ஈரான் தூதுக்குழு இஸ்லாமாபாத் வந்தடைந்துள்ளது. அமெரிக்காவுடனான அமைதிப் பேச்சுவார்த்தைகள் சனிக்கிழமை பிற்பகல் நடைபெறவுள்ள நிலையில், இந்த விவாதங்களுக்கு முன்னதாக நீங்கள் தெரிந்து கொள்ள வேண்டிய முக்கிய அம்சங்கள் இதோ:
1. மத்தியஸ்தராக பாகிஸ்தானின் பங்கு
கடந்த சில வாரங்களாக அமெரிக்காவிற்கும் ஈரானுக்கும் இடையே பாகிஸ்தான் ஒரு பாலமாகச் செயல்பட்டு வருகிறது. ஈரானுடன் பாகிஸ்தான் நீண்டகால வரலாற்றுத் தொடர்பைக் கொண்டுள்ளது. பாகிஸ்தான் இராணுவத் தளபதி ஆசிம் முனீர் (Asim Munir), ஈரானைப் பற்றி “மற்றவர்களை விட நன்றாக அறிந்தவர்” என்று அமெரிக்க அதிபர் டொனால்ட் ட்ரம்ப் குறிப்பிட்டுள்ளார்.
2. மேசையில் உள்ள முன்மொழிவுகள்
பேச்சுவார்த்தைக்கு அடிப்படையாக ஈரானிடமிருந்து 10 அம்சங்கள் கொண்ட முன்மொழிவு கிடைத்துள்ளதாக ட்ரம்ப் தெரிவித்துள்ளார். அதேவேளை, ஈரானிய வெளியுறவு அமைச்சர் அப்பாஸ் அரக்ச்சி (Abbas Araghchi) 15 அம்சத் திட்டம் ஒன்றைக் குறிப்பிட்டுள்ளார். இந்த இரண்டு முன்மொழிவுகளும் இன்னும் உத்தியோகபூர்வமாக வெளியிடப்படவில்லை. கசிந்த தகவல்களின்படி, இரு தரப்பு முன்மொழிவுகளுக்கும் இடையே மிகப்பெரிய வேறுபாடுகள் இருப்பதாக இராஜதந்திர வட்டாரங்கள் தெரிவிக்கின்றன.
3. லெபனான் மீதான தாக்குதல்கள் ஏற்படுத்தும் தாக்கம்
லெபனான் மீது இஸ்ரேல் தொடர்ந்து நடத்தி வரும் தாக்குதல்கள் இந்தப் பேச்சுவார்த்தையின் மீது சந்தேகத்தை எழுப்பியுள்ளன. தற்போதைய போர்நிறுத்தம் லெபனானுக்குப் பொருந்தாது என்று இஸ்ரேல் பிரதமர் பெஞ்சமின் நெதன்யாகு வலியுறுத்தியுள்ளார். புதன்கிழமை நடத்தப்பட்ட குண்டுவீச்சில் 300-க்கும் மேற்பட்டோர் கொல்லப்பட்டதாக லெபனான் சுகாதார அமைச்சு தெரிவித்துள்ளது. எனினும், அடுத்த வாரம் வொஷிங்டனில் இஸ்ரேலுடன் போர்நிறுத்தம் குறித்துப் பேசத் தயார் என லெபனான் தெரிவித்துள்ளது.
4. அமெரிக்கத் தூதுக்குழு
இந்தப் பேச்சுவார்த்தையில் அமெரிக்காவைப் பிரதிநிதித்துவப்படுத்த துணை அதிபர் ஜே.டி. வான்ஸ் (JD Vance) இஸ்லாமாபாத் வந்துகொண்டிருக்கிறார். அவருடன் சிறப்புத் தூதர் ஸ்டீவ் விட்காஃப் (Steve Witkoff) மற்றும் டொனால்ட் ட்ரம்ப்பின் மருமகனும் ஆலோசகருமான ஜாரெட் குஷ்னர் (Jared Kushner) ஆகியோரும் இக்குழுவில் இடம்பெற்றுள்ளனர்.
