மாத்தளை மாவட்ட மனித புதைகுழி தொடர்பான விசாரணைகளை மீண்டும் ஆரம்பிக்கவேண்டும் என வலிந்து காணாமலாக்கப்பட்டவர்களின் உறவினர்கள் சமர்ப்பித்த மனுமீதான விசாரணைகள் நவம்பர் 11ம் திகதி இடம்பெறவுள்ளது.
நாளை விசாரணைகள் இடம்பெறும்வேளை வலிந்து காணாமலாக்கப்பட்டவர்களின் உறவினர்கள் வெள்ளை ஆடை அணிந்து தங்கள் அன்புக்குரியவர்களின் புகைப்படங்களை ஏந்தியவாறு நீதிமன்றத்திற்கு முன்னால் ஒன்றுகூடி நீதிமன்ற நடவடிக்கைகளை பார்வையிடுவதற்காக நீதிமன்ற வளாகத்திற்கு செல்லவுள்ளனர்.
மாத்தளை ஆதார வைத்தியசாலைக்கான கட்டுமான பணிகள் இடம்பெற்றுக்கொண்டிருந்தவேளை 2012ம் ஆண்டு 150க்கும் மேற்பட்ட உடல்களுடன் மனித புதைகுழி கண்டுபிடிக்கப்பட்டமை பெரும் அதிர்ச்சியை ஏற்படுத்தியிருந்தது.
1988-89ம் ஆண்டு ஜேவிபி கிளர்ச்சியின் போது படையினரால் கொல்லப்பட்ட இளைஞர்களின் சடலங்களே இவை என காணாமலாக்கப்பட்டவர்களின் உறவினர்களும் மனித உரிமை செயற்பாட்டாளர்களும் தெரிவிக்கின்றனர்.
1988 முதல் 90ம் ஆண்டு வரை மாத்தளை மாவட்டத்திற்கான இராணுவ இணைப்பாளராக பதவி வகித்த அந்த பகுதியில் கிளர்ச்சிக்கு எதிரான நடவடிக்கைகளுக்கு தலைமை தாங்கிய முன்னாள் ஜனாதிபதி கோட்டாபய ராஜபக்சமீது மாத்தளை மனித புதைகுழிகள் தொடர்பில் கடும் குற்றச்சாட்டுகள் சுமத்தப்பட்டுள்ளதும் குறிப்பிடத்தக்கது.
சர்வதேச உண்மை மற்றும் நீதிக்கான திட்டமும் ஜனநாயகத்திற்கான ஊடகவியலாளர்கள் அமைப்பும் இணைந்து வெளியிட்ட அறிக்கையொன்றில் மாத்தளை மாவட்டத்தில் 1042 பேர் பலவந்தமாக காணாமலாக்கப்பட்டமை தொடர்பில் கோட்டாபய ராஜபக்சவே முக்கிய குற்றவாளி என குற்றம்சாட்டியிருந்தன.
(ரி)
