கொழும்பு: இலங்கை வெளிவிவகார மற்றும் வெளிநாட்டு வேலைவாய்ப்பு பிரதி அமைச்சர் அருண் ஹேமச்சந்திர மற்றும் கட்டார் தொழிலாளர் நல அமைச்சர் கலாநிதி அலி பின் சயீத் பின் ஸ்மேக் அல் மாரி (Dr. Ali bin Saeed bin Smeikh Al Marri) ஆகியோருக்கு இடையிலான சந்திப்பின் போது, தொழிலாளர் மற்றும் வெளிநாட்டு வேலைவாய்ப்புத் துறைகளில் இருதரப்பு ஒத்துழைப்பை மேலும் வலுப்படுத்துவது குறித்து கலந்துரையாடப்பட்டது.
இரு நாடுகளுக்கும் இடையிலான இராஜதந்திர உறவுகளின் 50வது ஆண்டு நிறைவை முன்னிட்டு, செப்டம்பர் 20 முதல் 23 வரை பிரதி அமைச்சர் ஹேமச்சந்திர கட்டாருக்கு மேற்கொண்ட உத்தியோகபூர்வ விஜயத்தின் போது தோஹாவில் இச்சந்திப்பு நடைபெற்றது.
திறமையான மற்றும் தொழில்முறைத் தகுதி வாய்ந்த இலங்கை பணியாளர்களுக்கான வேலைவாய்ப்புகளை விரிவுபடுத்துதல், பணியாளர்களின் நலன் மற்றும் பாதுகாப்பை வலுப்படுத்துதல், வெளிப்படையான ஆட்சேர்ப்பு நடைமுறைகளை ஊக்குவித்தல் மற்றும் தொழில்முறைத் தகுதிகளை பரஸ்பரம் அங்கீகரித்தல் ஆகிய விடயங்கள் குறித்து இக்கலந்துரையாடலில் முக்கிய கவனம் செலுத்தப்பட்டது.
தற்போது சுமார் 1,40,000 இலங்கையர்கள் கட்டாரில் பணிபுரிந்து வரும் நிலையில், தொழிலாளர் மற்றும் வெளிநாட்டு வேலைவாய்ப்புத் துறை என்பது இலங்கை-கட்டார் இருதரப்பு உறவுகளில் ஒரு முக்கிய அங்கமாகத் திகழ்கிறது என பிரதி அமைச்சர் ஹேமச்சந்திர சுட்டிக்காட்டினார்.
பல வருடங்களுக்குப் பிறகு இலங்கை-கட்டார் கூட்டுக்கமிட்டி கூட்டத்தை மீண்டும் கூட்டுவதன் முக்கியத்துவத்தையும் அவர் வலியுறுத்தினார். இந்த பொறிமுறையானது இருதரப்பு பேச்சுவார்த்தைகளை தொழிலாளர்கள் மற்றும் முதலாளிகளுக்கான நடைமுறை நன்மைகளாக மாற்ற உதவும் என்றும் அவர் தெரிவித்தார்.
மேலும், திறன் மேம்பாட்டுத் திட்டங்களை வலுப்படுத்துவது குறித்தும், கட்டாரில் இலங்கையர்களுக்கு திறன் சார்ந்த மற்றும் அதிக மதிப்புள்ள வேலைவாய்ப்புகளுக்கான வாய்ப்புகளை அதிகரிப்பது குறித்தும் இரு தரப்பினரும் கலந்துரையாடினர்.
இந்த இலங்கைத் தூதுக்குழுவில் கட்டாருக்கான இலங்கைத் தூதுவர் சித்தாரா கான் (Sitara Khan) மற்றும் ஏனைய அதிகாரிகளும் கலந்துகொண்டனர்.
