இலவச மதுபானத்துடன் தொழில் குறித்த மனக்குழப்பங்களுக்கு ஆலோசனை –ஜப்பானில் ஒரு மதுபான சாலை

இந்தியா டுடே

எனது சம்பளம் தொழில்துறை தரத்தின்படி இருக்கிறதா? எனது வேலையை மாற்றுவதற்கு இது சரியான நேரமா? வேலை செய்வதற்கான உந்துதலை நான் இழக்கிறேனா?

சில நேரங்களில், பணியிட மன அழுத்தம் என்பது வெறும் காலக்கெடுவை (Deadlines) முடிப்பது அல்லது விளக்கக்காட்சிகளை (Presentations) உருவாக்குவது மட்டுமல்ல. சில நேரங்களில் அது இருத்தலியல் சார்ந்த கேள்வியாக இருக்கிறது.

‘3 இடியட்ஸ்’ திரைப்படத்தின் வைரஸ் (Virus) கதாபாத்திரம் சொன்னது போல, “வாழ்க்கை ஒரு பந்தயம், நீங்கள் வேகமாக ஓடாவிட்டால், உடைந்த முட்டையைப் போல ஆகிவிடுவீர்கள்” என்பது இப்போது முன்னெப்போதையும் விட உண்மையாகத் தெரிகிறது.

இது உலகளாவிய ஒன்றாகத் தோன்றுகிறது. , ஜப்பான் தனது வேலையைப் பற்றி கேள்வி எழுப்பும் மக்களுக்காக, இலவச பானங்கள் மற்றும் தொழில் ஆலோசனைகளுடன் ஒரு வழியைக் கண்டுபிடித்துள்ளது. அதுதான் இந்த மதுபான சாலை.

வேலை மாற்ற ஆலோசனை பார் (A job change consultation bar)

உலகம் முழுவதும் மதுபான சாலை. கலாச்சாரம் வியக்கத்தக்க வகையில் உருவாகி வருகிறது. உங்கள் தொழில் வாழ்க்கையின் வளர்ச்சியை எண்ணி வருத்தப்படவோ அல்லது சோகமாக இருக்கவோ மட்டும் பாருக்குச் செல்லாமல் (அதற்கும் பணம் செலுத்தி), உண்மையில் ஒரு தொழில் ஆலோசனை அமர்வை அங்கு பெற முடியும் என்று யாராவது நினைத்திருப்பார்களா? ஜப்பானில் ஒருவர் அதைச் செய்திருக்கிறார்.

இதன் பெயர் ‘தென்ஷோகு சோடன் பார்’ (Tenshoku Sodan Bar). இதற்குத் தோராயமாக ‘வேலை மாற்ற ஆலோசனை மதுபான சாலை. ‘ என்று பொருள். இது ஜே.ஆர் யோகோஹாமா (JR Yokohama) ரயில் நிலையத்திலிருந்து நடக்கும் தூரத்தில் அமைந்துள்ளது.

“சாதாரண மது அருந்தும் சூழல்களில் ஊழியர்களின் கவலைகளையும் தொழில் கேள்விகளையும் கேட்டுக் கொண்டிருந்தபோதுதான் இவ்வாறனதொரு மதுபானசாலையின் யோசனை எனக்கு வந்தது. அந்த அனுபவம், மக்கள் தங்கள் வாழ்க்கைப் பாதையைப் பற்றி பானங்களுடன் வெளிப்படையாகப் பேசக்கூடிய ஒரு இடத்தை உருவாக்க எனக்கு உத்வேகம் அளித்தது,” என்று இந்த பாரின் உரிமையாளர் ஷோதா உமேமோட்டோ கூறுகிறார்.

இதன் பின்னணி (The concept)

நீங்கள் ஏற்கனவே வேலையை ராஜினாமா செய்யத் தயாராக இருந்தாலோ அல்லது உங்கள் எதிர்காலத்தைத் துல்லியமாகத் திட்டமிட்டிருந்தாலோ ஒழிய, தொழில் ஆலோசனையைப் பெறுவது ஒரு கடினமான வேலையாகத் தோன்றலாம். ஆனால் சமீபத்தில் திறக்கப்பட்ட ‘தென்ஷோகு சோடன் பார்’ அதற்கு நேர்மாறாக இருக்க முயற்சிக்கிறது. இது ஒரு தொழில்முறை நிபுணரிடம் முறையான சூழல் இன்றி இயல்பாகப் பேசுவதற்கான இடமாகும்.

“வேலை மாறுவதுதான் உடனடி முடிவாக இருக்க வேண்டும் என்று கருதாமல், மக்கள் முதலில் தங்கள் எண்ணங்களை ஒழுங்குபடுத்தவும் தெளிவு பெறவும் ஒரு இடம் தேவை என்று நாங்கள் நம்புவதால் இந்த பாரைத் திறந்தோம்,” என்று உமேமோட்டோ கூறுகிறார்.

