இலங்கை இன்று “மீட்சியின் கதை அல்ல, மாறாக ஒரு மாற்றத்தின் கதை”

சிங்கப்பூரின் ஷாங்கிரி-லா ஹோட்டலில்  நடைபெற்ற பிரத்யேக ‘கொழும்பு போர்ட் சிட்டி முதலீட்டாளர் மாநாட்டில்’, இலங்கையின் நம்பிக்கை, சீர்திருத்தம் மற்றும் நீண்டகால வாய்ப்புகள் குறித்த தெளிவான செய்தி முன்வைக்கப்பட்டது.

சிங்கப்பூருக்கான இலங்கை உயர்ஸ்தானிகராலயம் மற்றும் கொழும்பு போர்ட் சிட்டி ஆகியவற்றால் இணைந்து ஏற்பாடு செய்யப்பட்ட இந்த மாநாடு, இலங்கையின் அடுத்த கட்ட பொருளாதார மாற்றத்தின் மையப்புள்ளியாக கொழும்பு போர்ட் சிட்டியை நிலைநிறுத்தியது.

ரியல் எஸ்டேட், நிதிச் சேவைகள், முதலீடு மற்றும் சொத்து மேலாண்மை, தகவல் தொழில்நுட்பம் மற்றும் டிஜிட்டல் சேவைகள், தொழில்முறை சேவைகள் மற்றும் பிராந்திய வர்த்தகத் தலைமைத்துவம் என பல்வேறு துறைகளைச் சேர்ந்த சுமார் 100 மூத்த அழைப்பாளர்கள் இதில் கலந்துகொண்டனர். இது கொழும்பு போர்ட் சிட்டியின் சேவைகள் சார்ந்த முதலீட்டுத் திட்டங்களின் மீதான பரந்த ஆர்வத்தைப் பிரதிபலித்தது.

மாநாட்டைத் தொடங்கி வைத்து உரையாற்றிய சிங்கப்பூருக்கான இலங்கை உயர்ஸ்தானிகர் செனரத் திஸாநாயக்க, சிங்கப்பூர் மற்றும் பிராந்திய பங்காளிகளுடன் பொருளாதார ஈடுபாட்டை வலுப்படுத்துவதில் இலங்கையின் உறுதிப்பாட்டை வலியுறுத்தினார். சர்வதேச தரம் மற்றும் தரநிலைகளின் கீழ் உலகளாவிய சந்தைகளுடன் மிகவும் ஆழமாக ஒன்றிணைய இலங்கை தயாராக இருப்பதை கொழும்பு போர்ட் சிட்டி பிரதிபலிக்கிறது என்று அவர் குறிப்பிட்டார்.

மாநாட்டில் முக்கிய உரையை ஆற்றிய வெளிநாட்டு முதலீட்டுக்கான ஜனாதிபதியின் விசேட தூதுவரும், மேல் மாகாண ஆளுநருமான ஹனீப் யூசுப், இன்றைய இலங்கை என்பது “மீட்சி பற்றிய கதை அல்ல, அது ஒரு மாற்றத்தின் கதை” என்று கூறினார். வரலாற்றிலேயே மிகக் கடுமையான நெருக்கடிக்குப் பிறகு இலங்கையின் விரைவான பொருளாதார முன்னேற்றத்தை அவர் சுட்டிக்காட்டினார். நிலையான பணவீக்கம், புதுப்பிக்கப்பட்ட வளர்ச்சி, பலப்படுத்தப்பட்ட அந்நியச் செலாவணி கையிருப்பு மற்றும் மீளக் கட்டியெழுப்பப்பட்ட மேக்ரோ பொருளாதார நம்பிக்கை ஆகியவற்றை அவர் சிறப்பித்துக் காட்டினார். சர்வதேச நிறுவனங்கள் இதனை மிகக் குறுகிய காலத்தில் நடந்த ஒரு அபாரமான மீட்சியாக அங்கீகரித்துள்ளன என்பதையும் அவர் குறிப்பிட்டார்.

நீண்டகால சீர்திருத்தம், நிறுவன சுதந்திரம் மற்றும் பொருளாதார ஒழுக்கம் ஆகியவற்றில் இலங்கையின் உறுதிப்பாட்டை விசேட தூதுவர் வலியுறுத்தினார். சுதந்திரமான மத்திய வங்கி, பலப்படுத்தப்பட்ட நிதி மற்றும் கடன் மேலாண்மை சட்டங்கள் மற்றும் வெளிப்படையான விதிமுறைகளை அடிப்படையாகக் கொண்ட பொருளாதாரக் கட்டமைப்பு ஆகியவை முதலீட்டாளர் நம்பிக்கையை மேம்படுத்துகின்றன என்று அவர் சுட்டிக்காட்டினார்.

மேலும், இலங்கை ஒரு தெளிவான மற்றும் பரிச்சயமான முதலீட்டு சூழலை வழங்குகிறது என்றும், இருதரப்பு முதலீட்டுப் பாதுகாப்பு உடன்படிக்கைகள், இரட்டை வரி தவிர்ப்பு ஒப்பந்தங்கள் மற்றும் சர்வதேச நடுவர் மன்றத்தின் முழுமையான அங்கீகாரம் ஆகியவற்றுடன் முதலீட்டாளர்கள் மூலதனத்தைத் திரும்பக் கொண்டு செல்லும் சுதந்திரத்தையும் அவர் எடுத்துரைத்தார்.

