பொலிஸ் காவலில் சந்தேகநபர் ஒருவர் உயிரிழந்ததைத் தொடர்ந்து பணி இடைநிறுத்தம் செய்யப்பட்ட ஹோமாகம பொலிஸ் குற்றத்தடுப்புப் பிரிவின் பொறுப்பதிகாரி (OIC) கைது செய்யப்பட்டுள்ளார்.
பொலிஸ் காவலில் நிகழ்ந்த உயிரிழப்பு தொடர்பான மேல் மாகாண தெற்கு குற்றப் புலனாய்வுப் பிரிவின் அதிகாரிகளால் முன்னெடுக்கப்பட்டு வரும் விசாரணைகளின் அடிப்படையில் இந்த கைது நடவடிக்கை மேற்கொள்ளப்பட்டுள்ளது.
ஹோமாகம பொலிஸ் காவலில் இருந்தபோது உயிரிழந்த இஷார ஹர்ஷன எனும் இளைஞனின் மரணம் தொடர்பிலேயே இச்சம்பவம் இடம்பெற்றுள்ளது.
பொலிஸ் காவலில் உள்ள சந்தேகநபர்கள் நடத்தப்படும் விதம் குறித்து இந்த மரணம் பலத்த கவலையை உருவாக்கியுள்ளதோடு, இச்சம்பவம் தொடர்பான சூழ்நிலைகள் குறித்து சுதந்திரமான மற்றும் வெளிப்படையான விசாரணை நடத்தப்பட வேண்டும் என்ற கோரிக்கைகளும் எழுந்துள்ளன.
காவலில் உள்ள தனிநபர்களின் பாதுகாப்பு மற்றும் நலனை உறுதி செய்ய வேண்டிய பொறுப்பு பொலிஸ் அதிகாரிகளுக்கு உள்ளது என்பதை வலியுறுத்தி, எதிர்க்கட்சித் தலைவர் சஜித் பிரேமதாசவும் இது தொடர்பில் சுதந்திரமான விசாரணைக்கு அழைப்பு விடுத்திருந்தார்.
இவ்வுயிரிழப்பு தொடர்பான மேலதிக விசாரணைகள் தற்போது முன்னெடுக்கப்பட்டு வருகின்றன
