ஞாயிற்றுக்கிழமை பாகிஸ்தானின் கராச்சி மாநகரில் உள்ள அமெரிக்க தூதரகத்தில் நடைபெற்ற ஈரான் ஆதரவு போராட்டங்களின் போது குறைந்தது எட்டு பேர் கொல்லப்பட்டதாக மீட்புப் படை செய்தித் தொடர்பாளர் AFP செய்தி நிறுவனத்திடம் தெரிவித்தார்.
“நாங்கள் குறைந்தது எட்டு உடல்களை கராச்சியின் சிவில் மருத்துவமனைகளுக்கு கொண்டு சென்றுள்ளோம், அதே நேரத்தில் தூதரக சம்பவத்தில் மேலும் 20 பேர் காயமடைந்துள்ளனர்,” என்று எடி அறக்கட்டளை (Edhi Foundation) மீட்புப் பிரிவின் செய்தித் தொடர்பாளர் முகமது அமீன் கூறினார். மேலும், பலியானவர்களில் பெரும்பாலானோர் துப்பாக்கிச் சூட்டுக் காயங்களுக்கு உள்ளாகியிருப்பதாகவும் அவர் குறிப்பிட்டார்.
ஈரான் மீதான அமெரிக்க-இஸ்ரேல் தாக்குதல்களைத் தொடர்ந்து, நூற்றுக்கணக்கான ஈரான் ஆதரவு போராட்டக்காரர்கள் தூதரகத்திற்குள் நுழைய முயன்றனர். இளைஞர்கள் கூட்டமாக முதன்மை வாயிலின் மேல் ஏறி தூதரகக் கட்டிடத்தின் ஓட்டுப்பாதைக்குள் நுழைந்து, அங்கிருந்த ஜன்னல்களை உடைத்தனர்.
காவல்துறையினர் கண்ணீர்ப்புகைக் குண்டுகளை வீசியதைத் தொடர்ந்து போராட்டக்காரர்கள் கலைந்து சென்றனர். சமூக ஊடகங்களில் வெளியான காணொளிகளில், முள்வேலிகளால் சூழப்பட்ட தூதரக வளாகத்தின் மேல் அமெரிக்கக் கொடி பறந்து கொண்டிருக்க, இளைஞர்கள் தூதரகத்தின் முதன்மை கட்டிட ஜன்னல்களை உடைப்பதைக் காண முடிந்தது.
“கராச்சியில் உள்ள அமெரிக்க தூதரகத்திற்கு நாங்கள் தீ வைக்கிறோம். இறைவனின் அருளால், எங்கள் தலைவரின் கொலைக்கு நாங்கள் பழிவாங்குகிறோம்,” என்று போராட்டக்காரர் ஒருவர் கூறியதாக AFP செய்தி வெளியிட்டுள்ளது.
லாகூர் மற்றும் ஸ்கர்டு (Skardu) நகரங்களிலும் ஆயிரக்கணக்கான மக்கள் வீதிகளில் இறங்கி போராடி வருகின்றனர். இன்று மதியம் இஸ்லாமாபாத்தில் உள்ள அமெரிக்க தூதரகம் அமைந்துள்ள இராஜதந்திரப் பகுதியில் (diplomatic enclave) ஒரு பெரிய ஆர்ப்பாட்டம் நடைபெறும் என்று எதிர்பார்க்கப்படுகிறது
