவளி போன்ற இயற்கை அனர்த்தங்களால் பாதிக்கப்பட்ட மாணவர்களுக்கு மட்டுமே பொருந்தும்.
வழங்கப்படும் முக்கிய சலுகைகள்:
-
பெற்றோரை இழந்த மாணவர்களுக்கான உதவி: அனர்த்தங்களால் தங்களது பெற்றோர் அல்லது சட்டப்பூர்வ பாதுகாவலர்களை இழந்த மாணவர்களுக்கு, வருமான எல்லைகளைக் கருதாமல் (Income limits) இழப்பீட்டு நன்மைகள் வழங்கப்படும். இதற்கு உரிய ஆவண உறுதிப்படுத்தல் அவசியமாகும்.
-
வெளிநோயாளி சிகிச்சை (OPD): அனர்த்தக் காயங்களுக்கான நேரடி மருத்துவ சிகிச்சை, மருந்துகள் கொள்வனவு மற்றும் ஆய்வகப் பரிசோதனைகளுக்காக 20,000 ரூபா வரை சலுகை வழங்கப்படும். ஏற்கனவே உள்ள காப்புறுதி உடன்படிக்கையில் இவை குறிப்பிடப்படாவிட்டாலும், தற்போது விசேடமாக அனுமதிக்கப்பட்டுள்ளது.
-
ஆவணங்கள் தொலைந்திருந்தால்: 2025 நவம்பர் 1 முதல் நவம்பர் 26 வரை ஏற்பட்ட சம்பவங்களின் போது காப்புறுதி ஆவணங்கள் அழிந்திருந்தால், பாடசாலை அதிபர் மற்றும் கிராம உத்தியோகத்தரின் பரிந்துரையின் அடிப்படையில் நன்மைகள் வழங்கப்படும்.
-
மருத்துவமனை அறிக்கைகள்: தனியார் மருத்துவமனை ரசீதுகள் தொலைந்திருந்தால், அந்த நிறுவனத்தால் உறுதிப்படுத்தப்பட்ட நகல் (Duplicate) ரசீதுகளைச் சமர்ப்பிக்கலாம். அரசாங்க மருத்துவமனை அட்டைகள் தொலைந்திருந்தால், நோயாளியின் விபரங்கள் அடங்கிய வைத்தியசாலைக் கடிதத்தைச் சமர்ப்பிக்க வேண்டும்.
கால அவகாசம் நீடிப்பு: 2025 நவம்பர் 1 முதல் டிசம்பர் 31 வரை ஏற்பட்ட அனர்த்தங்களால் பாதிக்கப்பட்டவர்கள் கோரிக்கைகளை (Claims) சமர்ப்பிப்பதற்கான கால அவகாசம், வழக்கமான 90 நாட்களில் இருந்து மேலும் 60 நாட்களால் நீடிக்கப்பட்டுள்ளது. இதன்படி மொத்தம் 150 நாட்களுக்குள் விண்ணப்பிக்க முடியும்
