சீனா மற்றும் இந்தியாவுடன் இருதரப்பு பேச்சுவார்த்தை: புவிசார் அரசியல் அபாயங்கள் மற்றும் வர்த்தகக் கொடுக்கல் வாங்கல்கள் குறித்து இலங்கை மத்திய வங்கி கலந்துரையாடல்

சர்வதேச நாணய நிதியம் மற்றும் உலக வங்கியின் 2026ஆம் ஆண்டு வசந்தகால கூட்டத்தொடரின் (Spring Meetings 2026) ஒரு அங்கமாக, இலங்கை மத்திய வங்கியின் (CBSL) ஆளுநர் கலாநிதி நந்தலால் வீரசிங்க, சீன மக்கள் வங்கியின் ஆளுநர் கலாநிதி பான் கொங்ஷெங்குடன் (Dr. Pan Gongsheng) இருதரப்பு பேச்சுவார்த்தைகளை நடத்தினார்.

இந்தச் சந்திப்பின் போது, இரு ஆளுநர்களும் தீவிரமடைந்து வரும் புவிசார் அரசியல் பதற்றங்கள் குறித்து கலந்துரையாடினர். குறிப்பாக, மத்திய கிழக்கில் நிலவும் பதற்றமான சூழலால் இலங்கைக்கு ஏற்பட்டுள்ள சவால்கள் உள்ளிட்ட அண்மைக்கால பொருளாதார முன்னேற்றங்கள் குறித்து ஆளுநர் வீரசிங்க சீன ஆளுநருக்கு விளக்கமளித்ததாக மத்திய வங்கி தெரிவித்துள்ளது.

மேலும், நிறுவனங்களுக்கிடையிலான தொடர்ச்சியான ஈடுபாட்டின் முக்கியத்துவத்தை இந்த விவாதங்கள் சுட்டிக்காட்டியதுடன், இலங்கை மற்றும் சீனாவிற்கு இடையிலான வர்த்தகக் கொடுக்கல் வாங்கல்களில் சீன நாணயமான ‘ரென்மின்பி’ (Renminbi) பயன்பாட்டை ஊக்குவிப்பதன் மூலம் கிடைக்கக்கூடிய சாத்தியமான நன்மைகள் குறித்தும் ஆராயப்பட்டது.

இதேவேளை, இதே மாநாட்டின் மற்றொரு நிகழ்வாக கலாநிதி நந்தலால் வீரசிங்க இந்திய ரிசர்வ் வங்கியின் ஆளுநர் ஸ்ரீ சஞ்சய் மல்ஹோத்ராவையும் சந்தித்துப் பேசினார்.

இரு ஆளுநர்களும் அந்தந்த நாடுகளின் தற்போதைய மேக்ரோ பொருளாதார நிலைமைகள் குறித்துக் கருத்துக்களைப் பரிமாறிக்கொண்டனர். குறிப்பாக மத்திய கிழக்கு நெருக்கடியின் தாக்கம் மற்றும் இந்த உலகளாவிய விநியோக அதிர்ச்சியிலிருந்து (Global supply shock) பாதுகாத்துக் கொள்ள எடுக்கப்பட்ட கொள்கை நடவடிக்கைகள் குறித்து இதன்போது முக்கியத்துவம் அளிக்கப்பட்டது.

இருதரப்பு வர்த்தகம் மற்றும் சுற்றுலாவை எளிதாக்குவதில் இந்திய ரூபாய் அடிப்படையிலான தீர்வு வழிமுறைகளின் (Indian rupee-based settlement mechanisms) பயன்பாட்டை அதிகரிப்பதற்கான தற்போதைய முயற்சிகள் குறித்தும் இந்த உரையாடலில் ஆலோசிக்கப்பட்டதாக மத்திய வங்கி மேலும் தெரிவித்துள்ளது.