CNN
சனிக்கிழமை அன்று ஒரு சிறுமிகளுக்கான ஆரம்பப் பள்ளி மீது அமெரிக்க-இஸ்ரேல் நடத்திய தாக்குதலில் கொல்லப்பட்ட குறைந்தது 168 குழந்தைகள் மற்றும் 14 ஆசிரியர்களின் மரணத்திற்கு இரங்கல் தெரிவிக்க, தெற்கு ஈரானிய நகரமான மினாப்பில் பெருந்திரளான மக்கள் திரண்டுள்ளனர் என்று அரசு ஊடகங்கள் தெரிவிக்கின்றன.
துக்கத்தில் இருந்தவர்களில் சிலர் கொல்லப்பட்ட குழந்தைகளின் புகைப்படங்களை ஏந்தியிருந்தனர் – அவர்களில் சிலருக்கு வெறும் 7 வயது தான். இது தீவிரமடைந்து வரும் இந்தப் போரின் இதயத்தில் இருக்கும் ஒரு மனிதப் பேரவலத்தின் அப்பட்டமான நினைவூட்டலாக அமைந்தது. இந்தத் தாக்குதலில் கொல்லப்பட்டவர்கள் பற்றிய கூடுதல் விவரங்கள் இன்னும் வெளிவராத நிலையில், ஈரானிய ரெட் கிரசண்ட் (Red Crescent) அமைப்பின் கூற்றுப்படி, 153 மாவட்டங்களில் குறைந்தது 780 பேர் கொல்லப்பட்டுள்ளனர்.
இறுதிச் சடங்கின் வீடியோ மற்றும் படங்களில், ஈரானிய தேசியக் கொடி போர்த்தப்பட்ட சிறிய பிரேதப்பெட்டிகளை சுற்றிச சுற்றி மக்கள் திரண்டு பிரார்த்தனை செய்வதைக் காண முடிந்தது.
திங்கட்கிழமை அன்று, ஈரானிய வெளியுறவு அமைச்சர் அப்பாஸ் அரக்சி (Abbas Araghchi), குழந்தைகளைக் கொன்றதாக அமெரிக்கா மற்றும் இஸ்ரேல் மீது குற்றம் சாட்டினார். :
“அமெரிக்க-இஸ்ரேல் ஆரம்பப் பள்ளி மீது நடத்திய குண்டுவீச்சில் கொல்லப்பட்ட 160-க்கும் மேற்பட்ட அப்பாவி சிறுமிகளுக்காக இந்த கல்லறைகள் தோண்டப்படுகின்றன. அவர்களின் உடல்கள் சிதைந்துவிட்டன,” என்று அரக்சி கூறியுள்ளார்.
இதற்கிடையில், அமெரிக்க வெளியுறவுத்துறை அமைச்சர் மார்க் ரூபியோ (Mark Rubio) திங்கட்கிழமை செய்தியாளர்களிடம் கூறுகையில், அமெரிக்கா “திட்டமிட்டு ஒரு பள்ளியை இலக்கு வைக்காது” என்று தெரிவித்தார். “அது எங்களது தாக்குதலாக இருந்தால், போர் அமைச்சகம் (Department of War) அதைப் பற்றி விசாரிக்கும், உங்கள் கேள்வியை அவர்களிடம் கேட்குமாறு பரிந்துரைக்கிறேன்,” என்றார் அவர்.
இஸ்ரேல் ஈரானில் தனது தாக்குதல்களைத் தொடர்ந்து தீவிரப்படுத்தி வரும் நிலையில், தெஹ்ரானில் குடியிருப்புகள் தரைமட்டமாக்கப்பட்டுள்ள புகைப்படங்கள் செவ்வாய்க்கிழமை வெளியாகியுள்ளன.
READ MORE
