அமெரிக்க ஊடகவியலாளர் ஷெல்லி கிட்டில்சன் (Shelly Kittleson) செவ்வாய்க்கிழமை பாக்தாத்தில் வைத்து கடத்தப்பட்டதாக ஈராக்கிய அதிகாரி மற்றும் இந்த விவகாரத்தை அறிந்த இருவர் உறுதிப்படுத்தியுள்ளனர்.
அடையாளம் தெரியாத நபர்களால் வெளிநாட்டு ஊடகவியலாளர் ஒருவர் கடத்தப்பட்டதாக ஈராக் உள்துறை அமைச்சு அறிவித்துள்ளது. எனினும் கடத்தப்பட்டவர் யார் என்பதை அந்த அமைச்சு பெயரிடவில்லை. இக்கடத்தல் சம்பவத்துடன் தொடர்புடைய சந்தேக நபர் ஒருவர் கைது செய்யப்பட்டுள்ளதாகவும், கடத்தலுக்குப் பயன்படுத்தப்பட்ட வாகனம் கைப்பற்றப்பட்டுள்ளதாகவும் அமைச்சு தெரிவித்துள்ளது.
அமெரிக்காவில் உள்ள கிட்டில்சனின் தொடர்பு அதிகாரி அலெக்ஸ் பிளிட்சாஸ் (Alex Plitsas), கிட்டில்சன் கடத்தப்பட்டதை CBS News நிறுவனத்திற்கு உறுதிப்படுத்தினார். ஈரான் ஆதரவு பெற்ற ‘கதாயிப் ஹிஸ்புல்லா’ (Kata’ib Hezbollah) என்ற துணை இராணுவக் குழுவினால் கிட்டில்சனுக்கு ஆபத்து இருப்பதாக அமெரிக்க அரசாங்கம் ஏற்கனவே எச்சரித்திருந்ததாக அவர் குறிப்பிட்டார். பெண் ஊடகவியலாளர்களைக் கடத்த அல்லது கொல்ல அக்குழு திட்டமிட்டிருந்ததாகக் கூறப்படுகிறது.
கிட்டில்சனுக்கு எதிராக விடுக்கப்பட்ட எச்சரிக்கைகள் குறித்து அவர் பலமுறை தொடர்பு கொள்ளப்பட்டதாகவும், கடைசியாக திங்கட்கிழமை இரவு கூட அவருக்கு எச்சரிக்கை விடுக்கப்பட்டதாகவும் அமெரிக்க அதிகாரி ஒருவர் தெரிவித்தார்.
பாதுகாப்பு நடவடிக்கைகள்: கிட்டில்சனை விடுவிப்பதற்காக ஈராக்கிய அதிகாரிகள் “உயர்மட்டத்தில்” பணியாற்றி வருவதாகத் தெரிவிக்கப்பட்டுள்ளது. அமெரிக்காவின் FBI, தேசிய பாதுகாப்பு கவுன்சில், இராஜாங்கத் திணைக்களம், டெல்டா ஃபோர்ஸ் (Delta Force) மற்றும் ஈராக்கிய பயங்கரவாத எதிர்ப்புப் படை ஆகியவை இது குறித்துத் தொடர்பில் உள்ளன.
பின்னணி: இத்தாலிய அமெரிக்கரான ஷெல்லி கிட்டில்சன், ரோம் நகரில் வசித்து வருகிறார். ‘அல்-மானிட்டர்’ (Al-Monitor) செய்தி நிறுவனத்திற்காக ஈராக் மற்றும் சிரியாவில் பலமுறை கள ஆய்வுகளை மேற்கொண்ட அனுபவம் கொண்டவர். அவர் பாக்தாத்திற்குச் செல்வதற்கு முன்பு, அங்குள்ள ஒரு குடும்பத்தினர் தமக்கு பாதுகாப்பு அளிப்பதாகக் கூறியதாகத் தனது நண்பரிடம் தெரிவித்துள்ளார்.
கடந்த மார்ச் 29 அன்று, ஈராக்கிலுள்ள அமெரிக்க தூதரகம், ஈரானுடன் தொடர்புடைய போராளிக் குழுக்கள் அமெரிக்க நிறுவனங்களை இலக்கு வைக்கக்கூடும் என எச்சரித்திருந்ததுடன், அமெரிக்கர்களை உடனடியாக ஈராக்கை விட்டு வெளியேறுமாறு அறிவுறுத்தியிருந்தமை குறிப்பிடத்தக்கது.