சிங்கப்பூரின் ‘Channel News Asia’ தொலைக்காட்சியில் நேரடி உரையாடலின் போதும் யூசுப் இதையே மீண்டும் வலியுறுத்தினார். கொழும்பு போர்ட் சிட்டி என்பது நிதிச் சேவைகள், தகவல் தொழில்நுட்பம், தொழில்முறை சேவைகள், தளவாடங்கள் மற்றும் பிராந்திய தலைமையக செயல்பாடுகள் போன்ற உயர் மதிப்புமிக்க துறைகளை ஊக்குவிக்க வடிவமைக்கப்பட்ட ஒரு ஏற்றுமதி சார்ந்த தளமாகும் என்றார்.

கொழும்பு போர்ட் சிட்டி பொருளாதார ஆணைக்குழுவின் (CPCEC) தலைவர் ஹர்ஷ அமரசேகர PC உரையாற்றுகையில், 2021 ஆம் ஆண்டின் 11 ஆம் இலக்க கொழும்பு போர்ட் சிட்டி பொருளாதார ஆணைக்குழுச் சட்டத்தின் கீழ் நிறுவப்பட்ட நிர்வாகக் கட்டமைப்பை விளக்கினார். போர்ட் சிட்டி என்பது இலங்கையின் முதல் பல்-சேவை விசேட பொருளாதார மண்டலம் (Special Economic Zone) என்றும், இது ஒரு சுயாதீன ஆணைக்குழுவினால் நிர்வகிக்கப்பட்டு, முதலீட்டு பாதுகாப்பு மற்றும் சட்டப் பாதுகாப்புகளை வழங்குகிறது என்றும் அவர் குறிப்பிட்டார்.

சிங்கப்பூரின் வர்த்தக சமூகத்தின் கருத்துக்களையும் இந்த மாநாடு உள்ளடக்கியது. GFTN கேபிடல் துணைத் தலைவர் மற்றும் சிங்கப்பூர் இந்திய வர்த்தக சபையின் தலைவர் நீல் பரேக் மற்றும் சிங்கப்பூர் ரியல் எஸ்டேட் டெவலப்பர்கள் சங்கத்தின் (REDAS) தலைமை நிர்வாக அதிகாரி அந்தோனி சுவா ஆகியோர் பிராந்திய மற்றும் உலகளாவிய முதலீட்டாளர்களுக்கான ஒரு நுழைவாயிலாக போர்ட் சிட்டியின் முக்கியத்துவத்தை எடுத்துரைத்தனர்.

மேலும், இப்பிராந்தியத்தின் முன்னனி நிறுவனமான ‘கெப்பல்’ (Keppel) நிறுவனத்துடனான போர்ட் சிட்டியின் வளர்ந்து வரும் ஒத்துழைப்பு குறித்தும் கலந்துரையாடப்பட்டது. கெப்பல் நிறுவனத்தின் மூத்த மேலாளர் லாம் சியு சாங், நிலையான நகர மேம்பாடு மற்றும் எதிர்கால நகரங்களின் பங்கு பற்றி தனது கருத்துக்களைப் பகிர்ந்து கொண்டார்.

முதலீட்டு வாய்ப்புகள் மற்றும் செயல்முறைகள் குறித்த விரிவான விளக்கத்தை CPCEC பணிப்பாளர் நாயகம் ரேவன் விக்ரமசூரிய வழங்கினார். இதில் ‘மூலோபாய முக்கியத்துவம் வாய்ந்த வணிகங்களுக்கான’ (Businesses of Strategic Importance) நீண்டகால நிதிச் சலுகைகள், 16 குறிப்பிட்ட அந்நியச் செலாவணிகளில் பணப் பரிமாற்றம் செய்யும் வசதி மற்றும் முதலீட்டாளர்களுக்கான ‘கிரீன் சேனல்’ (Green Channel) மூலம் விசா வசதிகள் ஆகியவை அடங்கும்.

கேபிஎம்ஜி (KPMG) ஸ்ரீலங்கா சார்பில் சுரேஷ் பெரேரா மற்றும் ரிஃப்கா ஜியார்ட் ஆகியோர் இலங்கையின் பொருளாதாரக் கண்ணோட்டம் மற்றும் போர்ட் சிட்டிக்கான வரி மற்றும் ஒழுங்குமுறை கட்டமைப்பு குறித்த ஒரு புறநிலை மதிப்பீட்டை வழங்கினர். அன்செல் (Ansell) மற்றும் மில்லினியம் ஐடி இஎஸ்பி (Millennium IT ESP) ஆகிய நிறுவனங்களின் சான்றுகள் மூலம் முதலீட்டாளர்களின் நம்பிக்கை மேலும் உறுதிப்படுத்தப்பட்டது.

செக் போர்ட் சிட்டி கொழும்பு லிமிடெட் (CHEC Port City Colombo Ltd) உதவி நிர்வாக இயக்குனர் பாய் சியாப்பிங் நன்றியுரை ஆற்றுகையில், இந்தத் திட்டம் வர்த்தகங்கள் தங்கள் பிராந்திய தலைமையகங்களை நிறுவவும், உலகளாவிய திறமையாளர்களை அணுகவும், தெற்காசியா மற்றும் பரந்த இந்தியப் பெருங்கடல் பொருளாதாரத்துடன் தடையின்றி இணையவும் ஒரு விரிவான சூழலை வழங்குகிறது என்று குறிப்பிட்டார்.