உங்கள் வேலையை நேசிப்பதற்கும், அதை உடனடியாக விட்டுவிட விரும்பும் அளவிற்கு வெறுப்பதற்கும் இடையில் ஒரு பெரிய ‘சாம்பல் நிறப் பகுதி’ (Grey zone) உள்ளது. பெரும்பாலான மக்கள் அந்த இடைப்பட்ட பகுதியில்தான் வாழ்கிறார்கள். அந்த நிலையில் இருக்கும்போது, நடுநிலையான ஆலோசனையைப் பெறுவது கடினம். நண்பர்களும் குடும்பத்தினரும் உங்கள் மீது அக்கறை கொண்டிருந்தாலும், அவர்கள் தங்கள் சொந்த கவலைகள் அல்லது எதிர்பார்ப்புகளுடன்தான் ஆலோசனைகளை வழங்குவார்கள்.

உமேமோட்டோ பகிர்ந்துகொண்டபடி, “அதிகமாக விவாதிக்கப்படும் விஷயம் பணிச்சூழல் ஆகும். அதிகப்படியான கடின உழைப்பைக் கோரும் பணியிடங்களைப் பற்றி பலர் சந்தேகங்களை வெளிப்படுத்துகிறார்கள், மேலும் சிறந்த வேலை-வாழ்க்கை சமநிலையை (Work-life balance) அவர்கள் நாடுகிறார்கள்.”

எனவே, இந்த பார் தொழில் வல்லுநர்கள் தங்கள் சந்தேகங்கள், நிச்சயமற்ற தன்மைகள் மற்றும் வேலை தொடர்பான ஆதங்கங்களை வெளிப்படுத்த ஒரு பாதுகாப்பான இடத்தை உருவாக்குவதை நோக்கமாகக் கொண்டுள்ளது. “நாங்கள் கேட்கிறோம், ஆனால் யாரையும் விமர்சிப்பதில்லை” என்பதே இதன் தாரக மந்திரம்.

ஆலோசனை மதுபானசாலையின்பாரின் உள்ளே

முதலில், வருபவர்கள் முன்பதிவு செய்ய வேண்டும். ஆலோசனை பொதுவாக 60 முதல் 90 நிமிடங்கள் வரை நீடிக்கும் மற்றும் ஒரு தனி அறையில் நடைபெறும். வேலைவாய்ப்பு முகமைகளுக்கான விதிமுறைகளின் கீழ் ரகசியத்தன்மை பாதுகாக்கப்படுவதாக இந்த பார் கூறுகிறது.

மிகவும் ரகசியமாக இருக்கிறார்கள், இல்லையா? அதுமட்டுமல்ல, இங்குள்ள மது பரிமாறுபவர்கள் (Bartenders) சாதாரணமானவர்கள் அல்ல. நீங்கள் யாருடன் ஆலோசனை செய்ய விரும்புகிறீர்களோ அவர்களே உங்களுக்கு பானங்களையும் வழங்குகிறார்கள்.

“ஒரு பார் அமைப்பில், தேசிய அளவில் சான்றிதழ் பெற்ற தொழில் ஆலோசகர்கள் உங்கள் எதிர்காலத்தை வடிவமைக்க உங்களுடன் பணியாற்றுவார்கள். ஆலோசனை வழங்கக் கூடியவர்களில் தற்போதைய வணிக உரிமையாளர்கள், மனிதவள நிறுவனங்களின் நிர்வாகிகள் மற்றும் சான்றிதழ் பெற்ற ஆலோசகர்கள் உள்ளனர்,” என்று அதிகாரப்பூர்வ இணையதளம் கூறுகிறது.

இங்கு 20 முதல் 60 வயது வரை உள்ள பல்வேறு துறை சார்ந்தவர்கள் (நர்ஸ்கள் முதல் பெரிய நிறுவனங்களின் உயர் நிர்வாகிகள் வரை) வருகின்றனர். முதல் மாதத்திலேயே 60 விருந்தினர்கள் வந்துள்ளனர், அதில் 15 பேர் மீண்டும் வந்துள்ளனர்.

எல்லாமே இலவசம்!

இங்கு ஆலோசனைக் கட்டணம் எதுவும் இல்லை, மதுபானங்கள் மற்றும் மது அல்லாத பானங்கள் என அனைத்துமே இலவசம். மக்கள் தங்கள் எண்ணங்களை மிகவும் வசதியாகவும் வெளிப்படையாகவும் பகிர்ந்து கொள்ள உதவுவதே இதன் நோக்கம். உரிமையாளர் மீண்டும் வலியுறுத்துகிறார், “நாங்கள் வழங்கும் அனைத்தும் முற்றிலும் இலவசம்.”

அவர்கள் எப்படி சம்பாதிக்கிறார்கள்? “நாங்கள் அறிமுகப்படுத்தும் வேலை தேடுபவர்களை வெற்றிகரமாக வேலைக்கு அமர்த்தும் நிறுவனங்கள் வழங்கும் ‘பரிந்துரைக் கட்டணம்’ (Referral fees) மூலம் எங்கள் வணிகம் நிலைபெறுகிறது. உரையாடலின் போது ஒரு விருந்தினர் புதிய வாய்ப்புகளைத் தேடுவதில் ஆர்வம் காட்டினால், நாங்கள்  அமர்ந்து பானங்களுடன் பொருத்தமான வேலைகளைத் தேடுவோம்,” என்று உமேமோட்டோ விளக்கினார்.

முன்பெல்லாம் பிரச்சனைகளை மறக்க மக்கள் பாருக்குச் சென்றார்கள் என்றால், இந்தப் பார் பிரச்சனைகளைப் பற்றிப் பேசத் தயாராக இருப்பவர்களுக்காக உள்ளது