இலங்கை கடலிற்கு அருகில் ஈரான் போர்க்கப்பல் தாக்கப்பட்ட பின்னர் தென்படும் எண்ணெய் படலம்

கமந்தி விக்ரமசிங்க 2026 மார்ச் 13-MONGABAY 

இந்தியப் பெருங்கடலில் ஈரான்  போர்க்கப்பல்  மார்ச் 4ஆம் தேதி மூழ்கடிக்கப்பட்டதைத் தொடர்ந்து, தென்னிலங்கையின் ஹிக்கடுவ கடற்கரையோரத்தில் மீனவர்களும் கடலோர சமூகத்தினரும் எண்ணெய் படலம் ஒன்றைக் கண்டறிந்துள்ளனர். இது அந்தப் பகுதியில் பெரும் கவலையை ஏற்படுத்தியுள்ளது.

இந்த எண்ணெய் படலம் மற்றும் கரைக்கு அடித்து வரப்பட்ட சிதைவுகள் குறித்து அதிகாரிகள் விசாரணைகளை மேற்கொண்டு வருகின்றனர். ஆய்வுகளின்படி, இலங்கையைச் சுற்றியுள்ள கடல் பகுதி எண்ணெய் கசிவுகளால் பாதிக்கப்படக்கூடிய அதிக ஆபத்தில் உள்ளது. ஏனெனில் உலகளவில் கொண்டு செல்லப்படும் எண்ணெய்யில் 25%-க்கும் அதிகமானவை இலங்கையின் பிரத்தியேக பொருளாதார வலயத்தின் ஊடாகவே பயணிக்கின்றன.

கப்பல் மூழ்கியதால் சுற்றுச்சூழல் பாதிப்பு உறுதிசெய்யப்பட்டால், “மாசுபடுத்துபவரே நட்டஈடு வழங்க வேண்டும்” (polluter pays principle) என்ற கொள்கை பயன்படுத்தப்பட வேண்டும் என்று சட்ட நிபுணர்கள் கூறுகின்றனர்.

இலங்கையின் காலி கடற்கரைக்கு அப்பால் ஈரான் நாட்டுப் போர்க்கப்பலான ஐரிஸ் டெனா (IRIS Dena), அமெரிக்க கடற்படையின் நீர்மூழ்கிக் கப்பலால் தகர்க்கப்பட்டு மூன்று நாட்களுக்குப் பிறகு, மார்ச் 7 சனிக்கிழமை அன்று ஹிக்கடுவ கடற்கரையில் ஒரு தடிமனான எண்ணெய் படலத்தை மக்கள் கவனித்தனர்.

ஹிக்கடுவ இலங்கையின் தெற்கில் உள்ள மிக முக்கியமான சுற்றுலாத் தலங்களில் ஒன்றாகும். டிசம்பர் முதல் மார்ச் வரையிலான காலப்பகுதியில் இங்கு சுற்றுலாப் பயணிகள் அதிகளவில் வருகை தருவார்கள்.

எண்ணெய் கசிவு ஓரளவிற்கு கட்டுப்பாட்டுக்குள் கொண்டுவரப்பட்டுள்ளதாக அதிகாரிகள் கூறினாலும், ஹிக்கடுவ மற்றும் அதன் சுற்றுப்புறங்களில் உள்ள கடல்சார் சுற்றுச்சூழல் அமைப்புகளில் இந்த எண்ணெய் கசிவு ஏற்படுத்தக்கூடிய பாதிப்புகள் குறித்து சூழலியலாளர்கள் கவலை தெரிவித்துள்ளனர்.

இந்தக் கப்பல் யுஎஸ்எஸ் சார்லோட் (USS Charlotte) என்ற அமெரிக்க நீர்மூழ்கிக் கப்பலால் தாக்கப்பட்டது. சர்வதேச கடற்படை பயிற்சியில் (International Fleet Review 2026) பங்கேற்றுத் திரும்பிக் கொண்டிருந்த போதே இந்தச் சம்பவம் நிகழ்ந்துள்ளது. இது இலங்கையின் தெற்கு கடற்கரையிலிருந்து சுமார் 40 கடல் மைல் (74 கிலோமீட்டர்) தொலைவில் உள்ள சர்வதேச கடல் பகுதியில் நடந்துள்ளது.

“மார்ச் 7 காலை ஹிக்கடுவ கடற்கரையில் எண்ணெய் படலங்கள் காணப்படுவதாக எங்களுக்கு தகவல் கிடைத்ததும், நிலைமையை சரிபார்க்க குழுக்களை அனுப்பினோம்,” என்று இலங்கை கடல்சார் சுற்றுச்சூழல் பாதுகாப்பு அதிகாரசபையின் (MEPA) தலைவர் சமந்த குணசேகர தெரிவித்தார். ஹிக்கடுவ, தொடங்கடுவ, ஹபராடுவ, சீநிகம, காலி மற்றும் ஹினிதும ஆகிய பகுதிகளில் எண்ணெய் படலங்கள் காணப்பட்ட புகைப்படங்கள் பெறப்பட்டுள்ளன. கரைக்கு அடித்து வரப்பட்ட சில எண்ணெய் பீப்பாய்களும் சேதமடைந்திருந்தன. இதிலிருந்து கசிந்த மசகு எண்ணெய்யாக (Lubricant oil) இது இருக்கலாம் என்று கருதப்படுகிறது.

