2025 இல்பூர்த்தி செய்வதென திட்டமிடப்பட்ட அரசாங்கத்தின் 79கட்டுமான திட்டங்களில் ஐந்து மாத்திரமே கட்டிமுடிக்கப்படும் நிலையில் உள்ளதாக
இலங்கை கட்டிட துறையினரின் சங்கத்தின் தலைவர் சுசந்த லியனாராச்சி தெரிவித்துள்ளார்.
அரசாங்கத்தின் நிதி உதவியுடன் முன்னெடுக்கப்பட்ட 21 திட்டங்கள், வெளிநாட்டு நிதிஉதவியுடன் முன்னெடுக்கப்பட்ட ஆறு திட்டங்கள்,உள்நாட்டு கடனின் அடிப்படையில் முன்னெடுக்கப்பட்ட பத்து திட்டங்கள் இடைநடுவில் நிறுத்தப்பட்டுள்ளன.
கட்டுமான தொழில்துறைக்காக 2025 வரவு செலவுதிட்டத்தில் 1315 மில்லியன் ஒதுக்கப்பட்ட போதிலும் தெளிவான நிதி எவ்வாறு வழங்கப்படும் என்பது குறித்து தெளிவான தகவல்கள் இடம்பெற்றிருக்கவில்லை என அவர் குறிப்பிட்டுள்ளார்.
79 கட்டுமான திட்டங்களிற்காக முதலில் 3.3 டிரில்லியனும் பின்னர் 1.3 டிரில்லியனும் ஒதுக்கப்பட்டதாக தெரிவித்துள்ள அவர் உள்நாட்டு கட்டுமான திட்டங்கள் 72 வீத முன்னேற்றத்தை காண்பித்துள்ளன,நிதியை பெற்றுக்கொள்வதில் காணப்படும் தாமதம் காரணமாக வெளிநாட்டு நிதி உதவியுடனான திட்டங்களில் 27 வீதமானவை உரிய முன்னேற்றத்தை காண்பிக்கவில்லை என குறிப்பிட்டுள்ளார்.
முன்னேற்றத்தை காண்பிக்க தவறிய அரசாங்கத்தின் 96 திட்டங்கள் சிவப்பு கோட்டின் கீழ் கொண்டுவரப்பட்டுள்ளன என தெரிவித்துள்ள அவர் 2025 பல கட்டுமான திட்டங்கள் முடங்கிய போதிலும் 2026 இல் புதிய கட்டுமான திட்டங்கள் குறித்த யோசனைகள் முன்வைக்கப்பட்டுள்ளதாக அவர் தெரிவித்துள்ளார்.
