ஜனாதிபதி பொருளாதார வளர்ச்சி குறித்து தனது வரசெலவுதிட்ட உரையில் குறிப்பிட்டிருந்தாலும் உண்மையில் அதற்காக வழிமுறை அல்லது நிதி ஒதுக்கீடு எதனையும் அவர் முன்மொழியவில்லை என ஸ்ரீலங்கா பொதுஜனபெரமுனவின் பொதுச்செயலாளர் சாகர காரியவசம் தெரிவித்துள்ளார்.
மதிப்பு கூட்டப்பட்ட சமூக பங்களிப்பு வரிக்கான வருடாந்திர வருமான வரம்பை 60 பில்லியனில் இருந்து 30 பில்லியனாக குறைப்பது போன்ற முன்மொழிவுகள் மூலம் வரவுசெலவுதிட்டம் கண்ணிற்கு தெரியாத விதத்தில் தந்திரமாக மக்கள் மீது அழுத்தங்களை திணித்துள்ளது என அவர் தெரிவித்துள்ளார்.
மக்கள் இதனை உடனடியாக புரிந்துகொள்ள மாட்டாhகள் என தெரிவித்துள்ள அவர் இந்த குறைப்பின் மூலம் 60 மில்லியன் உழைக்கும் பெரிய அளவிலான வர்த்தகர்கள் மாத்திரமின்றி 36 மில்லியன் உழைப்பவர்களும் வரிவிதிப்பிற்குள்ளாவார்கள் என அவர் தெரிவித்துள்ளார்.
வரிச்சுமை மீண்டும் மக்கள் மீது விழும் என தெரிவித்துள்ள அவர் வரி மாத்திரம் ஒரு முன்னேற்றமாக இருக்க முடியாது என குறிப்பிட்டுள்ளார்.
உற்பத்தியை மேம்படுத்துவதற்கும் ஏற்றுமதி பொருளாதாரத்தை வளர்ப்பதற்கும் பட்ஜெட் உரையில் திட்டங்கள் இல்லை. பொருளாதாரத்தை மீட்டெடுப்பதற்கான செயல் திட்டமும் கோடிட்டுக் காட்டப்படவில்லை.
பட்ஜெட்டில் டிஜிட்டல் துறையை மேம்படுத்துவது குறித்தும் சுற்றுலாத் துறையை மேம்படுத்த நிதி ஒதுக்குவது குறித்தும் குறிப்பிடப்பட்டிருந்தாலும் இரு தொழில்களையும் எவ்வாறு மேம்படுத்துவது என்பதற்கான வழிமுறையை அது விளக்கவில்லை மேலும் அவற்றின் மூலம் பொருளாதார வளர்ச்சிக்கான வழிமுறைகள் மற்றும் செயல் திட்டங்களை கோடிட்டுக் காட்டத் தவறிவிட்டது.