செயற்கைக்கோள் தரவுகள்

எண்ணெய் கசிவுகளைக் கண்காணிப்பதில் நிபுணத்துவம் பெற்ற ஸ்பெயினைச் சேர்ந்த ஆர்பிட்டல் (Orbital) நிறுவனத்தின் தலைமை நிர்வாக அதிகாரி ஜுவான் பெனா இபானிஸ் கூறுகையில், மார்ச் 5ஆம் தேதி காலையிலேயே இந்த கசிவு முதன்முதலில் கவனிக்கப்பட்டதாகத் தெரிவித்தார். சுமார் 18 கிலோமீட்டர் நீளமுள்ள இந்த கசிவு கடற்கரையை நோக்கி நகர்ந்து, ஹிக்கடுவவின் தெற்குப் பகுதியை பாதித்துள்ளது. ஐரிஸ் டெனா கப்பலின் சிதைவுகளிலிருந்து தொடர்ந்து எண்ணெய் கசிந்து கொண்டிருப்பதாகத் தோன்றுவதாகவும் அவர் கூறினார்.

மீனவர் சங்கங்களின் ஒருங்கிணைப்பாளர் துலிப் ரங்கஜீவ கூறுகையில், இந்த எண்ணெய் கசிவு விரைவில் அகற்றப்படாவிட்டால், அது மீனவர்களின் வாழ்வாதாரத்தையும் சூழலையும் கடுமையாகப் பாதிக்கும் என்றார். எண்ணெய் படலம் இருந்தால் மீன்கள் மேற்பரப்புக்கு வராது என்றும், வலைகளில் எண்ணெய் ஒட்டிக்கொண்டால் மீன்பிடி நடவடிக்கைகளில் ஈடுபடுவது கடினம் என்றும் அவர் சுட்டிக்காட்டினார்.

சுற்றுச்சூழல் பாதிப்புகள்

கடல்சார் பாதுகாப்பு அமைப்பான த பேர்ல் ப்ரோடெக்டர்ஸ் (The Pearl Protectors) நிறுவனத்தின் நிறுவனர் முடித கடுவாவல, 2018 மற்றும் 2021-ல் (X-Press Pearl) ஏற்பட்ட எண்ணெய் கசிவு சம்பவங்களை நினைவு கூர்ந்தார். மார்ச் முதல் ஏப்ரல் வரையிலான காலம் மீன் முட்டைகள் மற்றும் லார்வாக்கள் (larvae) உருவாகும் காலம் என்பதால், இந்த நச்சுத்தன்மை வாய்ந்த எண்ணெய் கசிவு மீன் இனப்பெருக்கத்தைப் பாதிக்கும் என்று அவர் எச்சரித்தார்.

மேலும், இது கடல் ஆமைகள் முட்டையிடும் காலம் என்பதால், ஆமைகள் சுவாசிப்பதற்கும் உணவு தேடுவதற்கும் மேற்பரப்புக்கு வரும்போது இந்த எண்ணெய் கசிவால் கடுமையாகப் பாதிக்கப்படும்.

தற்போதைய நிலை

சுமார் 90% எண்ணெய் படலம் சனிக்கிழமை அன்று சுத்தம் செய்யப்பட்டதாக MEPA தலைவர் தெரிவித்தார். இருப்பினும், இந்த எண்ணெய் படலம் மூழ்கிய ஈரான் கப்பலிலிருந்து தான் வந்தது என்பதை அவர் இன்னும் உறுதிப்படுத்தவில்லை. அந்தப் பாதையில் தினமும் சுமார் 400 கப்பல்கள் செல்வதால், மற்ற கப்பல்கள் வேண்டுமென்றே வெளியேற்றிய எண்ணெய்யாகவும் இது இருக்கலாம் என்று அவர் கூறினார். மாதிரிகள் ஆய்வகத்திற்கு அனுப்பப்பட்டுள்ளன.

சுற்றுச்சூழல் நீதிக்கான மையத்தின் (Centre for Environmental Justice) வழக்கறிஞர் ரவீந்திரநாத் தாபரே கூறுகையில், இந்த எண்ணெய் கசிவு ஈரான் போர்க்கப்பலுடன் தொடர்புடையது என உறுதிசெய்யப்பட்டால், தாக்குதலை நடத்தியவர்களே பாதிப்புகளுக்குப் பொறுப்பேற்க வேண்டும் என்றார். இது தூதரக மட்டத்தில் கையாளப்பட வேண்டிய விஷயம் என்றும் அவர் குறிப்பிட்டார்.