தெஹ்ரானின் போக்குவரத்து கமரா வலையமைப்பில் பல ஆண்டுகளாக நடத்தப்பட்ட இணைய உளவு நடவடிக்கை (Cyber espionage), ஈரானின் அதிஉயர் தலைவரைதுல்லியமாக இலக்கு வைக்க உதவியது.
அலெக்ரா மெண்டல்சன் (The Telegraph ஆசிய நிருபர்)
அலி கமேனியை உளவு பார்ப்பதற்காக தெஹ்ரானின் கிட்டத்தட்ட அனைத்து போக்குவரத்து கமராக்களையும் இஸ்ரேல் ஹேக் செய்ததாகத் தெரிகிறது. ஈரானிய தலைநகரின் போக்குவரத்து கமரா வலையமைப்பை அணுகுவதன் மூலம், இஸ்ரேலிய உளவாளிகள் பல ஆண்டுகளாக ஆயதுல்லாவின் பாதுகாவலர்களைக் கண்காணித்து வந்ததாக ஆதாரங்கள் தெரிவிக்கின்றன.
கமேனியின் வளாகத்திற்கு எதிரே இருந்த ஒரு பாதுகாப்பு கமராவையும் உளவு அமைப்பினர் ஹேக் செய்திருந்தனர். இது பாதுகாப்புப் படையினர் தங்கள் கார்களை எங்கே நிறுத்துகிறார்கள் என்பதைக் காட்டியது. இந்த மூலோபாய ரீதியாக வைக்கப்பட்ட கமரா மூலம், ஆயதுல்லா எப்போது வீட்டில் இருப்பார் என்பதை உளவாளிகள் அறிந்து கொண்டனர். மேலும், ஒரு தாக்குதல் (Ambush) நடக்கும் பட்சத்தில் உதவியாளர்கள் உதவிக்கு அழைக்க முடியாதபடி, அவரது வளாகத்தைச் சுற்றியுள்ள மொபைல் போன் சேவையையும் அவர்களால் துண்டிக்க முடிந்தது.
இந்தக் கமரா படங்கள் குறியீடாக்கப்பட்டு (Encrypted) இஸ்ரேலுக்குத் திருப்பி அனுப்பப்பட்டன. இது கடந்த வார இறுதியில் நடந்த அமெரிக்க-இஸ்ரேலிய தாக்குதலுக்கு முன்னதாக, ஈரானின் மிக மூத்த பாதுகாப்பு அதிகாரிகளின் முகவரிகள், வேலை நேரம், செல்லும் பாதைகள் மற்றும் கடமைகளைத் தீர்மானிக்க உளவுத்துறை அதிகாரிகளுக்கு உதவியது.
“எங்களுக்கு ஜெருசலேமைத் தெரிந்தது போலவே தெஹ்ரானையும் தெரியும்,” என்று இஸ்ரேலிய உளவுத்துறை அதிகாரி ஒருவர் பைனான்சியல் டைம்ஸிடம் (Financial Times) தெரிவித்தார். “நீங்கள் வளர்ந்த தெருவைப் போலவே ஒரு இடத்தைப் பற்றி நன்கு தெரிந்திருக்கும்போது, அங்கு சிறிய மாற்றம் நடந்தாலும் உங்களால் அதைக் கவனிக்க முடியும்.”
கடந்த ஆண்டு நடந்த 12 நாள் போரின்போது இஸ்ரேலின் உளவுத்துறை மேலாதிக்கம் வெளிப்பட்டது. அப்போது அமெரிக்காவுடன் இணைந்து நடத்திய கூட்டு நடவடிக்கையில் ஈரானிய ராணுவ தளங்கள், அணுசக்தி நிலையங்கள் தாக்கப்பட்டன மற்றும் ஒரு டஜனுக்கும் மேற்பட்ட அணு விஞ்ஞானிகள் மற்றும் மூத்த அதிகாரிகள் கொல்லப்பட்டனர்.
ஆபரேஷன் எபிக் ஃபியூரி (Operation Epic Fury) என்று அழைக்கப்படும் சமீபத்திய அமெரிக்க-இஸ்ரேலிய தாக்குதலில், மக்களின் நடத்தை முறைகளை ஆய்வு செய்யவும், அவர்கள் எப்படி ஒருவருக்கொருவர் பழகுகிறார்கள் என்பதைப் புரிந்துகொள்ளவும் ‘சமூக வலைப்பின்னல் பகுப்பாய்வு’ (Social network analysis) என்ற முறையை இஸ்ரேல் பயன்படுத்தியது.
இந்தத் தகவல்களின் அடிப்படையில், கமேனி ஒரு பதுங்கு குழிக்குத் தப்பிச் செல்லும் போர்ச் சூழலில் அவரைத் தாக்குவதை விட, தாக்குதலின் தொடக்கத்திலேயே அவரை அழிப்பது எளிது என்று இஸ்ரேல் மற்றும் சி.ஐ.ஏ (CIA) தீர்மானித்தன. சனிக்கிழமை காலை கமேனி தனது வளாகத்தில் நேரில் ஒரு கூட்டத்தில் கலந்து கொள்வார் என்று தெரியவந்ததும், தாக்குதலுக்கான கால அட்டவணை மாற்றியமைக்கப்பட்டது.
தாக்குதல் நடந்த அன்று, ஹேக் செய்யப்பட்ட கமராக்கள் மற்றும் ஈரானிய மொபைல் நெட்வொர்க்குகள் மூலம், கமேனியின் கூட்டம் சரியான நேரத்தில் நடப்பதை இரண்டு இஸ்ரேலிய உளவுத்துறை அதிகாரிகள் உறுதி செய்தனர்.
டொனால்ட் டிரம்ப் ஃபாக்ஸ் நியூஸிடம் கூறுகையில், “கமேனி தனது நெருங்கிய கூட்டாளிகளுடன் காலை உணவிற்காகச் சேர்ந்திருந்தபோது அவர் கொல்லப்பட்டார்,” என்றார். இரவில் தாக்குதல் நடத்துவதற்குப் பதிலாக, பகலில் தாக்கியது இஸ்ரேலுக்கு இரண்டாவது முறையாக ஒரு தந்திரோபாய ஆச்சரியத்தை (Tactical surprise) ஏற்படுத்த உதவியதாக இஸ்ரேல் பாதுகாப்புப் படை (IDF) தெரிவித்தது.
இந்த நடவடிக்கையின் ஆரம்பக் கட்டம் ஈரானைத் “திகைக்க வைக்கவும் குழப்பமடையச் செய்யவும்” வடிவமைக்கப்பட்டது என்று அமெரிக்க ஜெனரல் டான் கெய்னம் தெரிவித்தார். ஒருங்கிணைந்த விண்வெளி மற்றும் இணையச் செயல்பாடுகள் (Cyber operations) ஈரானின் தகவல் தொடர்பு மற்றும் சென்சார் நெட்வொர்க்குகளை வெற்றிகரமாக முடக்கின. இதனால் எதிரிகளால் எதையும் பார்க்கவோ, ஒருங்கிணைக்கவோ அல்லது பதிலடி கொடுக்கவோ முடியாமல் போனது.
